ಕೆಲ ದಿನಗಳ ಹಿಂದೆ ನಿರ್ದೇಶಕ ಎ.ಪಿ.ಅರ್ಜುನ್ ಸೋಷಿಯಲ್ ಮೀಡಿಯಾದಲ್ಲಿ ಒಂದು ನೆರಳಿನ ಚಿತ್ರ ಪೋಸ್ಟ್ ಮಾಡಿ ಅದರಲ್ಲಿರುವ ನಾಯಕ ನಟ ಯಾರು ಗುರುತಿಸಿ ಎಂದಿದ್ದರು. ಈಗ ಅದಕ್ಕೆ ಉತ್ತರ ಸಿಕ್ಕಿದ್ದು, ಆ ಚಿತ್ರದಲ್ಲಿರುವುದು ವಿರಾಟ್ ಎಂದು ಸ್ವತಃ ಅರ್ಜುನ್ ತಿಳಿಸಿದ್ದಾರೆ. ‘ಅದ್ಧೂರಿ ಲವರ್ ನನ್ನ ಬ್ಯಾನರ್ನಲ್ಲಿ ಮೂಡಿ ಬರುತ್ತಿರುವ ಎರಡನೇ ಚಿತ್ರ. ಶ್ಯಾಡೋ ಫೋಟೋ ಹಾಕಿದಾಗ ಸಾಕಷ್ಟು ಜನ ಬೇರೆ ನಾಯಕರ ಹೆಸರನ್ನು ಹೇಳಿದರು. ಆದರೆ ಅದು ವಿರಾಟ್ ಫೋಟೋ. ಈ ಚಿತ್ರಕ್ಕೆ ವಿರಾಟ್ ನಾಯಕ, ಸಂಜನಾ ಆನಂದ್ ನಾಯಕಿ. ನಾಯಕ ಇಲ್ಲಿ ಮಿಡಲ್ ಕ್ಲಾಸ್ ಹುಡುಗ, ಆದರೆ ಪ್ರೀತಿಯಲ್ಲಿ ಅವನು ದೊಡ್ಡ ಶ್ರೀಮಂತ. ಈ ರೀತಿಯೂ ಲವ್ ಮಾಡಬಹುದಾ ಎಂದು ಪ್ರೇಕ್ಷಕನಿಗೆ ಅನಿಸುವಷ್ಟು ಪೀಕ್ನಲ್ಲಿ ತೋರಿಸುತ್ತೇವೆ. ಈ ಸಿನಿಮಾದ ನಿರ್ದೇಶಕರನ್ನು ಮುಹೂರ್ತದ ದಿನ ಅನೌನ್ಸ್ ಮಾಡುತ್ತೇವೆ’ ಎನ್ನುತ್ತಾರೆ ಅರ್ಜುನ್.
