ಕ್ರಿಸ್ಮಸ್​ಗೆ 'ಯುವರತ್ನ' ಚಿತ್ರದ ಇನ್ನೊಂದು ಹಾಡು ...

ಬೆಂಗಳೂರು: ಪುನೀತ್​ ರಾಜಕುಮಾರ್​ ಅಭಿನಯದ 'ಯುವರತ್ನ' ಚಿತ್ರದ ಮುಹೂರ್ತವಾಗಿ ಎರಡು ವರ್ಷಗಳಾಗಿವೆ. ಈ ಮಧ್ಯೆ, ಅಭಿಮಾನಿಗಳ ಒತ್ತಾಯದ ಮೇರೆಗೆ 'ಪವರ್​ ಆಫ್​ ಯೂಥ್​' ಎಂಬ ಹಾಡಿನ ಲಿರಿಕಲ್​ ವೀಡಿಯೋ ಬಿಡುಗಡೆಯಾಗಿತ್ತು. ಈ ಮಧ್ಯೆ, ಚಿತ್ರದ ಇನ್ನೊಂದು ಸಿಂಗಲ್​ ಬಿಡುಗಡೆ ಮಾಡುವುದಕ್ಕೆ ಚಿತ್ರತಂಡ ಸಜ್ಜಾಗಿದೆ.

ಇದನ್ನೂ ಓದಿ: ದ್ವಾರಕೀಶ್​ ಬಿಡುಗಡೆ ಮಾಡ್ತಾರಂತೆ ಶರಣ್​ ಹೊಸ ಚಿತ್ರದ ಟೈಟಲ್​!

ಈ ಬಾರಿ 'ನೀನಾದೆ ನಾ ...' ಎಂಬ ರೊಮ್ಯಾಂಟಿಕ್​ ಹಾಡನ್ನು ಬಿಡುಗಡೆ ಮಾಡಲಾಗುತ್ತಿದ್ದು, ಪುನೀತ್​ ರಾಜಕುಮಾರ್​ ಮತ್ತು ಸಾಯೇಷಾ ಸೆಹಗಲ್​ ಈ ಹಾಡಿನಲ್ಲಿ ಜತೆಯಾಗಿ ಕಾಣಿಸಿಕೊಂಡರೆ, ಎಸ್​.ಎಸ್. ಥಮನ್​ ಸಂಗೀತ ಸಂಯೋಜಿಸಿದ್ದಾರೆ.

ಈ ಹಾಡು ಡಿಸೆಂಬರ್​ 25ರಂದು ಮಧ್ಯಾಹ್ನ 12.05ಕ್ಕೆಯೂಟ್ಯೂಬ್​ನ ಹೊಂಬಾಳೆ ಮ್ಯೂಸಿಕ್​ ಚಾನಲ್​ನಡಿ ಬಿಡುಗಡೆಯಾಗಲಿದೆ. ಈ ಹಾಡು ಕನ್ನಡ ಮತ್ತು ತೆಲುಗಿನಲ್ಲಿ ಏಕಕಾಲಕ್ಕೆ ಬಿಡುಗಡೆಯಾಗಲಿರುವುದು ವಿಶೇಷ.

ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ, 'ಯುವರತ್ನ' ಚಿತ್ರವು ಈ ವರ್ಷ ಡಾ. ರಾಜಕುಮಾರ್​ ಅವರ ಹುಟ್ಟುಹಬ್ಬದ ಸಂದರ್ಭದಲ್ಲೇ ಬಿಡುಗಡೆಯಾಗಬೇಕಿತ್ತು. ಆದರೆ, ಕರೊನಾ ಮತ್ತು ಲಾಕ್​ಡೌನ್​ನಿಂದಾಗಿ ಚಿತ್ರವು ತಡವಾಗಿದ್ದು, ಇದೀಗ ಪೋಸ್ಟ್​ ಪ್ರೊಡಕ್ಷನ್​ ಕೆಲಸಗಳು ಭರದಿಂದ ಸಾಗಿವೆ. ಚಿತ್ರವು ಮುಂದಿನ ವರ್ಷದ ಆರಂಭದಲ್ಲಿ ಬಿಡುಗಡೆಯಾಗಲಿದೆ.

ಇದನ್ನೂ ಓದಿ: ನಾನಿನ್ನು ಚಿಕ್ಕ ಹುಡುಗಿ ಸದ್ಯಕ್ಕೆ ಆ ಮಾತು ಕೇಳಲೇಬೇಡಿ ಎಂದ ಅನುಪಮಾ ಪರಮೇಶ್ವರನ್​..!

'ಯುವರತ್ನ' ಚಿತ್ರದಲ್ಲಿ ಪುನೀತ್​ ರಾಜಕುಮಾರ್​ ಜೊತೆಗೆ ಧನಂಜಯ್​, ಸಯೇಷಾ ಸೆಹ್ಗಲ್​, ದಿಗಂತ್​, ಸೋನು ಗೌಡ ಮುಂತಾದವರು ಅಭಿನಯಿಸಿದ್ದು, ಚಿತ್ರವನ್ನು ನಿರ್ದೇಶಿಸುವುದರ ಜೊತೆಗೆ ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆಯನ್ನೂ ಬರೆದಿದ್ದಾರೆ ಸಂತೋಷ್​ ಆನಂದರಾಮ್​. ಇನ್ನು ವಿಜಯ್​ಕುಮಾರ್​ ಕಿರಗಂದೂರು ಈ ಚಿತ್ರವನ್ನು ತಮ್ಮ ಹೊಂಬಾಳೆ ಫಿಲಂಸ್​ನಡಿ ನಿರ್ಮಾಣ ಮಾಡಿದ್ದಾರೆ.

https://www.vijayavani.net/sanjay-dutt-completes-his-portion-in-kgf-2/