ಹೊಸ ‘ಮಠ’ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಗುರುಪ್ರಸಾದ್, ‘ಮನೆ ಕಟ್ಟುವುದು ಸುಲಭ, ಮಠ ಕಟ್ಟುವುದು ಕಷ್ಟ. ‘ಮಠ’ ಚಿತ್ರದ ಸಮಯದಲ್ಲಿ ಒಂದು ತಿಂಗಳ ಕಾಲ, ನಾನು ನಮ್ಮ ತಂಡದ ಜತೆ ಆರು ಸಾವಿರ ಕಿಲೋಮೀಟರ್ ಸುತ್ತಿದ್ದೆ. ‘ಮಠ 2’ ಮಾಡಲು ನನಗೇ ಭಯ. ಆಗ ಕಾಂಗ್ರೆಸ್ ಆಡಳಿತ ಇತ್ತು. ಅಂದಿನ ಪರಿಸ್ಥಿತಿಗಳೇ ಬೇರೆ ರೀತಿ ಇದ್ದವು. ಈಗ ಬಿಜೆಪಿ ಪಕ್ಷ ಆಡಳಿತದಲ್ಲಿದೆ. ಈಗಿನ ಸವಾಲುಗಳೇ ಬೇರೆ ರೀತಿ ಇವೆ. ಇಲ್ಲಿ ನಾನೊಬ್ಬ ಕಲಾವಿದನಷ್ಟೇ. ನಿರ್ದೇಶಕರು ಹೇಳಿದಂತೆ ನಟಿಸಿದ್ದೇನೆ’ ಎಂದರು. ಜತೆಗೆ ಸಾಧು ಕೋಕಿಲ ಅವರ ಜತೆ ಒಂದು ಸಿನಿಮಾ ಮಾಡುವ ಆಸೆಯನ್ನೂ ವ್ಯಕ್ತಪಡಿಸಿದರು. ಬಳಿಕ ಮಾತನಾಡಿದ ಸಾಧು ಕೋಕಿಲ, ‘600-700 ಚಿತ್ರಗಳಲ್ಲಿ ನಟಿಸಿದ್ದೇನೆ. ನನಗೆ ಈ ಚಿತ್ರ ತುಂಬ ಸ್ಪೆಷಲ್. ಮಠದ ಸುತ್ತಮುತ್ತ ಕಥೆ ಇದ್ದರೂ, ಇದರ ಕಥಾವಸ್ತುನೇ ಬೇರೆ. ಇದರಲ್ಲಿ ಯಾರೂ ನಾಯಕರಿಲ್ಲ, ಎಲ್ಲ ಪಾತ್ರಗಳೂ ಕಥಾನಾಯಕರೇ. ನಾನು ಒಬ್ಬ ಸ್ವಾಮೀಜಿ ಪಾತ್ರದಲ್ಲಿ ನಟಿಸಿದ್ದೇನೆ. ಒಬ್ಬ ವ್ಯಕ್ತಿ ಹೇಗೆ ಒಳ್ಳೆಯ ಕೆಲಸ, ಗುಣಗಳ ಮೂಲಕ ಮಠಾಧೀಶನಾಗುತ್ತಾನೆ ಎಂಬುದನ್ನು ನನ್ನ ಪಾತ್ರದ ಮೂಲಕ ಹೇಳಲಾಗಿದೆ’ ಎಂದರು.
