ಈ ಹೊಸ ‘ಬೆಳ್ಳಿ ಕಾಲುಂಗರ’ ಚಿತ್ರಕ್ಕೆ ಕಥೆ ಬರೆದು ನಿರ್ದೇಶಿಸುತ್ತಿದ್ದಾರೆ ಎಚ್. ವಾಸು. ಚಿತ್ರದಲ್ಲಿ ಸಮರ್ಥ್ ಎಂಬ ಹೊಸ ಹುಡುಗ ನಾಯಕನಾದರೆ, ಡಾ. ರಾಜ್ ಮೊಮ್ಮಗಳು ಧನ್ಯಾ ರಾಮ್ುಮಾರ್ ನಾಯಕಿಯಾಗಿದ್ದಾರೆ. ಗುರುಕಿರಣ್ ಸಂಗೀತ, ಕೃಷ್ಣಕುಮಾರ್ ಛಾಯಾಗ್ರಹಣ ಮತ್ತು ಎಂ.ಎಸ್. ರಮೇಶ್ ಅವರ ಸಂಭಾಷಣೆ ಈ ಚಿತ್ರಕ್ಕಿದೆ. ‘ಬೆಳ್ಳಿ ಕಾಲುಂಗರ’ ಚಿತ್ರದ ಕುರಿತು ಮಾತನಾಡುವ ನಿರ್ದೇಶಕ ಎಚ್. ವಾಸು, ‘ಅದೇ ಶೀರ್ಷಿಕೆ ಇಟ್ಟುಕೊಂಡು ಇನ್ನೊಂದು ಚಿತ್ರ ಮಾಡುತ್ತಿದ್ದೇನೆ. ಇದೊಂದು ತ್ರಿಕೋನ ಪ್ರೇಮಕಥೆ. ನಾಯಕ-ನಾಯಕಿಯಾಗಿ ಸಮರ್ಥ್ ಮತ್ತು ಧನ್ಯಾ ನಟಿಸುತ್ತಿದ್ದಾರೆ. ಇನ್ನೊಂದು ನಾಯಕಿಯ ಪಾತ್ರವೂ ಇದೆ. ಇದೊಂದು ಫ್ಯಾಮಿಲಿ ಸೆಂಟಿಮೆಂಟ್ ಚಿತ್ರ. ಆ ಚಿತ್ರದ ಕೆಲವು ಎಳೆಗಳು ಲಿಂಕ್ ಆಗುತ್ತದೆ. ನಾಯಕ-ನಾಯಕಿ ಪ್ರೀತಿಸಿ ಸಮಸ್ಯೆಗಳು ಎದುರಾದಾಗ, ಆ ಚಿತ್ರದ ಪಾತ್ರಗಳು ಇಲ್ಲಿ ಬರುತ್ತವೆ. ಜತೆಗೆ ಹಂಪಿ ಸಹ ಇಲ್ಲೊಂದು ಪಾತ್ರ ವಹಿಸುತ್ತದೆ. ಮೈಸೂರು, ಸಕಲೇಶಪುರ, ಹಂಪಿ ಮುಂತಾದ ಕಡೆ ಚಿತ್ರೀಕರಣ ನಡೆಯುತ್ತಿದೆ. ಆ ಚಿತ್ರದಲ್ಲಿ ಅಭಿನಯಿಸಿದ್ದ ತಾರಾ, ಅವಿನಾಶ್, ಗುರುದತ್ ಮತ್ತು ಶಿವಕುಮಾರ್ ಇಲ್ಲೂ ಮುಂದುವರೆಯುತ್ತಾರೆ’ ಎಂದು ಮಾಹಿತಿ ನೀಡುತ್ತಾರೆ.
