ನಟ ಅಜೇಯ್ ರಾವ್ ಕಳೆದ ಮೂರು ವರ್ಷಗಳಿಂದ ತೆರೆ ಮೇಲೆ ಕಾಣಿಸಿಕೊಂಡಿಲ್ಲ. 2022ರಲ್ಲಿ ತೆರೆಕಂಡಿದ್ದ ‘ಶೋಕಿವಾಲ’ ಅವರು ಅಭಿನಯಿಸಿದ್ದ ಕೊನೆಯ ಸಿನಿಮಾ. ಇದೀಗ ಆಜೇಯ್, ಪವನ್ ಭಟ್ ನಿರ್ದೇಶನದ ‘ಯುದ್ಧಕಾಂಡ’ ಮೂಲಕ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ. ನಟನೆ ಜತೆಗೆ ಈ ಚಿತ್ರವನ್ನು ಅವರೇ ನಿರ್ಮಿಸುತ್ತಿರುವುದು ಮತ್ತೊಂದು ವಿಶೇಷತೆ. ಇದೇ ತಿಂಗಳ 18ರಂದು ಸಿನಿಮಾ ಬಿಡುಗಡೆಯಾಗಲಿದೆ. ಚಿತ್ರದ ಬಗ್ಗೆ ಅವರು, ‘ಹಲವು ಸವಾಲುಗಳನ್ನು ದಾಟಿ ಈ ಚಿತ್ರ ಪೂರ್ಣಗೊಂಡಿದೆ. ಇದೊಂದು ಹೆಣ್ಣಿನ ಕಥೆ. ಸಂತ್ರಸ್ತೆಯಾದ ಹೆಣ್ಣಿಗೆ ಸರಿಯಾದ ಸಮಯದಲ್ಲಿ ನ್ಯಾಯ ಸಿಗಬೇಕು ಎಂಬುದನ್ನು ಹೇಳುತ್ತಿದ್ದೇವೆ. ಇಲ್ಲಿ ಹೋರಾಟ ಇದೆ. ಹಾಗೆಯೇ ನ್ಯಾಯಾಂಗ ವ್ಯವಸ್ಥೆಯಲ್ಲಿ ಒಂದಷ್ಟು ವಿಚಾರಗಳು ಸರಿಯಾಗಬೇಕಿದೆ ಎಂಬುದನ್ನು ಒತ್ತಿ ಹೇಳಿದ್ದೇವೆ. ಅದಕ್ಕಾಗಿ ಈ ಸಿನಿಮಾ ರಾಷ್ಟ್ರಪತಿಗಳಿಗೆ ತಲುಪಬೇಕು ಎಂಬುದು ನಮ್ಮ ಆಶಯ’ ಎಂದು ಮಾಹಿತಿ ನೀಡಿದರು. ಇಲ್ಲಿ ಅಜೇಯ್ ರಾವ್ಗೆ ‘ಕೆಜಿಎಫ್’ ಖ್ಯಾತಿಯ ಅರ್ಚನಾ ಜೋಯಿಸ್ ಜೋಡಿಯಾಗಿದ್ದಾರೆ. ‘ಯಾವುದೇ ಘಟನೆ ನಡೆದರೂ ಸರಿಯಾದ ಸಮಯಕ್ಕೆ ನ್ಯಾಯ ಸಿಗಬೇಕು. ಇದು ನನ್ನ ಡ್ರೀಮ್ ರೋಲ್. ನಿವೇದಿತಾ ಎಂಬ ಪಾತ್ರದಲ್ಲಿ ನಟಿಸಿದ್ದೇನೆ’ ಎಂದು ಪಾತ್ರ ಪರಿಚಯಿಸಿಕೊಂಡರು ಅರ್ಚನಾ.
