ಕರಾವಳಿ ಭಾಗದ ಥ್ರಿಲ್ಲರ್ ಕಥೆ: ನಟನೆ, ನಿರ್ದೇಶನ ಮತ್ತು ನಿರ್ಮಾಣದ ಮೂರೂ ಜವಾಬ್ದಾರಿಗಳನ್ನು ನಿಭಾಯಿಸಲು ಸಾಕಷ್ಟು ಸಿದ್ಧತೆ ನಡೆಸಿರುವ ಐಶಾನಿ, ‘ಕಾಲೇಜು ದಿನಗಳಲ್ಲಿ ಹಲವು ಕಿರುಚಿತ್ರಗಳನ್ನು ನಿರ್ದೇಶಿಸಿದ್ದೆ. ನನ್ನ ನಿರ್ದೇಶನದ ‘ಕಾಜಿ’ ಕಿರುಚಿತ್ರಕ್ಕೆ ಉತ್ತಮ ಸ್ಪಂದನೆ ವ್ಯಕ್ತವಾಯಿತು. ಆಗ ನನಗೆ ತುಂಬಾ ಜನ ಸಿನಿಮಾ ನಿರ್ದೇಶಿಸುವಂತೆ ಸಲಹೆ ನೀಡಿದರು. ಹಾಗಾಗಿ, ನಾನೊಂದು ಕಥೆ ಸಿದ್ಧಪಡಿಸಿಕೊಂಡಿದ್ದೆ. ಅದನ್ನೇ ತೆರೆಮೇಲೆ ತರಲು ಮುಂದಾಗುತ್ತಿದ್ದೇನೆ. ಸದ್ಯ ಪ್ರಿ-ಪ್ರೊಡಕ್ಷನ್ ಹಂತದಲ್ಲಿದೆ. ವಾರದೊಳಗೆ ಟೈಟಲ್ ಹಾಗೂ ಸಿನಿಮಾದ ಬಗ್ಗೆ ಮಾಹಿತಿ ನೀಡುವೆ. ಇದೊಂದು ಕರಾವಳಿ ಭಾಗದಲ್ಲಿ ನಡೆಯುವ ಸಸ್ಪೆನ್ಸ್-ಥ್ರಿಲ್ಲರ್ ಕಥೆ. ಪುತ್ತೂರಿನಲ್ಲಿ ಶೂಟಿಂಗ್ ನಡೆಸಲಿದ್ದೇನೆ. ಇಲ್ಲಿ ಮಹಿಳೆ ಪ್ರಮುಖ ಪಾತ್ರ ವಹಿಸುತ್ತಾಳೆ. ಹಾಗಂತ ಮಹಿಳಾ ಪ್ರಧಾನ ಸಿನಿಮಾ ಎಂದು ಬ್ರ್ಯಾಂಡ್ ಮಾಡುವುದಕ್ಕಿಂತ ಕಥೆಯೇ ಬ್ರ್ಯಾಂಡ್ ಆಗಬೇಕಿದೆ. ಮುಂದಿನ ವರ್ಷ ಸಿನಿಮಾ ರಿಲೀಸ್ ಮಾಡುವ ಯೋಚನೆ ಇದೆ’ ಎಂದು ಮಾಹಿತಿ ನೀಡುತ್ತಾರೆ. ಹಾಗೆಯೇ, ನಿರ್ದೇಶನ, ನಿರ್ಮಾಣವನ್ನು ಒಂದೇ ಚಿತ್ರಕ್ಕೆ ಸೀಮಿತವಾಗಿಸದೇ, ಮುಂದುವರಿಸುವ ಆಲೋಚನೆಯಿರುವ ಐಶಾನಿ ಸದ್ಯ ನಾಲ್ಕು ಕಥೆಗಳನ್ನು ಬರೆದಿಟ್ಟುಕೊಂಡಿದ್ದಾರೆ. ಜತೆಗೆ ಬೇರೆ ಸಿನಿಮಾಗಳಲ್ಲೂ ನಟಿಸಲಿದ್ದು, ಒಂದು ಕಥೆ ಓಕೆ ಮಾಡಿದ್ದಾರೆ.
