Ramayana: ಒಂದು ಕಾಲಘಟ್ಟದಲ್ಲಿ ದೂರದರ್ಶನದಲ್ಲಿ ಮಾತ್ರ ಪ್ರಸಾರವಾಗುತ್ತಿದ್ದ ರಾಮಾಯಣ ಕಥೆ, ಆ ನಂತರ 90ರ ದಶಕದಲ್ಲಿ ಜಪಾನ್ ಮತ್ತು ಭಾರತದ ಕಲಾವಿದರು ಸೇರಿ ಆ್ಯನಿಮೇಷನ್ ರೂಪದಲ್ಲಿ ಸೃಷ್ಟಿಸಿದ ಅದೇ ರಾಮಾಯಣದ ಚಿತ್ರವೊಂದು ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿತು. ಈಗ ಮತ್ತೆ ಸದ್ದು ಮಾಡುತ್ತಿದ್ದು, ಜೆನ್ಜೀಗಳ ಗಮನ ಸೆಳೆಯುತ್ತಿದೆ.
ರಾಮನಾಗಿ ರಣಬೀರ್ ಕಪೂರ್, ಸೀತೆಯಾಗಿ ಸಾಯಿ ಪಲ್ಲವಿ ಮತ್ತು ರಾವಣನಾಗಿ ಯಶ್ ಅಭಿನಯದ ರಾಮಾಯಣ ಹಿಂದಿ ಚಿತ್ರವು ಸದ್ಯ ದೇಶಿಯ ಮತ್ತು ಜಾಗತಿಕ ಬಾಕ್ಸ್ ಆಫೀಸ್ನಲ್ಲಿ ಒಳ್ಳೆಯ ಕಲೆಕ್ಷನ್ ಕಾಣುತ್ತಿದೆ. ಮತ್ತೊಂದೆಡೆ, ಸಿನಿಮಾದ ಅಮೋಘ ದೃಶ್ಯಗಳು ನೋಡುಗರ ಗಮನ ಸೆಳೆದಿವೆ. ಇದೇ ಸಮಯದಲ್ಲಿ ಜೆನ್ಜೀಗಳು, 1993ರಲ್ಲಿ ಬಿಡುಗಡೆಯಾದ ‘ರಾಮಾಯಣ: ದಿ ಲೆಜೆಂಡ್ ಆಫ್ ಪ್ರಿನ್ಸ್ ರಾಮಾ’ ಸಿನಿಮಾವನ್ನು ಮತ್ತೊಮ್ಮೆ ನೆನಪಿಸಿಕೊಂಡಿದ್ದು, ಮೂರು ದಶಕಗಳಾದರೂ ಈ ಚಿತ್ರದ ಕ್ರೇಜ್ ಬಗ್ಗೆ ಗುಣಗಾನ ಮಾಡಿದ್ದಾರೆ.
1993ರಲ್ಲಿ ನಿರ್ಮಾಣಗೊಂಡ ಈ ಆ್ಯನಿಮೇಟೆಡ್ ಚಿತ್ರವನ್ನು ಜಪಾನ್ ಮತ್ತು ಭಾರತದ ಕಲಾವಿದರು ಒಟ್ಟಾಗಿ ರೂಪಿಸಿದ ಚಿತ್ರವಾಗಿದೆ. ಯುಗೋ ಸಾಕೋ, ರಾಮ್ ಮೋಹನ್ ಮತ್ತು ಕೊಯಿಚಿ ಸಸಾಕಿ ನಿರ್ದೇಶನದ ಈ ಚಿತ್ರಕ್ಕೆ ವನರಾಜ್ ಭಾಟಿಯಾ ಸಂಗೀತ ನೀಡಿದ್ದಾರೆ. ರಾಮನ ವನವಾಸ, ಸೀತಾಪಹರಣ, ಹನುಮಂತನ ಲಂಕಾ ಪ್ರವೇಶ, ರಾಮಸೇತುವೆ ನಿರ್ಮಾಣ ಹಾಗೂ ರಾವಣನ ವಿರುದ್ಧದ ಯುದ್ಧದ ಕಥೆಯನ್ನು ಚಿತ್ರದಲ್ಲಿ ಸುಂದರವಾಗಿ ಕಟ್ಟಿಕೊಡಲಾಗಿದೆ.
