12 ಕೋಟಿ ರೂ. ಕಾರು ಖರೀದಿಸಿದ ಐರಾವತ ಚೆಲುವೆ ಊರ್ವಶಿ. ಯಾವುದು ಗೊತ್ತಾ ಆ ದುಬಾರಿ ವಾಹನ?

ವಿಶ್ವದ ಅತ್ಯಂತ ದುಬಾರಿ ಐಶಾರಾಮಿ ಕಾರುಗಳಲ್ಲಿ ರೋಲ್ಸ್​ ರಾಯ್ಸ್​ ಕಲಿನನ್​ ಕೂಡ ಒಂದು. ಭಾರತದ ಮಾರುಕಟ್ಟೆಯಲ್ಲಿ ಇದರ ಬೆಲೆ 10 ಕೋಟಿ ರೂಪಾಯಿಯಿಂದ 12.30 ಕೋಟಿ ರೂಪಾಯಿ ಇದೆ. ರೋಲ್ಸ್​ ರಾಯ್ಸ್​ ಕಾರುಗಳೆಂದರೆ ಶ್ರೀಮಂತಿಕೆ ಮತ್ತು ಪ್ರತಿಷ್ಠೆಯ ಸಂಕೇತ. ಹೀಗಾಗಿಯೇ ಮುಕೇಶ್​ ಅಂಬಾನಿ, ಅಮಿತಾಭ್​ ಬಚ್ಚನ್​, ಶಾರುಖ್​ ಖಾನ್​, ವಿವೇಕ್​ ಓಬೆರಾಯ್​, ಅಲ್ಲು ಅರ್ಜುನ್​, ಅಜಯ್​ ದೇವ್ಗನ್​ ಸೇರಿ ಕೆಲವೇ ಉದ್ಯಮಿಗಳು, ಸಿನಿಮಾ ತಾರೆಯರು ಈ ಕಾರನ್ನು ಖರೀದಿಸಿದ್ದಾರೆ.

ಇದೀಗ ಈ ಸಾಲಿಗೆ ಕನ್ನಡದ "ಐರಾವತ' ಚಿತ್ರದಲ್ಲೂ ನಟಿಸಿರುವ ಬಾಲಿವುಡ್​ ನಟಿ ಊರ್ವಶಿ ರೌಟೆಲಾ ಕೂಡ ಸೇರಿಕೊಂಡಿದ್ದಾರೆ. ಆ ಮೂಲಕ ದುಬಾರಿ ರೋಲ್ಸ್​ ರಾಯ್ಸ್​ ಕಲಿನನ್​ ಖರೀದಿಸಿರುವ ಭಾರತದ ಮೊದಲ ನಟಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಇವರು ಖರೀದಿಸಿರುವ ರೋಲ್ಸ್​ ರಾಯ್ಸ್​ ಕಲಿನನ್​ ಮಾಡೆಲ್​ ಬೆಲೆ 12 ಕೋಟಿ ರೂಪಾಯಿ ಎನ್ನಲಾಗಿದೆ. ಊರ್ವಶಿ ತಮ್ಮ ಐಶಾರಾಮಿ ಜೀವನದಿಂದ ಆಗಾಗ ಸುದ್ದಿಯಾಗುತ್ತಿರುತ್ತಾರೆ.

ಕಳೆದ ವರ್ಷದ ಹುಟ್ಟುಹಬ್ಬಕ್ಕೆ ಅವರು 3 ಕೋಟಿ ರೂಪಾಯಿ ಬೆಲೆಯ ಚಿನ್ನದ ಕೇಕ್​ ಕತ್ತರಿಸುವ ಮೂಲಕ ಸದ್ದು ಮಾಡಿದ್ದರು. ಹಾಗೇ "ಡಾಕು ಮಹಾರಾಜ್​' ಪ್ರಚಾರದ ವೇಳೆ ವಜ್ರದ ಉಂಗುರ ಮತ್ತು ಸರ ಪ್ರದರ್ಶಿಸಿದ್ದರು. ಇದೀಗ ರೋಲ್ಸ್​ ರಾಯ್ಸ್​ ಕಲಿನನ್​ ಖರೀದಿಸುವ ಮೂಲಕ ಮತ್ತೊಮ್ಮೆ ರಾಯಲ್​ ಜೀವನದ ಝಲಕ್​ ನೀಡಿದ್ದಾರೆ. ಸದ್ಯ ಅವರು "ಬ್ಲ್ಯಾಕ್​ ರೋಸ್​', "ವೆಲ್ಕಮ್​ ಟು ದ ಜಂಗಲ್​' ಮತ್ತು "ಕಸೂರ್​ 2' ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ.