ಯೋಗರಾಜ್ ಭಟ್ ನಿರ್ದೇಶನದ, ಇ. ಕೃಷ್ಣಪ್ಪ ನಿರ್ಮಾಣದ "ಮನದ ಕಡಲು' ಕಳೆದ ಮಾ. 28ರಂದು ರಿಲೀಸ್ ಆಗಿತ್ತು. ಈ ಚಿತ್ರದ ಮೂಲಕ "ಫಿಸಿಕ್ಸ್ ಟೀಚರ್' ಸುಮುಖ ರೊಮ್ಯಾಂಟಿಕ್ ಹೀರೋ ಆಗಿ ಚಿತ್ರರಂಗಕ್ಕೆ ಪರಿಚಯವಾದರು. ಅವರಿಗೆ ಜೋಡಿಯಾಗಿದ್ದ ಅಂಜಲಿ ಅನೀಶ್ ಮತ್ತು ರಾಶಿಕಾ ಶೆಟ್ಟಿ ನಟನೆಗೂ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. "ಮನದ ಕಡಲು' ಯಶಸ್ಸಿನ ಬೆನ್ನಲ್ಲೇ ನಾಯಕ ನಟ ಸುಮುಖನಿಗೆ ಮೂರು ರೊಮ್ಯಾಂಟಿಕ್ ಸಿನಿಮಾಗಳಲ್ಲೇ ಅವಕಾಶ ಅರಸಿ ಬಂದಿವೆ. "ಎರಡು ರೊಮ್ಯಾಂಟಿಕ್ ಲವ್ಸ್ಟೋರಿ ಕಥೆಗಳು ಬಂದಿವೆ. ಜತೆಗೆ ಒಂದೆರಡು ಸೆಮಿ ಕಮರ್ಷಿಯಲ್, ಮಾಸ್ ಚಿತ್ರಗಳಲ್ಲೂ ಆರ್ ಇದೆ. ಒಬ್ಬ ನಟನ ಜರ್ನಿ ತುಂಬ ಸವಾಲಿನಿಂದ ಕೂಡಿರುತ್ತದೆ. "ಮನದ ಕಡಲು' ಚಿತ್ರದಲ್ಲಿ ನನಗೆ ಅವಕಾಶ ಸಿಕ್ಕಿದ್ದೇ ಅದೃಷ್ಟ. ಇನ್ನು ಮುಂದೆ ಚಿತ್ರರಂಗದಲ್ಲಿ ನನ್ನ ಕರಿಯರ್ ರೂಪಿಸುವಲ್ಲಿ ನನ್ನ ಮುಂದಿನ ಎರಡು ಚಿತ್ರಗಳು ತುಂಬ ಮುಖ್ಯವಾಗಿವೆ. ಹೀಗಾಗಿ ತುಂಬ ಎಚ್ಚರಿಕೆಯಿಂದ ಕಥೆಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಿದ್ದೇನೆ. ಎಲ್ಲ ರೀತಿಯ ಪಾತ್ರಗಳಲ್ಲಿ, ಜಾನರ್ ಸಿನಿಮಾಗಳಲ್ಲಿ ನಟಿಸುವ ಆಸೆ ಏನೋ ಇದೆ. ಆದರೆ, ಈಗಲೇ ಮಾಸ್ ಸಿನಿಮಾದಲ್ಲಿ ನಟಿಸಬೇಕು ಅಂತ ನನಗೆ ಅನ್ನಿಸುತ್ತಿಲ್ಲ. ರೊಮ್ಯಾಂಟಿಕ್ ಜಾನರ್ನಲ್ಲೇ ನಟಿಸಬೇಕು ಅಂತ ಅಂದುಕೊಂಡಿದ್ದೇನೆ. ಇನ್ನೆರಡು ವಾರಗಳಲ್ಲಿ ಹೊಸ ಸಿನಿಮಾ ಘೋಷಿಸಲಿದ್ದೇವೆ' ಎಂದು ಮಾಹಿತಿ ನೀಡುತ್ತಾರೆ.
