ಬೆಂಗಳೂರು : ಕನ್ನಡದ ಅತಿದೊಡ್ಡ ರಿಯಾಲಿಟಿ ಶೋ ಎಂದೇ ಪ್ರಸಿದ್ಧಿಯಾಗಿರುವ ‘ಬಿಗ್ಬಾಸ್’ ಹೊಸ ಸೀಸನ್ ಆರಂಭಕ್ಕೆ ಸಿದ್ಧತೆ ಪ್ರಾರಂಭವಾಗಿದೆ. ಈಗಾಗಲೇ 11 ಆವೃತ್ತಿಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದು, ಇದೀಗ 12ನೇ ಸೀಸನ್ ಆರಂಭಿಸಲು ‘ಕಲರ್ಸ್ ಕನ್ನಡ’ ವಾಹಿನಿ ಉತ್ಸಾಹದಲ್ಲಿದೆ. ಆದರೆ, ಈ ಮಧ್ಯೆ, ಕಳೆದ ಆವೃತ್ತಿಯಲ್ಲಿ ‘ಬಿಗ್ಬಾಸ್’ ನಿರೂಪಣೆಗೆ ನಟ ಸುದೀಪ್ ವಿದಾಯ ಹೇಳಿದ್ದರು. ಇದು ‘ಬಿಗ್ಬಾಸ್’ ಅಭಿಮಾನಿಗಳಲ್ಲಿ ನಿರಾಸೆ ಮೂಡಿಸಿತ್ತು. ಹಾಗಾದರೆ, 12ರ ಆವೃತ್ತಿಗೆ ಯಾರು ಸಾರಥ್ಯ ವಹಿಸಲಿದ್ದಾರೆ ಎಂಬ ಚರ್ಚೆಯೂ ಆರಂಭವಾಗಿತ್ತು. ಈ ಗೊಂದಲಗಳಿಗೆ ಉತ್ತರ ದೊರೆತಿದ್ದು, ನಟ ಸುದೀಪ್ ಅವರೇ ‘ಬಿಗ್ಬಾಸ್ ಕನ್ನಡ’ ಸೀಸನ್ 12ರ ಆವೃತ್ತಿಯನ್ನು ನಿರೂಪಿಸಲಿದ್ದಾರೆ. ಸ್ವತಃ ಸುದೀಪ್ ಸಮ್ಮುಖದಲ್ಲಿ ಈ ಘೋಷಣೆ ಮಾಡಲಾಗಿದೆ. ‘ಕಳೆದ ಸೀಸನ್ ಆರಂಭದಲ್ಲಿಯೇ ನಾನು ನಿರೂಪಣೆಗೆ ವಿದಾಯ ಘೋಷಿಸಿದ್ದೆ. ತುಂಬಾ ಪ್ರಾಮಾಣಿಕವಾಗಿಯೇ ಆ ನಿರ್ಧಾರ ತೆಗೆದುಕೊಂಡಿದ್ದೆ. ಇದೀಗ ಅದೇ ಪ್ರಾಮಾಣಿಕತೆಯಿಂದ ನಾನು ಮತ್ತೆ ‘ಬಿಗ್ಬಾಸ್ ಕನ್ನಡ’ ನಿರೂಪಿಸಲು ನಿರ್ಧರಿಸಿದ್ದೇನೆ. ಇದರಲ್ಲಿ ಯಾವ ಲೆಕ್ಕಚಾರವೂ ಇಲ್ಲ. ವಾಹಿನಿಯ ಪ್ರತಿಯೊಬ್ಬರು ವಿನಂತಿಸಿದ ರೀತಿ ಹಾಗೆಯೇ ಪ್ರೇಕ್ಷಕರು, ಅಭಿಮಾನಿಗಳು ಎಲ್ಲರೂ ನಾನು ಮರಳಬೇಕು ಎಂಬ ಆಶಯ ವ್ಯಕ್ತಪಡಿಸಿದ್ದರು. ಆ ಮಾತುಗಳು ನನ್ನನ್ನು ಸ್ಪರ್ಶಿಸಿದವು. ಈ ಕಾರಣಕ್ಕೆ ಮರಳಿದ್ದೇನೆ. ಈ ಬಾರಿ ಇನ್ನೂ ದೊಡ್ಡ ಮಟ್ಟದಲ್ಲಿ ಶೋ ಮೂಡಿಬರಲಿದೆ. ಐಪಿಎಲ್ ರೇಂಜಿಗೆ ಜನ ‘ಬಿಗ್ಬಾಸ್’ ವೀಕ್ಷಿಸುವಾಗ ನಮಗೆ ದೊಡ್ಡ ಜವಾಬ್ದಾರಿ ಇದೆ. ಹಾಗೆಯೇ ಇದೊಂದು ವೃತ್ತಿ ಕಂಡುಕೊಳ್ಳಲು ದೊಡ್ಡ ವೇದಿಕೆಯಾಗಿದ್ದು, ಸಾಕಷ್ಟು ಪ್ರತಿಭೆಗಳ ಹುಟ್ಟಿಗೆ ಈ ವೇದಿಕೆ ಕಾರಣವಾಗಿದೆ’ ಎಂದು ಸುದೀಪ್ ಖುಷಿ ಹಂಚಿಕೊಂಡರು. ಜಿಯೋಸ್ಟಾರ್ನ ದಕ್ಷಿಣದ ಮನರಂಜನೆಯ ಕ್ಲಸ್ಟರ್ನ ಮುಖ್ಯಸ್ಥ ಕೃಷ್ಣನ್ ಕುಟ್ಟಿ, ಕಲರ್ಸ್ ಕನ್ನಡ ವಾಹಿನಿಯ ಬಿಜಿನೆಸ್ ಹೆಡ್ ಪ್ರಶಾಂತ್, ಸುಷ್ಮಾ, ಬನಿಜಯ್ ಏಷ್ಯಾ ಮತ್ತು ಎಂಡೆಮೋಲ್ಶೈನ್ ಇಂಡಿಯಾದ ಸಂಸ್ಥಾಪಕ ಹಾಗೂ ಸಿಇಒ ದೀಪಕ್ ಧಾರ್ ಇದ್ದರು.
