ಕರೊನಾ ಹಾವಳಿ ಕಡಿಮೆಯಾದ ಮೇಲೆ ಮೊದಲು ‘777 ಚಾರ್ಲಿ’ ಚಿತ್ರೀಕರಣ ಮುಗಿಸುತ್ತಾರಂತೆ ರಕ್ಷಿತ್. ಆ ನಂತರ ಹೇಮಂತ್ ರಾವ್ ನಿರ್ದೇಶನದ ‘ಸಪ್ತ ಸಾಗರದಾಚೆ ಎಲ್ಲೋ’. ಅದು ಮುಗಿದ ಮೇಲೆ ರಾಹುಲ್ ನಿರ್ದೇಶನದ ‘ರಿಚ್ಚಿ’. ಇದೆಲ್ಲ ಮುಗಿದ ಮೇಲೆ ರಕ್ಷಿತ್, ‘ಪುಣ್ಯಕೋಟಿ’ ಚಿತ್ರವನ್ನು ನಿರ್ದೇಶಿಸಲಿದ್ದಾರೆ. ಅಂದಹಾಗೆ, ರಕ್ಷಿತ್ ಚಿತ್ರರಂಗಕ್ಕೆ ಬಂದು 10 ವರ್ಷಗಳಾಗಿವೆ. ಅವರು ನಟಿಸಿದ ಮೊದಲ ಚಿತ್ರ ‘ನಮ್ ಏರಿಯಾಲ್ ಒಂದಿನ’ ಬಿಡುಗಡೆಯಾಗಿ ಗುರುವಾರಕ್ಕೆ 10 ವರ್ಷಗಳಾಗಿವೆ. ಈ ಸಂದರ್ಭದಲ್ಲಿ ರಕ್ಷಿತ್ ಜತೆಗೆ ಕೆಲಸ ಮಾಡಿದವರು, ಹಿತೈಷಿಗಳು, ಅಭಿಮಾನಿಗಳು ... ಸೋಷಿಯಲ್ ಮೀಡಿಯಾದಲ್ಲಿ ಶುಭ ಕೋರಿದ್ದಾರೆ. ಈ ಪಯಣ ತಮಗೆ ಹೊಸ ಹುಮ್ಮಸ್ಸು ನೀಡಿದೆ ಎನ್ನುತ್ತಾರೆ ರಕ್ಷಿತ್. ‘ನಾಲ್ಕು ತಿಂಗಳ ಈ ಗ್ಯಾಪ್ನಿಂದ ಹೊಸ ಹುಮ್ಮಸ್ಸು ಬಂದಿದೆ. ಇಲ್ಲಿಯವರೆಗೂ ಒಂದು ಹಂತ. ಇನ್ನು ಮುಂದಿನದು ಇನ್ನೊಂದು ಹಂತ. ಆಗ ನನಗೆ ಯಾವುದೇ ಅನುಭವವಿರಲಿಲ್ಲ. ಈಗ 10 ವರ್ಷಗಳ ಅನುಭವ ನನ್ನ ಜತೆಗಿದೆ. ನನ್ನ ದೃಷ್ಟಿಕೋನ ಸಾಕಷ್ಟು ಬದಲಾಗಿದೆ. ಈ ಸಮಯದಲ್ಲಿ ಸಾಕಷ್ಟು ಕಲಿತಿದ್ದೇನೆ. ಜನ ನನ್ನನ್ನು ಸೋಲು, ಗೆಲುವಿನಿಂದ ತುಲನೆ ಮಾಡುತ್ತಾರೆ. ಆದರೆ, ಈ ಸೋಲು, ಗೆಲುವು ಎಲ್ಲವೂ ಒಂದು ಅದ್ಭುತ ಪಯಣವೇ’ ಎಂಬುದು ರಕ್ಷಿತ್ ಅಭಿಪ್ರಾಯ.
