ದೈತ್ಯ ವಿಲನ್​; ಪ್ಯಾನ್​ ಇಂಡಿಯಾ "ವೃಷಭ'ದಲ್ಲಿ ಕನ್ನಡದ ಸ್ಟ್ರಾಂಗ್​ ಮ್ಯಾನ್​ ಮ್ಯೂಟಂಟ್​ ರಘು

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

"ರಾಣ' ಚಿತ್ರದ ಮೂಲಕ ವಿಲನ್​ ಪಾತ್ರದಲ್ಲಿ ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ ನಟ ರಾಘವೇಂದ್ರ ಹೊಂಡದಕೇರಿ, ಸಿನಿಮಾಗಳಲ್ಲಿ ರಘು, ಬಾಡಿ ಬಿಲ್ಡಿಂಗ್​ ಕ್ಷೇತ್ರದಲ್ಲಿ ಮ್ಯೂಟಂಟ್​ ರಘು ಎಂದೇ ಪರಿಚಿತರು. 6.4 ಅಡಿ ಎತ್ತರ, 125 ಕೆಜಿ, ಆಜಾನಬಾಹು ರಘು ಈಗಾಗಲೇ "ಕ್ರಾಂತಿ', "ಗರಡಿ', "ಕಾಟೇರ' ಚಿತ್ರಗಳಲ್ಲಿ ಖಳನಾಯಕನಾಗಿ ಮಿಂಚಿದ್ದು, ಸದ್ಯ "ಕೆಡಿ', "ವೃಷಭ', "ಮುಧೋಳ್​', "ಬರ್ಮ', "ಕಾಂತಾರ: ಚಾಪ್ಟರ್​ 1' ಮತ್ತು "ಸ್ಟೋರಿ ಆಫ್ ಹಸ್ತಿನಾಪುರ' ಚಿತ್ರಗಳ ರಿಲೀಸ್​ಗೆ ಎದುರು ನೋಡುತ್ತಿದ್ದಾರೆ. ಅದರಲ್ಲೂ ಮೋಹನ್​ ಲಾಲ್​ ನಾಯಕನಾಗಿರುವ, "ಪೊಗರು' ನಿರ್ದೇಶಕ ನಂದಕಿಶೋರ್​ ಆ್ಯಕ್ಷನ್​-ಕಟ್​ ಹೇಳಿರುವ "ವೃಷಭ'ದಲ್ಲಿ ರಘು ಪಾತ್ರ ವಿಶೇಷವಾಗಿದೆ.

ಹಾಲಿವುಡ್​ ಪಾತ್ರಗಳನ್ನೂ ಮೀರಿಸುವಷ್ಟು ನೈಜವಾಗಿರುವ ವಿಭಿನ್ನ ಮೇಕಪ್​ನಲ್ಲಿ ಕಾಣಿಸಿಕೊಂಡಿರುವ ಅವರು, "ಮೈಸೂರಿನಲ್ಲಿ 12 ದಿನಗಳ ಶೂಟಿಂಗ್​ನಲ್ಲಿ ಭಾಗಿಯಾದೆ. ಪ್ರತಿದಿನ ಆರೇಳು ತಾಸು ಮೇಕಪ್​ಗೇ ಬೇಕಾಗುತ್ತಿತ್ತು. ಸುಮಾರು 15 ವರ್ಷಗಳ ಕಾಲ ಆ್ಯನಿಮೇಷನ್​ ಕ್ಷೇತ್ರದಲ್ಲಿ ಕೆಲಸ ಮಾಡಿ ಅನುಭವವಿದ್ದ ಕಾರಣ, ಮೇಕಪ್​ ಬಳಿಕ ನಾನೇ ಡೀಟೇಲಿಂಗ್​ ಮಾಡಿಕೊಳ್ಳುತ್ತಿದ್ದೆ. ಹೀಗಾಗಿ ನನ್ನ ಲುಕ್​ ಅಷ್ಟು ನೈಜವಾಗಿ ಮೂಡಿಬಂದಿದೆ. ಪಾತ್ರದ ಬಗ್ಗೆಯೂ ಮೆಚ್ಚುಗೆ ವ್ಯಕ್ತವಾಗುತ್ತಿದ್ದು, ನನ್ನಲ್ಲೂ ನಿರೀಕ್ಷೆ ಹೆಚ್ಚಿಸಿದೆ' ಎಂದು ಹೇಳಿಕೊಳ್ಳುತ್ತಾರೆ.

ಕಾಲಿವುಡ್​ಗೆ ಪದಾರ್ಪಣೆ

ಕನ್ನಡದಲ್ಲಿ ಸಾಲು ಸಾಲು ಚಿತ್ರಗಳಲ್ಲಿ ವಿಲನ್​ ಪಾತ್ರಗಳಲ್ಲಿ ಮಿಂಚುತ್ತಿರುವ ರು, ಅದರ ನಡುವೆಯೇ ತಮಿಳು ಚಿತ್ರರಂಗಕ್ಕೂ ಎಂಟ್ರಿ ಕೊಟ್ಟಿದ್ದಾರೆ. "ಅರುಳ್​ನಿಧಿ ನಾಯಕನಾಗಿರುವ, "ಕೊಂಬನ್​', "ವಿರುಮಾನ್​' ಖ್ಯಾತಿಯ ಮುತ್ತಯ್ಯ ನಿರ್ದೇಶಿಸಿರುವ "ರ್ಯಾಂಬೋ' ಚಿತ್ರದಲ್ಲಿ ಒಂದೊಳ್ಳೆ ಪಾತ್ರದಲ್ಲಿ ನಟಿಸಿದ್ದೇನೆ. ಕೆಲವೇ ದಿನಗಳಲ್ಲಿ ಸಿನಿಮಾ ತೆರೆಗೆ ಬರುವ ನಿರೀಕ್ಷೆ ಇದೆ. ಜತೆಗೆ "ಕೆಡಿ', "ಕಾಂತಾರ 1', "ವೃಷಭ' ಚಿತ್ರಗಳೂ ಇದೇ ವರ್ಷ ರಿಲೀಸ್​ ಆಗಲಿರುವ ಕಾರಣ 2025 ನನ್ನ ಪಾಲಿಗೆ ಸ್ವಲ್ಪ ಚೆನ್ನಾಗಿದೆ' ಎಂದು ಸಂತಸ ವ್ಯಕ್ತಪಡಿಸುತ್ತಾರೆ ರಘು.

ಬಹುಮುಖ ಪ್ರತಿಭೆ

ಆ್ಯನಿಮೇಷನ್​ ಕಲಾವಿದನಾಗಿ 15 ವರ್ಷ ಅನುಭವವಿರುವ ರಘು ಹಾಲಿವುಡ್​ನ ಹಿಟ್​ "ಪೆಂಗ್ವಿನ್ಸ್​', "ಮಡಗಾಸ್ಕರ್​', "ಹೌ ಟು ಟ್ರೇನ್​ ಯುವರ್​ ಡ್ರಾಗನ್​' ಸೇರಿ ಹಲವು ಆ್ಯನಿಮೇಟೆಡ್​ ಸಿನಿಮಾಗಳಲ್ಲಿ ಕೆಲಸ ಮಾಡಿದ್ದಾರೆ. ಜತೆಗೆ ಬಾಡಿ ಬಿಲ್ಡಿಂಗ್​, ಸ್ಟ್ರಾಂಗ್​ ಮ್ಯಾನ್​, ಪವರ್​ ಲಿಫ್ಟಿಂಗ್​ನಲ್ಲಿ ರಾಷ್ಟ್ರ ಮತ್ತು ಅಂತಾರಾಷ್ಟ್ರೀಯ ಸ್ಪರ್ಧೆಗಳಲ್ಲಿ ಭಾಗಿಯಾಗಿ ಹಲವು ಪ್ರಶಸ್ತಿಗಳನ್ನು ಪಡೆದಿದ್ದು, ಕ್ರೀಡಾರತ್ನ ಪ್ರಶಸ್ತಿಯೂ ಅವರಿಗೆ ದೊರೆಕಿದೆ. ಹಾಗೇ ವಿಶ್ವಾದ್ಯಂತ ಒಂದು ಸಾವಿರಕ್ಕೂ ಹೆಚ್ಚು ಜನರಿಗೆ ವೇಟ್​ ಲಿಫ್ಟಿಂಗ್​ ತರಬೇತಿ ನೀಡಿರುವ ಹೆಗ್ಗಳಿಕೆ ಅವರಿಗೆ ಸಲ್ಲುತ್ತದೆ. ನಟನೆಯ ಜತೆಗೆ ಜಿಮ್​ ಟ್ರೇನರ್​ ಆಗಿರುವ ರಘು ಚಂದನ್​ ಶೆಟ್ಟಿ, ವಿಕ್ರಂ ರವಿಚಂದ್ರನ್​, ನಮ್ರತಾ ಗೌಡ ಸೇರಿ ಹಲವರಿಗೆ ತರಬೇತಿ ನೀಡಿದ್ದಾರೆ.