99ರೂ.ಗೆ ಸಿನಿಮಾ ನೋಡಿ! ‘ಆರಾಮ್​ ಅರವಿಂದಸ್ವಾಮಿ’ ತಂಡದ ಬಂಪರ್​ ಆಫರ್​

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಪ್ರೇಕ್ಷಕರು ಥಿಯೇಟರ್​ಗೆ ಬರುತ್ತಿಲ್ಲ ಅಂತ ಚಿತ್ರತಂಡಗಳು ದೂರುತ್ತಿವೆ. ಅದರ ನಡುವೆಯೇ ಕೆಲ ಟೀಮ್​ಗಳು ಪ್ರೇಕ್ಷಕರನ್ನು ಸೆಳೆಯಲು ಹೊಸ ಹೊಸ ಪ್ರಯತ್ನಗಳನ್ನು ಮಾಡುತ್ತಿವೆ. ಆ ಸಾಲಿಗೆ ಸೇರುವ ಸಿನಿಮಾ "ಆರಾಮ್​ ಅರವಿಂದಸ್ವಾಮಿ'. "ನಮ್​ ಗಣಿ ಬಿಕಾಂ ಪಾಸ್​' ಖ್ಯಾತಿಯ ಅಭಿಷೇಕ್​ ಶೆಟ್ಟಿ ಆ್ಯಕ್ಷನ್-ಕಟ್​ ಹೇಳುತ್ತಿರುವ, ಅನೀಶ್​ ತೇಜೇಶ್ವರ್​, ಮಿಲನಾ ನಾಗರಾಜ್​ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ ಚಿತ್ರವಿದು. ಈಗಾಗಲೇ "ಮುಂದೆ ಹೇಗೋ...', "ಹುಡುಕುತಾ' ಮತ್ತು ಟೈಟಲ್​ ಟ್ರಾ$್ಯಕ್​ ರಿಲೀಸ್​ ಆಗಿದ್ದು, ಜಾಲತಾಣದಲ್ಲಿ ವೈರಲ್​ ಆಗಿವೆ.

ಇದೇ ತಿಂಗಳ 22ರಂದು ಸಿನಿಮಾ ರಿಲೀಸ್​ ಆಗಲಿದ್ದು, ಚಿತ್ರತಂಡ ಮೊದಲ ಮೂರು ದಿನಗಳ ಕಾಲ ಕೇವಲ 99 ರೂ.ಗೆ ಟಿಕೆಟ್​ ನಿಗದಿಪಡಿಸಿದೆ. ವಿಶೇಷ ಅಂದರೆ ಥಿಯೇಟರ್​ ಮಾತ್ರವಲ್ಲ, ಮಲ್ಟಿಪ್ಲೆಕ್ಸ್​ಗಳಿಗೂ ಈ ಆರ್​ ವಿಸ್ತರಿಸುವ ಮೂಲಕ ಹೊಸ ಸಾಹಸಕ್ಕೆ ಕೈ ಹಾಕಿದೆ. ನಿರ್ಮಾಪಕಿ ಅಶ್ವಿನಿ ಪುನೀತ್​ ರಾಜಕುಮಾರ್​, ನಿರ್ಮಾಪಕ ಕಮ್​ ವಿತರಕ ಜಯಣ್ಣ, ಕಾರ್ತಿಕ್​ ಗೌಡ, ಯೋಗಿ ಜಿ. ರಾಜ್​, ನಿರ್ದೇಶಕ ತರುಣ್​ ಸುಧೀರ್​, ನಟ ಯುವರಾಜಕುಮಾರ್​ ಸೇರಿ ಹಲವು ತಾರೆಯರು 99 ರೂ. ಕೊಟ್ಟು "ಆರಾಮ್​ ಅರವಿಂದಸ್ವಾಮಿ' ಚಿತ್ರದ ಟಿಕೆಟ್​ ಖರೀದಿಸಿದ್ದಾರೆ.

ಒಬ್ಬ ವ್ಯಕ್ತಿ ಸಿನಿಮಾ ನೋಡಬೇಕು ಅಂದರೆ 500ರೂ.  ಬೇಕು. ನಾಲ್ಕು ಜನರ ಒಂದು ಕುಟುಂಬಕ್ಕೆ ಎರಡು ಸಾವಿರ ರೂ. ಬೇಕು. ಆಂಧ್ರ, ತೆಲಂಗಾಣ, ತಮಿಳುನಾಡಿನಲ್ಲಿ ಟಿಕೆಟ್​ ದರ ಕಡಿಮೆಯಿದೆ. ಹೀಗಾಗಿಯೇ ಅಲ್ಲಿ ರಿಲೀಸ್​ ಆಗುವ ಸಣ್ಣ, ದೊಡ್ಡ ಚಿತ್ರಗಳನ್ನೂ ಜನ ನೋಡುತ್ತಾರೆ. ಅದೇ ರೀತಿ ಟಿಕೆಟ್​ ದರ ಕಡಿಮೆ ಮಾಡಿದರೆ, ಪ್ರೇಕ್ಷಕರು ಬರುತ್ತಾರೆ ಎಂಬ ಭರವಸೆಯಲ್ಲಿ ಮೊದಲ ಮೂರು ದಿನಗಳ ಕಾಲ 99 ರೂ. ಟಿಕೆಟ್​ ದರ ನಿಗದಿ ಪಡಿಸಿದ್ದೇವೆ. ಪ್ರೇಕ್ಷಕರ ಕೊರತೆಯಿದೆ ಎನ್ನುವ ಸಂದರ್ಭದಲ್ಲಿ ಇಂತಹ ನಿರ್ಧಾರಗಳನ್ನು ತೆಗೆದುಕೊಳ್ಳಲೇಬೇಕು. 10 ಜನ ಬರುವ ಜಾಗಕ್ಕೆ 100 ಜನ ಬಂದಾಗ ಅದು ಪ್ಲಸ್​ ಆಗುತ್ತದೆ.

-ಅಭಿಷೇಕ್​ ಶೆಟ್ಟಿ, ನಿರ್ದೇಶಕ