ಹೌದು, ಸದ್ಯಕ್ಕೆ ಚಿತ್ರಮಂದಿರಗಳು ಮುಚ್ಚಿವೆ. ಲಾಕ್ಡೌನ್ ಮುಗಿದ ಮೇಲೂ ಚಿತ್ರಮಂದಿರಗಳು ತಕ್ಷಣ ಪ್ರಾರಂಭವಾಗುತ್ತವೋ ಇಲ್ಲವೋ ಎಂಬುದು ಯಾರಿಗೂ ಗೊತ್ತಿಲ್ಲ. ಏಕೆಂದರೆ, ಜನರಲ್ಲಿ ಇನ್ನೂ ಕರೊನಾ ಬಗ್ಗೆ ಭೀತಿ ಇರುವುದರಿಂದ ಹಲವರು ಚಿತ್ರಮಂದಿರಗಳಿಗೆ ಹೋಗುವುದಕ್ಕೆ ಈಗಲೇ ತಯಾರಿಲ್ಲ ಎಂದು ಹೇಳಲಾಗುತ್ತಿದೆ. ಈ ಪರಿಸ್ಥಿತಿ ಸರಿ ಹೋಗುವುದಕ್ಕೆ ಇನ್ನೂ ನಾಲ್ಕೈದು ತಿಂಗಳುಗಳಾದರೂ ಬೇಕು. ಆದರೆ, ಈಗಾಗಲೇ ಹಲವು ಚಿತ್ರಗಳು ಸಂಪೂರ್ಣವಾಗಿ ಬಿಡುಗಡೆಗೆ ಎದುರು ನೋಡುತ್ತಿದ್ದವು. ಬಿಡುಗಡೆ ಇನ್ನೂ ವಿಳಂಬವಾಗುತ್ತದೆ ಎಂದು ಗೊತ್ತಾಗುತ್ತಿದ್ದಂತೆಯೇ ಹಲವು ನಿರ್ಮಾಪಕರು ಓಟಿಟಿಗಳ ಕಡೆ ಮುಖ ಮಾಡುತ್ತಿದ್ದಾರೆ. ಅದಕ್ಕೆ ಸರಿಯಾಗಿ ಚಿತ್ರಗಳ ಡಿಜಿಟಲ್ ಹಕ್ಕುಗಳನ್ನು ಖರೀದಿಸುವುದಕ್ಕೆ ಹಲವು ಓಟಿಟಿಗಳು ಪ್ರಯತ್ನ ನಡೆಸಿದ್ದು, ಈ ಪೈಕಿ ಅಮೇಜಾನ್ ಮುಂಚೂಣಿಯಲ್ಲಿದೆ. ಹಲವು ಚಿತ್ರಗಳನ್ನು ಈಗಾಗಲೇ ಖರೀದಿಸಿರುವ ಅಮೇಜಾನ್ ಪ್ರೈಮ್, ಮುಂದಿನ ಮೂರು ತಿಂಗಳುಗಳಲ್ಲಿ ಐದು ಭಾಷೆಗಳ ಏಳು ಚಿತ್ರಗಳನ್ನು ಬಿಡುಗಡೆ ಮಾಡುವುದಾಗಿ ಹೇಳಿದೆ.
