ಅಷ್ಟರಲ್ಲಾಗಲೇ ಮಹಿಳಾ ಪ್ರಧಾನ ಚಿತ್ರಗಳ ಟ್ರೆಂಡ್ ಕನ್ನಡದಲ್ಲಿ ಸಣ್ಣಮಟ್ಟದಲ್ಲಿ ಶುರುವಾಗಿತ್ತು. ಪುಟ್ಟಣ್ಣನವರೇ ‘ಬೆಳ್ಳಿ ಮೋಡ’ ಮತ್ತು ‘ಕಪು್ಪ ಬಿಳುಪು’ ಚಿತ್ರಗಳನ್ನು ತೆರೆಗೆ ತಂದಿದ್ದರು. ಆದರೆ, ‘ಗೆಜ್ಜೆ ಪೂಜೆ’ ಚಿತ್ರದಿಂದ ಮಹಿಳಾ ಪ್ರಧಾನ ಚಿತ್ರಗಳಿಗೆ ದೊಡ್ಡ ಮಾರುಕಟ್ಟೆ ಸೃಷ್ಟಿಯಾಗುವುದರ ಜತೆಗೆ, ನಂತರದ ದಿನಗಳಲ್ಲಿ ಹಲವು ಚಿತ್ರಗಳು ನಿರ್ವಣವಾದವು. ಅದರಲ್ಲೂ ಪುಟ್ಟಣ್ಣನವರೇ ಮುಂದಿನ ದಿನಗಳಲ್ಲಿ ‘ಎಡಕಲ್ಲು ಗುಡ್ಡದ ಮೇಲೆ’, ‘ಉಪಾಸನೆ’, ‘ಶುಭ ಮಂಗಳ’, ‘ಬಿಳಿ ಹೆಂಡ್ತಿ’, ‘ಧರ್ಮಸೆರೆ’ ಮುಂತಾದ ಸಾಲುಸಾಲು ಮಹಿಳಾ ಪ್ರಧಾನ ಚಿತ್ರಗಳನ್ನು ತೆರೆಗೆ ತಂದರು. ‘ಗೆಜ್ಜೆ ಪೂಜೆ’, ಎಂ.ಕೆ. ಇಂದಿರಾ ಅವರ ಅದೇ ಹೆಸರಿನ ಕಾದಂಬರಿ ಆಧರಿಸಿದ ಚಿತ್ರ. ದೇವದಾಸಿ ಪದ್ಧತಿಯ ಕುರಿತಾದ ಈ ಕಥೆಯನ್ನು ಚಿತ್ರಕ್ಕೆ ಹೊಂದುವಂತೆ ಒಂದಿಷ್ಟು ಬದಲಿಸಿ ಚಿತ್ರಕಥೆ ಬರೆದಿದ್ದರು ಪುಟ್ಟಣ್ಣ ಕಣಗಾಲ್. ಇದು ಸ್ಕ್ರಿಪ್ಟ್ ಇಲ್ಲದೆ ನಿರ್ವಣವಾದ ಚಿತ್ರ ಎಂದು ಹೇಳಲಾಗುತ್ತದೆ. ಆ ಕಥೆಯನ್ನು ಹೇಗೆ ತೆರೆಗೆ ತರಬೇಕು ಎಂಬ ಸ್ಪಷ್ಟ ಚಿತ್ರಣ ಪುಟ್ಟಣ್ಣನವರ ಮನಸ್ಸಿನಲ್ಲಿತ್ತಂತೆ. ಅದಕ್ಕೆ ಅನುಗುಣವಾಗಿ ಸ್ಥಳದಲ್ಲೇ ಸಂಭಾಷಣೆಗಳನ್ನು ರಚಿಸಿ ಚಿತ್ರೀಕರಣ ಮಾಡಲಾಯಿತು ಎಂದು ಹೇಳಲಾಗುತ್ತದೆ. ಈ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಮೂರು ಪ್ರತಿಭೆಗಳ ಆಗಮನವಾಯಿತು. ನಾಯಕ ನಟ ಗಂಗಾಧರ್, ಆರತಿ ಮತ್ತು ಲೋಕನಾಥ್ ಅವರನ್ನು ಈ ಚಿತ್ರದ ಮೂಲಕ ಪರಿಚಯಿಸಿದರು ಪುಟ್ಟಣ್ಣ. ಮಿಕ್ಕಂತೆ ಕಲ್ಪನಾ, ಲೀಲಾವತಿ, ಅಶ್ವತ್ಥ್, ಪಂಡರೀಬಾಯಿ ಮುಂತಾದ ದಿಗ್ಗಜ ಕಲಾವಿದರಿದ್ದರು. ರಾಷ್ಟ್ರ ಮಟ್ಟದಲ್ಲಿ ಈ ಚಿತ್ರಕ್ಕೆ ಅತ್ಯುತ್ತಮ ಚಿತ್ರ ಮತ್ತು ಅತ್ಯುತ್ತಮ ಚಿತ್ರಕಥೆ ಪ್ರಶಸ್ತಿ ಸಿಕ್ಕರೆ, ರಾಜ್ಯ ಮಟ್ಟದಲ್ಲಿ ಒಟ್ಟು ಐದು ಪ್ರಶಸ್ತಿಗಳನ್ನು ಈ ಚಿತ್ರ ತನ್ನದಾಗಿಸಿಕೊಂಡಿತ್ತು. ಚಿತ್ರದ ಸಂಗೀತಕ್ಕೆ ವಿಜಯಭಾಸ್ಕರ್ ಅವರಿಗೆ ಪ್ರಶಸ್ತಿ ಸಿಗಬೇಕಿತ್ತು ಎಂಬ ಅಭಿಪ್ರಾಯ ಹಲವರಲ್ಲಿತ್ತಾದರೂ, ಅತ್ಯುತ್ತಮ ಸಂಗೀತ ನಿರ್ದೇಶಕ ಪ್ರಶಸ್ತಿಯು ‘ಶ್ರೀ ಕೃಷ್ಣದೇವರಾಯ’ ಚಿತ್ರಕ್ಕಾಗಿ ಟಿ.ಜಿ. ಲಿಂಗಪ್ಪ ಅವರಿಗೆ ಸಿಕ್ಕಿತ್ತು.
