ಬೆಂಗಳೂರು: ಸಂಗೀತ ನಿರ್ದೇಶಕ ಅರ್ಜುನ್ ಜನ್ಯ ಮೊದಲ ಬಾರಿಗೆ ಆ್ಯಕ್ಷನ್-ಕಟ್ ಹೇಳುತ್ತಿರುವ ಮಲ್ಟಿಸ್ಟಾರರ್ ಸಿನಿಮಾ ‘45’. ಶಿವರಾಜಕುಮಾರ್, ಉಪೇಂದ್ರ ಹಾಗೂ ರಾಜ್ ಬಿ. ಶೆಟ್ಟಿ ಮುಖ್ಯಭೂಮಿಕೆಯಲ್ಲಿರುವ ಚಿತ್ರವಿದು. ಈ ಹಿಂದೆ ಮೂವರು ನಾಯಕರ ಫಸ್ಟ್ ಲುಕ್ ಬಿಡುಗಡೆ ಮಾಡಿದ್ದ ಚಿತ್ರತಂಡ, ಇದೀಗ ಯುಗಾದಿ ಸಂಭ್ರಮದಲ್ಲಿ ಟೀಸರ್ ಬಿಡುಗಡೆ ಮಾಡಿದೆ. ಉಪೇಂದ್ರ ಅವರ ‘ಓಂ ಚಿತ್ರದ ಡೈರೆಕ್ಟರ್ ನಾನೇ’ ಎಂಬ ಡೈಲಾಗ್ಗೆ ‘ಆ ಫಿಲಂ ಹೀರೋ ನಾನೇ’ ಎಂಬ ಶಿವಣ್ಣ ‘ಓಂ’ ಸ್ಟೈಲ್ ಕೌಂಟರ್ ‘45’ ಚಿತ್ರದ ಮೇಲಿನ ನಿರೀಕ್ಷೆ ಹೆಚ್ಚಿಸುವಂತಿದೆ. ಟೀಸರ್ ಬಿಡುಗಡೆಯಲ್ಲಿ ಅರ್ಜುನ್ ಜನ್ಯ, ‘ಸಿನಿಮಾದ ಮೂಲ ಕಾರಣಕರ್ತರು ಶಿವಣ್ಣ. ಅವರಿಂದಲೇ ಚಿತ್ರ ಪೂರ್ಣಗೊಳ್ಳಲು ಸಾಧ್ಯವಾಯಿತು. ಬಳಿಕ ಉಪೇಂದ್ರ ಹಾಗೂ ರಾಜ್ ಬಿ.ಶೆಟ್ಟಿ ಅವರನ್ನು ಒಪ್ಪಿಸಿದೆ. ಈ ಜರ್ನಿ ಆರಂಭಕ್ಕೂ ಮುನ್ನ ನಾನೊಂದು ನೀಲನಕ್ಷೆ ಹಾಕಿಕೊಂಡಿದ್ದೆ. ಅದರಂತೆ ಮುಂದುವರಿದೆ. ಹಾಲಿವುಡ್ ಅವರಿಂದ ಸಿಜಿ (ಕಂಪ್ಯೂಟರ್ ಗ್ರಾಫಿಕ್ಸ್) ಮಾಡಿಸುವಾಗಲೂ ಈ ನೀಲನಕ್ಷೆ ಅಡಿಯಲ್ಲಿ ಕೆಲಸಗಳು ನಡೆದವು. ಅಚ್ಚುಕಟ್ಟಾದ ಪ್ಲಾನಿಂಗ್ನಿಂದ ಒಂದು ವರ್ಷದಲ್ಲಿ ಸಿನಿಮಾ ಮುಗಿಯಲು ಸಾಧ್ಯವಾಯಿತು. ಇಲ್ಲಿರುವ ಮೂವರು ನಾಯಕರ ಅಭಿಮಾನಿ ನಾನು. ಅವರಿಗೆ ನಿರ್ದೇಶನ ಮಾಡಿದ್ದು ನನ್ನ ಪುಣ್ಯವೇ ಸರಿ. ಚಿತ್ರದಲ್ಲಿ ‘ಓಂ’ ಛಾಯೆ ಇದೆ’ ಎಂದು ಒಪ್ಪಿಕೊಂಡರು.
