ನವರಸ ನಟನಾ ಅಕಾಡೆಮಿಗೆ 3ನೇ ವರ್ಷದ ಸಂಭ್ರಮ

ಬೆಂಗಳೂರು: ಕನ್ನಡ ಚಿತ್ರರಂಗದ ಹಿರಿಯ ನಿರ್ದೇಶಕ ಎಸ್.ನಾರಾಯಣ್ ಮಾರ್ಗದರ್ಶನದಲ್ಲಿ ಮುನ್ನಡೆಯುತ್ತಿರುವ ನವರಸ ನಟನಾ ಅಕಾಡೆಮಿ ಎರಡು ವರ್ಷ ತುಂಬಿ ಮೂರನೇ ವರ್ಷಕ್ಕೆ ಪದಾರ್ಪಣೆ ಮಾಡಿದೆ.

ಈ ಎರಡು ವರ್ಷಗಳಲ್ಲಿ ಹತ್ತಾರು ಬ್ಯಾಚ್​ಗಳಿಗೆ ನಟನೆ, ನಿರ್ದೇಶನದ ಜತೆಗೆ ಬಣ್ಣದ ಲೋಕದ ಇತರ ಚಟುವಟಿಕೆಗಳ ಬಗ್ಗೆ ತರಬೇತಿ ನೀಡಿರುವ ಅಕಾಡೆಮಿ, ಫೆ.10ರಿಂದ ಹೊಸ ಬ್ಯಾಚ್ ಆರಂಭಿಸುತ್ತಿದೆ. ಈ ಮೊದಲು ವಾರಾಂತ್ಯದಲ್ಲಿ ನಡೆಯುತ್ತಿದ್ದ ನಾಲ್ಕು ಮತ್ತು ಆರು ತಿಂಗಳ ಕೋರ್ಸ್​ಗಳು, ಇನ್ಮುಂದೆ ಸಂಜೆ 6 ಗಂಟೆಯಿಂದ 9 ಗಂಟೆವರೆಗೆ ನಡೆಯಲಿವೆ.

ಈ ಮೂಲಕ ಕೋರ್ಸ್​ಗೆ ಸೇರುವ ಉದ್ಯೋಗಸ್ಥರಿಗೆ ಅನುಕೂಲ ಮಾಡಿಕೊಡಲು ಅಕಾಡೆಮಿ ಮುಂದಾಗಿದೆ. ಪ್ರಾಂಶುಪಾಲರಾದ ಎಸ್.ನಾರಾಯಣ್ ಹಾಗೂ ಎಸ್.ಮಹೇಂದರ್, ನಿರ್ದೇಶಕ ಲಕ್ಕಿ ಶಂಕರ್ ಸೇರಿ ಖ್ಯಾತ ನಿರ್ದೇಶಕರು, ನಟರು, ಛಾಯಾಗ್ರಾಹಕರು ತರಗತಿ ನೀಡಲಿದ್ದು, ಪ್ರಾಕ್ಟಿಕಲ್​ಗೆ ಹೆಚ್ಚು ಒತ್ತು ನೀಡಲಿದ್ದಾರೆ. ನೃತ್ಯ ನಿರ್ದೇಶಕ, ಅಕಾಡೆಮಿ ವ್ಯವಸ್ಥಾಪಕ ಮಾಲೂರು ಶ್ರೀನಿವಾಸ್ ನೃತ್ಯ ಕಲಿಸಿಕೊಡಲಿದ್ದಾರೆ. ನವರಸ ನಟ ಜಗ್ಗೇಶ್ ಸಹಕಾರದೊಂದಿಗೆ ಸಂಸ್ಥೆ ಯಶಸ್ವಿಯಾಗಿ ಮೂರನೇ ವರ್ಷಕ್ಕೆ ಪ್ರವೇಶಿಸುತ್ತಿದೆ.