ಬೆಂಗಳೂರು : ‘ಜಾಲಿಡೇಸ್’, ‘ಕೇಸ್ ನಂ 18/9’ ಖ್ಯಾತಿಯ ನಿರಂಜನ್ ಶೆಟ್ಟಿ ಅಭಿನಯದ, ರಾಜಾ ರವಿಕುಮಾರ್ ನಿರ್ದೇಶನದ ಚಿತ್ರ ‘31 ಡೇಸ್’. ಪೋಸ್ಟ್-ಪ್ರೊಡಕ್ಷನ್ ಕಾರ್ಯಗಳು ಪೂರ್ಣಗೊಂಡು, ಸಿನಿಮಾದ ಸ್ಟ್ ಕಾಪಿ ರೆಡಿಯಾಗಿದೆ. ಎನ್ ಸ್ಟಾರ್ ಎಂಟರ್ಪ್ರೈಸಸ್ ಮೂಲಕ ಖುದ್ದು ನಿರಂಜನ್ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಜತೆಗೆ ವಿ.ಮನೋಹರ್ ಸಂಗೀತ ನಿರ್ದೇಶನದ 150ನೇ ಸಿನಿಮಾ ಎಂಬುದು ಮತ್ತೊಂದು ವಿಶೇಷತೆ. ಈಗಾಗಲೇ ಚಿತ್ರದ ಪ್ರಚಾರ ಕಾರ್ಯಗಳಿಗೆ ಚಾಲನೆ ದೊರೆತಿದ್ದು, ಇತ್ತೀಚೆಗೆ ‘ಮೆಲ್ಲ ಮೆಲ್ಲ, ರತಿ ಜ್ವರ ಜ್ವಾಲೆ’ ಹಾಡು ಬಿಡುಗಡೆಗೊಳಿಸಲಾಗಿದೆ. ಈ ಹಾಡಿಗೆ ಅಭಿಷೇಕ್, ಮೇಘನಾ ಕುಲಕರ್ಣಿ ಧ್ವನಿಯಾಗಿದ್ದು, ನಿರಂಜನ್ ಶೆಟ್ಟಿ ಮತ್ತು ನಾಯಕಿ ಪ್ರಜ್ವಲಿ ಸುವರ್ಣ ಹೆಜ್ಜೆ ಹಾಕಿದ್ದಾರೆ. ಇನ್ನು ಈ ಹಾಡನ್ನು ರೇಡಿಯೋ ಜಾಕಿಗಳ ನೇತೃತ್ವದಲ್ಲಿ ಬಿಡುಗಡೆಗೊಳಿಸಿರುವುದು ಮತ್ತೊಂದು ವಿಶೇಷತೆ. ನಿರಂಜನ್ ಶೆಟ್ಟಿ, ‘ಈ ಸುಂದರ ರೊಮ್ಯಾಂಟಿಕ್ ಸಾಂಗ್ನ ಕ್ರೆಡಿಟ್ ಮನೋಹರ್ ಸರ್ಗೆ ಸಲ್ಲಬೇಕು. ಅದು ಅವರ ಯೋಚನೆ. ಹೆಬ್ರಿಯ ಒಂದೇ ಮನೆಯಲ್ಲಿ ಸಾಂಗ್ ಶೂಟ್ ಮಾಡಿದ್ದೇವೆ. ಪ್ರೇಮಿಗಳ ನಡುವಿನ ಪಿಸುಮಾತು ಇದಾಗಿದ್ದು, ಪ್ರೀತಿ ಆದಾಗ ಇಬ್ಬರ ನಡುವೆ ಉಂಟಾಗುವ ಮಧುರ ಭಾವನೆಯನ್ನು ವ್ಯಕ್ತಪಡಿಸುವುದಾಗಿದೆ. ಈ ಚಿತ್ರದಲ್ಲಿ 11 ಬಿಟ್ ಸಾಂಗ್ಗಳಿವೆ. ಶೀಘ್ರವೇ ಚಿತ್ರದ ಆಡಿಯೋ ಕೂಡ ಬಿಡುಗಡೆ ಮಾಡಲಿದ್ದೇವೆ’ ಎಂದು ಮಾಹಿತಿ ನೀಡುತ್ತಾರೆ.
