ಸೈಬರ್ ಕ್ರೖೆಮ್ ಕುರಿತು 100 ಅಭಿಯಾನ

ಬೆಂಗಳೂರು: ಸಮಾಜದಲ್ಲಿ ಸೈಬರ್ ಕ್ರೖೆಮ್ ಹೆಚ್ಚಾಗುತ್ತಿರುವ ಸಂದರ್ಭದಲ್ಲಿ ಅಂಥ ಪ್ರಕರಣಗಳು ಈಗ ಚಲನಚಿತ್ರದ ಕಥಾವಸ್ತುಗಳೂ ಆಗಿವೆ, ಆಗುತ್ತಿವೆ. ಅಂಥದ್ದೇ ವಿಷಯ ಇಟ್ಟುಕೊಂಡು ಇದೀಗ ‘100’ ಎಂಬ ವಿಶಿಷ್ಟ ಶೀರ್ಷಿಕೆಯಲ್ಲಿ ಚಿತ್ರವೊಂದು ಮೂಡಿಬಂದಿದೆ. ವಿಶೇಷ ಎಂದರೆ ಸೋಷಿಯಲ್ ಮೀಡಿಯಾ ಮೂಲಕ ನಡೆಯುವ ವಂಚನೆಗಳ ಕುರಿತ ಈ ಸಿನಿಮಾ ಮಾಡಿರುವ ಚಿತ್ರತಂಡ, ಸಾಮಾಜಿಕ ಜಾಲತಾಣದಲ್ಲೂ ಆ ಕುರಿತು ಜಾಗೃತಿ ಮೂಡಿಸಲು ಮುಂದಾಗಿದೆ. ಅದಕ್ಕೆಂದೇ ಹ್ಯಾಷ್​ಟ್ಯಾಗ್ ಮೂಲಕ ತಮ್ಮ ಅನುಭವ ಹಂಚಿಕೊಳ್ಳುವಂತೆ ಸಾರ್ವಜನಿಕರು-ಸಿನಿಪ್ರಿಯರನ್ನು ಕೋರಿದೆ.

ರಮೇಶ್ ಅರವಿಂದ್ ನಿರ್ದೇಶನದ ಜತೆಗೆ ಅವರೇ ನಾಯಕರಾಗಿ ಅಭಿನಯಿಸಿರುವ ‘100’ ಚಿತ್ರತಂಡ #100KannadaFilm ಮೂಲಕ ಅಭಿಯಾನ ಹಮ್ಮಿಕೊಂಡಿದೆ. ಜಗತ್ತಿನಲ್ಲಿ ಹಲವಾರು ಮಂದಿ ಸೋಷಿಯಲ್ ಮೀಡಿಯಾ ದುರ್ಬಳಕೆಯಿಂದಾಗಿ ವಂಚನೆಗೆ ಒಳಗಾಗಿದ್ದಾರೆ. ಅಂಥವರು ತಮ್ಮ ಅನುಭವಗಳನ್ನು ಹ್ಯಾಷ್​ಟ್ಯಾಗ್(#100KannadaFilm) ಮೂಲಕ ಟ್ವೀಟ್ ಮಾಡಿಕೊಳ್ಳುವಂತೆ ಚಿತ್ರತಂಡ ಮನವಿ ಮಾಡಿದೆ. ಇದರಿಂದ ಸೋಷಿಯಲ್ ಮೀಡಿಯಾ ಮೂಲಕ ಯಾವ್ಯಾವ ರೀತಿಯಲ್ಲಿ ವಂಚನೆಗಳು ನಡೆಯುತ್ತಿವೆ ಎಂಬುದು ಇತರರಿಗೂ ತಿಳಿದಂತಾಗುತ್ತದೆ. ಅಲ್ಲದೆ ಅಂಥ ಅಪರಾಧಗಳ ಬಗ್ಗೆ ಸೈಬರ್ ಕ್ರೖೆಮ್ ಎಕ್ಸ್​ಪರ್ಟ್ ಮೂಲಕ ಪರಿಹಾರಗಳನ್ನು ಸೂಚಿಸುವ ಚಿಂತನೆಯನ್ನೂ ಚಿತ್ರತಂಡ ಹೊಂದಿದೆ.

‘ಸೂರಜ್ ಪ್ರೊಡಕ್ಷನ್’ ಬ್ಯಾನರ್​ನಲ್ಲಿ ಎಂ. ರಮೇಶ್ ರೆಡ್ಡಿ ನಿರ್ಮಾಣ ಮಾಡಿರುವ ‘100’ನಲ್ಲಿ ರಮೇಶ್ ಅರವಿಂದ್ ಜತೆಗೆ ರಚಿತಾ ರಾಮ್ ಪೂರ್ಣ, ಶೋಭರಾಜ್ ಮುಂತಾದವರು ಅಭಿನಯಿಸಿದ್ದಾರೆ. ಈ ಚಿತ್ರದ ಮೂಲಕ ಹೊಸ ಪ್ರತಿಭೆ ವಿಶ್ವಕರ್ಣ ವಿಲನ್ ಆಗಿ ಸ್ಯಾಂಡಲ್​ವುಡ್​ಗೆ ಪರಿಚಯಿಸಲ್ಪಡುತ್ತಿದ್ದಾರೆ. ಫೆ. 7ಕ್ಕೆ ಸಿನಿಮಾ ಬಿಡುಗಡೆ ಮಾಡುವ ಗುರಿ ಇರಿಸಿಕೊಂಡಿದೆ ಚಿತ್ರತಂಡ.