ಪ್ಯಾಂಗಾಂಗ್​ ತ್ಸೊ ಸರೋವರದ ಬಳಿ ಹೆಲಿಪ್ಯಾಡ್​ ನಿರ್ಮಾಣ, ಯುದ್ಧಕ್ಕೆ ಸಜ್ಜಾಗುತ್ತಿದೆಯಾ ಜಿನ್​ಪಿಂಗ್​ ಸೇನೆ?

ನವದೆಹಲಿ: ಲಡಾಖ್​ನ ಪೂರ್ವಭಾಗದಲ್ಲಿ ಉದ್ವಿಗ್ನ ಪರಿಸ್ಥಿತಿ ಮುಂದುವರಿದಿದೆ. ಇದರ ನಡುವೆ ಚೀನಾದ ಪೀಪಲ್ಸ್​ ಲಿಬರೇಷನ್​ ಆರ್ಮಿ (ಪಿಎಲ್​ಎ) ಫಿಂಗರ್​ 4 ಬಳಿ ಹೆಲಿಪ್ಯಾಡ್​ ನಿರ್ಮಿಸುವ ಜತೆಗೆ ಹೆಚ್ಚಿನ ಸಂಖ್ಯೆಯ ಯೋಧರನ್ನು ನಿಯೋಜಿಸಿದೆ. ತನ್ಮೂಲಕ ಅದು ಒಪ್ಪಂದದನ್ವಯ ಸೇನೆಯನ್ನು ಹಿಂಪಡೆಯುವ ಬದಲಿಗೆ ಯುದ್ಧಕ್ಕೆ ಸಜ್ಜಾಗುತ್ತಿರುವಂತೆ ತೋರುತ್ತಿದೆ.

ಈ ವಿಷಯವನ್ನು ಖಚಿತಪಡಿಸಿರುವ ಭಾರತೀಯ ಸೇನಾಪಡೆಯ ಅಧಿಕಾರಿಯೊಬ್ಬರು, ಪ್ಯಾಂಗಾಂಗ್​ ತ್ಸೊ ಸರೋವರದ ಉತ್ತರ ಭಾಗದಲ್ಲಿ ತಮ್ಮ ಆದಿಪತ್ಯ ಸ್ಥಾಪಿಸಲು ಚೀನಿಯರು ಹುನ್ನಾರ ನಡೆಸಿದ್ದಾರೆ. ಫಿಂಗರ್​ 4ನಲ್ಲಿ ಅವರು ಈಗಾಗಲೆ ಅಭಿವೃದ್ಧಿಪಡಿಸಿಕೊಂಡಿರುವ ಮೂಲಸೌಕರ್ಯಗಳ ಜತೆಗೆ ಹೆಲಿಪ್ಯಾಡ್​ ಒಂದನ್ನು ನಿರ್ಮಿಸುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.

ಪಿಎಲ್​ಎ ಯೋಧರು ಈಗ ನಿಯಮಿತವಾಗಿ ಫಿಂಗರ್​ 3 ಪರ್ವತಶ್ರೇಣಿಯವರೆಗೂ ಗಸ್ತು ನಡೆಸುತ್ತಿದ್ದಾರೆ. ನಮಗೆ ಫಿಂಗರ್​ 2 ಭಾಗಕ್ಕೆ ತೆರಳುವಂತೆ ಒತ್ತಡ ಹೇರುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.

ಇದನ್ನೂ ಓದಿ: ಚೀನಿಯರ ಅನುಕೂಲಕ್ಕೆ ಗಡಿ ಭಾಗದ ರಸ್ತೆ ಅಭಿವೃದ್ಧಿ, ಬೆನ್ನಿಗೆ ಚೂರಿ ಇರಿಯುತ್ತಿದೆ ನೇಪಾಳ

ಇದನ್ನು ಗಮನಿಸಿದಾಗ ಚೀನಿಯರು ತಮ್ಮ ಸೇನೆಯನ್ನು ಹಿಂಪಡೆಯುವುದಾಗಲಿ ಅಥವಾ ಏಪ್ರಿಲ್​ನಲ್ಲಿದ್ದಂತೆ ಯಥಾಸ್ಥಿತಿ ಕಾಯ್ದುಕೊಳ್ಳುವ ಉದ್ದೇಶ ಇದ್ದಂತಿಲ್ಲ ಎಂಬುದು ಸ್ಪಷ್ಟವಾಗುತ್ತದೆ ಎಂದು ಮತ್ತೊಬ್ಬ ಅಧಿಕಾರಿ ಹೇಳಿದ್ದಾರೆ.

ಈ ಭಾಗದಲ್ಲಿ ಭಾರತೀಯ ಸೇನಾಪಡೆ ಕೂಡ ಸಾಕಷ್ಟು ಸಂಖ್ಯೆಯ ಯೋಧರನ್ನು ನಿಯೋಜಿಸಿದೆ. ಆದರೆ, ಸ್ಥಳೀಯ ಭೌಗೋಳಿಕ ಸಂರಚನೆಯಿಂದಾಗಿ ನೈಸರ್ಗಿಕ ಅಡಚಣೆಗಳು ಸಾಕಷ್ಟು ಇರುವುದರಿಂದ ಈ ಪ್ರದೇಶಕ್ಕೆ ಹೋಗಿಬರುವುದು ಅಷ್ಟು ಸುಲಭವಲ್ಲ. ಒಟ್ಟಾರೆ ಹೇಳುವುದಾದರೆ ನಮ್ಮ ಪಾಲಿಗೆ ಇದು ಅತ್ಯಂತ ಸವಾಲುದಾಯಕ ಪ್ರದೇಶ ಎಂದು ತಿಳಿಸಿದ್ದಾರೆ.

ಪ್ಯಾಂಗಾಂಗ್​ ತ್ಸೊ ಸರೋವರ ಮತ್ತು ಅದರ ಉತ್ತರ ದಡದ ಭಾಗದ ಬಗ್ಗೆ ಭಾರತ ಮತ್ತು ಚೀನಾದ ನಡುವೆ ಅನತಿ ಕಾಲದಿಂದಲೂ ವಿವಾದ ಇದೆ. ಚೀನಾದವರು ಫಿಂಗರ್​ 8ರ ಬಳಿ ಶಾಶ್ವತವಾದ ನೆಲೆಯನ್ನು ಕಲ್ಪಿಸಿಕೊಂಡಿದ್ದಾರೆ. ಇದೀಗ ಅವರು ಫಿಂಗರ್​ 4 ಭಾಗಕ್ಕೂ ಬಂದಿದ್ದು, ಪರ್ವತಶ್ರೇಣಿ ಹಾಗೂ ದಡದ ಸುತ್ತ ಶಾಶ್ವತ ಶಿಬಿರಗಳು, ಪಿಲ್​ಬಾಕ್ಸ್​ಗಳು, ಬಂಕರ್​ಗಳು ಮತ್ತಿತರ ಮೂಲಸೌಕರ್ಯಗಳನ್ನು ಕಲ್ಪಿಸಿಕೊಂಡಿದ್ದಾರೆ ಎಂದು ವಿವರಿಸಿದ್ದಾರೆ.

https://www.vijayavani.net/political-revolt-aganist-kp-oli-in-nepal/