ಪ್ರಧಾನಿ ಮೋದಿ ಭೇಟಿಗಾಗಿ ಬಾಕು ಚೆಸ್​ ಟೂರ್ನಿ ತಪ್ಪಿಸಿಕೊಂಡ ಗ್ರಾಂಡ್​ಮಾಸ್ಟರ್​ ವಿದಿತ್​!

ನವದೆಹಲಿ: ಚೆಸ್​ ಒಲಿಂಪಿಯಾಡ್​ ಸ್ವರ್ಣ ಪದಕ ವಿಜೇತ ತಂಡದ ಸದಸ್ಯ ವಿದಿತ್​ ಗುಜರಾತಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿಯಾಗುವ ವಿಶೇಷ ಅವಕಾಶಕ್ಕಾಗಿ ಅಜರ್​ಬೈಜಾನ್​ನ ಬಾಕುನಲ್ಲಿ ನಡೆಯಲಿರುವ 10ನೇ ವುಗರ್​ ಗಶಿಮೊವ್​ ಸ್ಮಾರಕ ಚೆಸ್​ ಸೂಪರ್​ ಟೂರ್ನಿಯನ್ನು ತಪ್ಪಿಸಿಕೊಂಡಿದ್ದಾರೆ.

ಕಳೆದ ವರ್ಷ ಈ ಟೂರ್ನಿಯಲ್ಲಿ ಪ್ರಶಸ್ತಿ ಗೆದ್ದಿದ್ದ ವಿದಿತ್​ ಈ ಬಾರಿ ಹಾಲಿ ಚಾಂಪಿಯನ್​ ಕಣಕ್ಕಿಳಿಯಬೇಕಾಗಿತ್ತು. ಸೆಪ್ಟೆಂಬರ್​ 25ರಿಂದ 30ರವರೆಗೆ ನಡೆಯಲಿರುವ ಟೂರ್ನಿಗಾಗಿ 29 ವರ್ಷದ ವಿದಿತ್​ ಹಂಗೆರಿಯ ಬುಡಾಪೆಸ್ಟ್​ನಲ್ಲಿ ಒಲಿಂಪಿಯಾಡ್​ ಆಡಿದ ಬಳಿಕ ಬಾಕುಗೆ ತೆರಳಿದ್ದರು. ಆದರೆ ಪ್ರಧಾನಿ ಮೋದಿ ಅವರು ಬುಧವಾರ ಭಾರತ ಚೆಸ್​ ತಂಡವನ್ನು ಭೇಟಿಯಾಗಿ ಸನ್ಮಾನಿಸಲಿದ್ದಾರೆ ಎಂಬ ವಿಷಯ ತಿಳಿದ ಕೂಡಲೆ ಅವರು ಅಲ್ಲಿಂದ ತವರಿಗೆ ಮರಳಿದರು.

ಈ ವಿಷಯವನ್ನು ಎಕ್ಸ್​ನಲ್ಲಿ ಹಂಚಿಕೊಂಡಿರುವ ಮಹಾರಾಷ್ಟ್ರದ ವಿದಿತ್​, "ಪ್ರಧಾನಿಯವರು ನಮ್ಮ ಗೆಲುವಿನ ಬಳಿಕ ಇಷ್ಟು ಕಡಿಮೆ ಅಂತರದಲ್ಲಿ ನಮ್ಮನ್ನು ಭೇಟಿಯಾಗಲು ಸಮಯ ನೀಡಿರುವುದನ್ನು ಕೇಳಿ ಅಪಾರ ಸಂತೋಷವಾಯಿತು. ನಾನು ಈ ವೇಳೆ ಕೂಡ ತಂಡದ ಭಾಗವಾಗಿರಲು ಬಯಸಿದೆ. ಸಂಟಕರು ನನ್ನ ಭಾವನೆಯನ್ನು ಅರಿತು ನನಗೆ ಟೂರ್ನಿಯಿಂದ ಹೊರಗುಳಿಯಲು ಅವಕಾಶ ಕಲ್ಪಿಸಿದರು' ಎಂದು ಹೇಳಿದ್ದಾರೆ. ವಿದಿತ್​ ಬದಲಿಗೆ ಭಾರತದ ಮತ್ತೋರ್ವ ಆಟಗಾರ ಅರವಿಂದ್​ ಚಿದಂಬರಂ ಟೂರ್ನಿಯಲ್ಲಿ ಆಡುವ ಅವಕಾಶ ಪಡೆದುಕೊಂಡಿದ್ದಾರೆ.

https://www.vijayavani.net/the-heat-of-protest-of-hindu-organizations-for-the-bengal-cricket-team-in-kanpur