ಹಂಪಿ ಉತ್ಸವದಲ್ಲಿ ಮಣ್ಣಿನ ಮಾತು..!

ಉತ್ಸವದ ಅಂಗವಾಗಿ ಮಾತಂಗ ಪರ್ವತ ಮೈದಾನದಲ್ಲಿ ಆಯೋಜಿಸಿರುವ ಸುಗ್ಗಿ ಸಂಭ್ರಮ ಹಾಗೂ ಕೃಷಿ ವಸ್ತು ಪ್ರದರ್ಶನ ನಾಡಿನ ರೈತರ ಬದುಕು ಅನಾವರಣಗೊಳಿಸಿತು. ಪಾರಂಪರಿಕ ಹಾಗೂ ಆಧುನಿಕ ಕೃಷಿ ಪದ್ಧತಿಗಳ ಸಂಯೋಗದೊಂದಿಗೆ ಸುಸ್ಥಿರ ಕೃಷಿ ಅಭಿವೃದ್ಧಿ ಸಾಧ್ಯತೆ ಸಾರಿತು.

ಸುಗ್ಗಿ ಸಂಭ್ರಮದಲ್ಲಿ ಸಂಕ್ರಾಂತಿ ಹಬ್ಬ, ರಾಶಿಪೂಜೆ, ಬೀಜಗಳ ಒಕ್ಕಣೆ ಮಾಡುತ್ತ ಹಾಗೂ ಒಳಕಲ್ಲಿನಲ್ಲಿ ಧಾನ್ಯ ಬೀಸುತ್ತ ಜನಪದ ಗೀತೆ ಹಾಡುವ ಗ್ರಾಮೀಣ ಮಹಿಳೆಯರು, ಎತ್ತಿನ ಬಂಡಿ ಹಳ್ಳಿ ಸೊಗಡಿನ ಚಿತ್ರಣವನ್ನು ನೋಡುಗರ ಕಣ್ಣಿಗೆ ಕಟ್ಟಿಕೊಟ್ಟವು. 

ಈಗಿನ ತಲೆಮಾರಿನ ಮಕ್ಕಳಿಗೆ ಬೀಸುವ ಕಲ್ಲು, ಕವಣೆ, ಕೂರಿಗೆ, ಒಳಕಲ್ಲು, ಗಾಣ ಎಲ್ಲವೂ ಅಪರಿಚಿತವೇ. ಪ್ರದರ್ಶನಕ್ಕೆ ಬಂದ ಪಾಲಕರು ಮಕ್ಕಳಿಗೆ ಅವುಗಳ ಹೆಸರು ಹಾಗೂ ಬಳಕೆ ಬಗ್ಗೆ ಮಾಹಿತಿ ನೀಡುವ ಕೆಲಸ ಮಾಡಿದರು. ಜತೆಗೆ ಫೋಟೋ ಕ್ಲಿಕ್ಕಿಸಿಕೊಂಡು ಸಂಭ್ರಮಿಸಿದರು. ಈ ಸಂದರ್ಭದಲ್ಲಿ ಜಂಟಿ ಕೃಷಿ ನಿರ್ದೇಶಕ ಬಿ.ಟಿ.ಮಂಜುನಾಥ, ಉಪ ಕೃಷಿ ನಿರ್ದೇಶಕ ಡಾ.ನಹೀಂಪಾಷ, ಸಹಾಯಕ ನಿರ್ದೇಶಕರಾದ ಮನೋಜ್ ಗೌಡ, ಎಸ್.ಪಿ.ಪಾಟೀಲ್, ವಿ.ಸಿ.ಉಮೇಶ್ ಇತರರಿದ್ದರು.

ದೇಸಿ ಪಾರಂಪರಿಕ ಕೃಷಿ ಉತ್ಪನ್ನಗಳು ರೈತರ ಜೀವನ ತೆರೆದಿಟ್ಟವು. ಕುಲಾಂತರಿ ಹಾಗೂ ವಿದೇಶಿ ಬೀಜಗಳ ನಡುವೆಯೂ ಜವಾರಿ ಹಾಗೂ ನಾಟಿ ಬೀಜ ಸಂಪತ್ತು, ಜೀವ ಹಾಗೂ ಸಸ್ಯ ವೈವಿಧ್ಯ ಕಾಪಾಡುವ ಮಹತ್ವ ಸಾರುವಂತೆ ಪ್ರದರ್ಶಿಸುವುದರ ಜತೆಗೆ ಮಾಹಿತಿ ಒದಗಿಸುವ ಮೂಲಕ ಇಲಾಖೆ ಆಗಿನ ರೈತರೇ ನೈಜ ಕೃಷಿ ವಿಜ್ಞಾನಿಗಳು ಎಂಬುದನ್ನು ಒಪ್ಪಿಕೊಂಡಂತೆ ಕಾಣಿಸಿತು.

ಸಿರಿ ಧಾನ್ಯದಲ್ಲಿ ಮೂಡಿಬಂದ ಗಣಪತಿ.

ಸಿರಿ ಧಾನ್ಯದಲ್ಲಿ ಮೂಡಿಬಂದ ಗಣಪತಿ.

ಸರ್ವ ವಿಘ್ನಗಳ ನಿವಾರಕ ವಿಘ್ನೇಶ್ವರನನ್ನು ಕಿರುಧಾನ್ಯಗಳಲ್ಲಿ ಚಿತ್ರಿಸಿದ್ದು ಗಮನ ಸೆಳೆಯಿತು. ಧಾನ್ಯಗಳಲ್ಲಿ ಗಣಪನನ್ನು ನೈಜವಾಗಿ ಮೂಡಿಸಿದ್ದು ಕಲಾವಿದನ ಕೈಚಳಕ ಕಂಡು ಜನರು ಬೆರಗಾದರು. ಜತೆಗೆ ಕೆ.ಎಸ್.ಡಿ.ಎ. ಲಾಂಛನ ಹಾಗೂ ನಂದಿಯೂ ಧಾನ್ಯಗಳಲ್ಲಿ ಮೂಡಿಬಂದಿದ್ದು ಚಿತ್ತ ಸೆಳೆದವು.

ಇದರೊಟ್ಟಿಗೆ ಕೃಷಿ ಇಲಾಖೆ ಯೋಜನೆಗಳ ಮಾಹಿತಿ, ಕೃಷಿ ಚಟುವಟಿಕೆ ಪರಿಕರಗಳು, ಆಧುನಿಕ ಕೃಷಿ ಬಳಕೆ ಯಂತ್ರ, ದ್ರೋನ್, ಟ್ರಾಕ್ಟರ್, ಸಮಗ್ರ ಕೃಷಿ ಪದ್ಧತಿ ತಿಳಿಸುವ ಕೃಷಿ ಬ್ರಹ್ಮಾಂಡ, ರೇಷ್ಮೆ ಕೃಷಿ, ಸಿರಿಧಾನ್ಯ ಖಾದ್ಯಗಳ ಹಾಗೂ ಸಾವಯವ ಕೃಷಿ ಉತ್ಪನ್ನ ಮಾರಾಟ ಕಂಡುಬಂದವು.