ಆರ್​ಸಿಬಿಯ ಡೇಂಜರಸ್​ ಬೌಲರ್​ ಚೆಂಡನ್ನು ಎದುರಿಸಲಾಗದೇ ಪರದಾಡಿ ಕ್ಲೀನ್​ ಬೋಲ್ಡ್​ ಆದ ಕೊಹ್ಲಿ! ವಿಡಿಯೋ ವೈರಲ್​... Virat Kohli

Virat Kohli : ಮತ್ತೊಂದು ಕ್ರಿಕೆಟ್​ ಹಬ್ಬಕ್ಕೆ ಭಾರತ ರೆಡಿಯಾಗುತ್ತಿದೆ. ಕೆಲವು ದಿನಗಳ ಹಿಂದಷ್ಟೇ ಟಿ20 ವಿಶ್ವಕಪ್​ ಮೆಗಾ ಟೂರ್ನಿ ಮುಕ್ತಾಯಗೊಂಡಿತು. ಆತಿಥೇಯ ಭಾರತ ಪ್ರತಿಷ್ಠಿತ ಟ್ರೋಫಿಯನ್ನು ಎತ್ತಿಹಿಡಿಯುವ ಮೂಲಕ ಇತಿಹಾಸ ಬರೆಯಿತು. ಇದೀಗ, ಕ್ರೀಡಾಪ್ರೇಮಿಗಳ ಕಣ್ಣು ಕ್ಯಾಶ್​ ರಿಚ್​ ಲೀಗ್​ ಐಪಿಎಲ್ ಮೇಲೆ ಬಿದ್ದಿದೆ. ಮಾರ್ಚ್​​ 28ರಿಂದ ಆರಂಭವಾಗಲಿದ್ದು ದಿನಗಣನೆ ಆರಂಭವಾಗಿದೆ.

ಈ ಟೂರ್ನಿಯಲ್ಲಿ ಭಾಗವಹಿಸುವ 10 ತಂಡಗಳು ಸಿದ್ಧತೆಯಲ್ಲಿ ತೊಡಗಿವೆ. ಎಲ್ಲ ಆಟಗಾರರು ಆಯಾ ತಂಡಗಳನ್ನು ಸೇರಿಕೊಂಡಿದ್ದು, ಕಠಿಣ ತರಬೇತಿಯಲ್ಲಿ ತೊಡಗಿವೆ. ಹಾಲಿ ಚಾಂಪಿಯನ್​ ಆಗಿ ಕಣಕ್ಕಿಳಿಯುವ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು (RCB) ತಂಡ, ಮತ್ತೊಮ್ಮೆ ಟ್ರೋಫಿ ಗೆಲ್ಲುವ ಭರವಸೆ ಹೊಂದಿದೆ. ಹೀಗಾಗಿ, ಸ್ಟಾರ್​ ಆಟಗಾರರಾದ ವಿರಾಟ್​ ಕೊಹ್ಲಿ, ವೆಂಕಟೇಶ್​ ಅಯ್ಯರ್​, ಫಿಲ್​ ಸಾಲ್ಟ್​, ಕೃನಾಲ್​ ಪಾಂಡ್ಯ, ಭುವನೇಶ್ವರ್​ ಕುಮಾರ್​ ಮತ್ತು ನಾಯಕ ರಜತ್​ ಪಾಟಿದಾರ್​ ಸೇರಿದಂತೆ ಎಲ್ಲ ಆಟಗಾರರು ನೆಟ್​ನಲ್ಲಿ ಬೆವರಿಳಿಸುತ್ತಿದ್ದಾರೆ.

ಆರ್​ಸಿಬಿ ತಂಡಕ್ಕೆ ಈ ಬಾರಿ ಬೌಲಿಂಗ್​ ಕೊರತೆ ಎದುರಾಗುವ ಸಾಧ್ಯತೆ ಇದೆ. ಏಕೆಂದರೆ, ಆಸ್ಟ್ರೇಲಿಯಾದ ಸ್ಟಾರ್​ ಬೌಲರ್​ ಜೋಶ್​ ಹ್ಯಾಜಲ್​ವುಡ್​ ಮೊದಲ ಒಂದಿಷ್ಟು ಪಂದ್ಯಗಳಿಗೆ ಅಲಭ್ಯರಾಗಲಿದ್ದಾರೆ. ಅಲ್ಲದೆ, ತಂಡದ ಎಡಗೈ ಹಾಗೂ ನಿರ್ಣಾಯಕ ಬೌಲರ್​ ಎನಿಸಿಕೊಂಡಿರುವ ಯಶ್​ ದಯಾಳ್​, ಈ ಸೀಸನ್​ನಲ್ಲಿ ತಂಡದ ಭಾಗವಾಗುತ್ತಾರಾ? ಇಲ್ಲವಾ? ಅನ್ನೋದು ಕೂಡ ಅನಿಶ್ಚಿತತೆಯಲ್ಲಿದೆ. ಹೀಗಾಗಿ, ಆರ್​ಸಿಬಿ ತಂಡ ಭಾರತದ ಅನುಭವಿ ಸ್ವಿಂಗ್​ ಮಾಸ್ಟರ್​ ಭುವನೇಶ್ವರ್​ ಕುಮಾರ್​ ಅವರ ಮೇಲೆ ಅವಲಂಬಿತವಾಗಿದೆ. ಆ ಜವಾಬ್ದಾರಿಯನ್ನು ನಿಭಾಯಿಸುವ ಸಾಮರ್ಥ್ಯ 36 ವರ್ಷದ ಭುವನೇಶ್ವರ್ ಅವರಿಗಿದೆ ಎಂದರೆ ತಪ್ಪಾಗಲಾರದು.​ ಅದಕ್ಕೆ ತಕ್ಕಂತೆ ಕಠಿಣ ತರಬೇತಿಯಲ್ಲಿ ತೊಡಗಿರುವ ಭುವನೇಶ್ವರ್​, ಇತ್ತೀಚೆಗೆ ತಮ್ಮ ಖಡಕ್​ ಯಾರ್ಕರ್​ ಬೌಲಿಂಗ್​ ಮೂಲಕ ದಾಖಲೆಗಳ ಸರದಾರ, ರನ್​ ಮೆಷಿನ್​ ಹಾಗೂ ಚೇಸ್​ ಮಾಸ್ಟರ್​ ವಿರಾಟ್​ ಕೊಹ್ಲಿಯನ್ನು ಕ್ಲೀನ್​ ಬೋಲ್ಡ್​ ಮಾಡುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​​ ಆಗುತ್ತಿದೆ.

ವೈರಲ್​ ಆಗಿರುವ ವಿಡಿಯೋದಲ್ಲಿ ಭುವನೇಶ್ವರ್​ ಕುಮಾರ್​ ಅವರು ಕೊಹ್ಲಿಯ ಕಾಲು ಮತ್ತು ಸ್ಟಂಪ್​ಗಳತ್ತ ಕರಾರುವೊಕ್ಕಾದ ಯಾರ್ಕರ್​ ದಾಳಿ ಮಾಡುತ್ತಾರೆ. ಈ ಬಾಲ್​ನಿಂದ ತಮ್ಮ ನಿಯಂತ್ರಣ ಕಳೆದುಕೊಳ್ಳುವ ಕೊಹ್ಲಿ, ಕ್ಲೀನ್​ ಬೋಲ್ಡ್​ ಆಗುತ್ತಾರೆ. ಇದನ್ನು ನೋಡಿದ ನೆಟ್ಟಿಗರು, ಭುವಿ ಬೌಲಿಂಗ್​ ಫಿದಾ ಆಗಿದ್ದಾರೆ. ಈ ಬಾರಿಯೂ ಭುವಿಯಿಂದ ಸಖತ್​ ಬೌಲಿಂಗ್​ ಫಾರ್ಮ್​ ನಿರೀಕ್ಷೆ ಮಾಡಬಹುದು ಎಂದು ಆರ್​ಸಿಬಿ ಅಭಿಮಾನಿಗಳು ಮಾತನಾಡಿಕೊಳ್ಳುತ್ತಿದ್ದಾರೆ.

ಅಂದಹಾಗೆ, ಕೊಹ್ಲಿ ಮತ್ತು ಭುವಿ 2025ರಲ್ಲಿ ನಡೆದ 18ನೇ ಆವೃತ್ತಿಯ ಐಪಿಎಲ್​ನಲ್ಲಿ ಆರ್​ಸಿಬಿ ತಂಡ ತಮ್ಮ ಚೊಚ್ಚಲ ಟ್ರೋಫಿ ಎತ್ತಿಹಿಡಿಯುವಲ್ಲಿ ಪ್ರಮುಖ ಪಾತ್ರ ವಹಿಸಿದರು. 15 ಇನ್ನಿಂಗ್ಸ್​ ಆಡಿದ ಕೊಹ್ಲಿ 657 ರನ್​ ಗಳಿಸುವ ಮೂಲಕ ತಂಡದ ಗರಿಷ್ಠ ಸ್ಕೋರರ್​​ ಎನಿಸಿಕೊಂಡರು. ಮತ್ತೊಂದೆಡೆ ಭುವಿ, 14 ಪಂದ್ಯಗಳಿಂದ 17 ವಿಕೆಟ್​ಗಳನ್ನು ಪಡೆಯುವ ಮೂಲಕ ಅದ್ಭುತ ಬೌಲಿಂಗ್​ ಪ್ರದರ್ಶನ ನೀಡಿದರು.

2025ರ ಐಪಿಎಲ್ ಮೆಗಾ ಹರಾಜಿನಲ್ಲಿ 10.75 ಕೋಟಿ ರೂ.ಗಳಿಗೆ ಆರ್​ಸಿಬಿ ತಂಡ ಸೇರಿಕೊಂಡ ಭುವನೇಶ್ವರ್, ಮಾರ್ಚ್​ 28ರಿಂದ ಆರಂಭವಾಗಲಿರುವ 19ನೇ ಸೀಸನ್​ಗೆ ಆರ್‌ಸಿಬಿಯ ಯುವ ವೇಗಿಗಳಿಗೆ ಮಾರ್ಗದರ್ಶಕನ ಪಾತ್ರ ವಹಿಸಬೇಕಾಗಬಹುದು. ರಸಿಕ್ ಸಲಾಂ ದಾರ್ (6 ಕೋಟಿ ರೂ. ) ಅವರು ಫ್ರಾಂಚೈಸಿಗೆ ಆರಂಭಿಕ ಬೌಲರ್​ ಆಗಿ ರೂಪುಗೊಳ್ಳುವ ಭರವಸೆಯಲ್ಲಿದ್ದಾರೆ. ಅದೇ ಸಮಯದಲ್ಲಿ ಅಭಿಮಾನಿಗಳು ಎಡಗೈ ವೇಗಿ ಮಂಗೇಶ್ ಯಾದವ್ (5.20 ಕೋಟಿ ರೂ.) ಮೇಲೆಯೂ ಕಣ್ಣಿಟ್ಟಿದ್ದಾರೆ, (ಏಜೆನ್ಸೀಸ್​).