ಮೌನವಾಗಿ ಚಪ್ಪಾಳೆ ತಟ್ಟುವುದಷ್ಟೇ ಸಾಧ್ಯವಿತ್ತು...ಪತ್ನಿ ಹೇಳಿದ ಆ ಮಾತು ನೆನೆದು ಭಾವುಕರಾದ ಸಂಜು ಸ್ಯಾಮ್ಸನ್​! Sanju Samson

Sanju Samson : ಎರಡು ತಿಂಗಳ ಹಿಂದಷ್ಟೇ ಮುಕ್ತಾಯಗೊಂಡ 2026ರ ಟಿ20 ವಿಶ್ವಕಪ್‌ಗಾಗಿ ಆಯ್ಕೆಯಾದ ಭಾರತ ತಂಡದ ಅಂತಿಮ 11ರ ಬಳಗದಲ್ಲಿ ಆರಂಭದಲ್ಲಿ ಸ್ಥಾನ ಸಿಗದೇ ಇದ್ದಿದ್ದಕ್ಕೆ ವಿಕೆಟ್‌ಕೀಪರ್-ಬ್ಯಾಟರ್ ಸಂಜು ಸ್ಯಾಮ್ಸನ್ ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ. ನ್ಯೂಜಿಲೆಂಡ್ ವಿರುದ್ಧದ ಕ್ರಿಕೆಟ್ ಸರಣಿಯಲ್ಲಿ ತಾವು ತೋರಿದ ಕಳಪೆ ಫಾರ್ಮ್ ಹಾಗೂ ತದನಂತರದ ಪಂದ್ಯಗಳಲ್ಲಿ ಮತ್ತೊಬ್ಬ ವಿಕೆಟ್‌ಕೀಪರ್ ಈಶಾನ್ ಕಿಶನ್ ನೀಡಿದ ಅತ್ಯುತ್ತಮ ಪ್ರದರ್ಶನವೇ ತಾವು ಪ್ಲೇಯಿಂಗ್ 11 ನಿಂದ ಹೊರಗುಳಿಯಲು ಪ್ರಮುಖ ಕಾರಣ ಎಂದು ಸಂಜು ಮುಕ್ತವಾಗಿ ಒಪ್ಪಿಕೊಂಡಿದ್ದಾರೆ. ಜಿಯೋಸ್ಟಾರ್‌ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಸಂಜು ಅವರು ತಮ್ಮ ಮನದ ಮಾತನ್ನು ಹಂಚಿಕೊಂಡಿದ್ದಾರೆ.

ನ್ಯೂಜಿಲೆಂಡ್ ವಿರುದ್ಧದ ಸರಣಿಯ ನಂತರ ತಂಡಕ್ಕೆ ಮರಳಿದ ಈಶಾನ್ ಕಿಶನ್ ಅವರ ಬೆಳವಣಿಗೆಯೇ ಸಂಪೂರ್ಣವಾಗಿ ಬೇರೆಯಾಗಿತ್ತು. ಆರಂಭಿಕ ಹಂತದಲ್ಲಿ ಭಾರತ ತಂಡದಲ್ಲೇ ಇಲ್ಲದ ಈಶಾನ್, ದೇಶೀಯ ಕ್ರಿಕೆಟ್‌ನಲ್ಲಿ ಜಾರ್ಖಂಡ್ ತಂಡವನ್ನು ಏಕಾಂಗಿಯಾಗಿ ಮುನ್ನಡೆಸಿ ಸೈಯದ್ ಮುಷ್ತಾಕ್ ಅಲಿ ಟ್ರೋಫಿ ಗೆಲ್ಲಿಸಿಕೊಟ್ಟರು. ತದನಂತರ ಭಾರತೀಯ ಕ್ರಿಕೆಟ್ ತಂಡದಲ್ಲಿ ಸಿಕ್ಕ ಅವಕಾಶಗಳಲ್ಲೆಲ್ಲಾ ಅವರು ಅದ್ಭುತವಾಗಿ ಬ್ಯಾಟ್ ಬೀಸಿದರು. ಈ ಮೂಲಕ ತಂಡದಲ್ಲಿದ್ದ ತಮ್ಮ ಸ್ಥಾನಕ್ಕಿಂತಲೂ ಈಶಾನ್ ಸ್ಪಷ್ಟವಾಗಿ ಮೇಲೇರುತ್ತಿದ್ದುದನ್ನು ತಾವು ಸ್ವತಃ ಗಮನಿಸಿದ್ದಾಗಿ ಸಂಜು ವಿವರಿಸಿದ್ದಾರೆ.

ನ್ಯೂಜಿಲೆಂಡ್ ವಿರುದ್ಧದ ಐದು ಪಂದ್ಯಗಳ ಸರಣಿಯಲ್ಲಿ ಸಂಜು ಸ್ಯಾಮ್ಸನ್ ಕ್ರಮವಾಗಿ 24, 6, 6, 10 ಮತ್ತು 0 ರನ್ ಗಳಿಸಲಷ್ಟೇ ಶಕ್ತರಾಗಿದ್ದರು. ಈ ಕಳಪೆ ಫಾರ್ಮ್ ಅವರ ವಿಶ್ವಕಪ್ ಕನಸಿಗೆ ದೊಡ್ಡ ಹಿನ್ನಡೆಯಾಯಿತು. ಸರಣಿಯಲ್ಲಿ ಅವರ ಗರಿಷ್ಠ ಮೊತ್ತವೇ 24 ರನ್ ಆಗಿದ್ದಾಗ, ಬದಲಿಯಾಗಿ ಬಂದ ಆಟಗಾರ ತಕ್ಷಣವೇ 70 ರನ್ ಮತ್ತು ನಂತರ ಭರ್ಜರಿ ಶತಕ ಸಿಡಿಸಿ ಮಿಂಚಿದರು. ಇಂತಹ ಸನ್ನಿವೇಶದಲ್ಲಿ ಯಾವುದೇ ತಂಡದ ಮ್ಯಾನೇಜ್‌ಮೆಂಟ್ ಆದರೂ ಅತ್ಯುತ್ತಮ ಫಾರ್ಮ್‌ನಲ್ಲಿರುವ ಆಟಗಾರನನ್ನೇ ಆಯ್ಕೆ ಮಾಡುತ್ತದೆ ಎಂಬುದು ಸ್ಪಷ್ಟವಾಗಿದ್ದರಿಂದ, ತಾವು ವಿಶ್ವಕಪ್ ಅವಕಾಶ ತಪ್ಪಿಸಿಕೊಂಡಿರುವುದನ್ನು ಸಂಜು ಮುಂಚಿತವಾಗಿಯೇ ಅರಿತಿದ್ದರು. ಇದರಿಂದ ತೀವ್ರ ಬೇಸರವಾದರೂ, ಮೌನವಾಗಿ ಚಪ್ಪಾಳೆ ತಟ್ಟುವುದಷ್ಟೇ ತಮಗೆ ಸಾಧ್ಯವಿತ್ತು ಎಂದಿದ್ದಾರೆ.

ಭಾರತೀಯ ಕ್ರಿಕೆಟ್‌ನಲ್ಲಿ ಒಂದೇ ಒಂದು ದಿನದಲ್ಲಿ ಎಲ್ಲವೂ ಬದಲಾಗಿಹೋಗುತ್ತದೆ ಎಂಬುದನ್ನು ಸಂಜು ಒತ್ತಿಹೇಳಿದ್ದಾರೆ. ತಾವು ಶತಕಗಳನ್ನು ಬಾರಿಸಿದಾಗ ಹಲವರು ತಂಡದಲ್ಲಿ ತಮ್ಮ ಸ್ಥಾನ ಭದ್ರವಾಗಿದೆ ಎಂದು ಹೇಳಿದ್ದರೂ, ತಾವು ಅದನ್ನು ಸಂಪೂರ್ಣವಾಗಿ ನಂಬಿರಲಿಲ್ಲ. ತದನಂತರ ಬಂದ ನ್ಯೂಜಿಲೆಂಡ್ ಸರಣಿಯಲ್ಲಿ ವಿಶ್ವಕಪ್ ದೃಷ್ಟಿಯಲ್ಲಿಟ್ಟುಕೊಂಡು ಕಠಿಣ ತರಬೇತಿ ನಡೆಸಿದ್ದರೂ ಉತ್ತಮ ಪ್ರದರ್ಶನ ನೀಡಲು ಸಾಧ್ಯವಾಗಲಿಲ್ಲ. ತಾವು ಅತಿಯಾಗಿ ಶ್ರಮಿಸಲು ಯತ್ನಿಸುತ್ತಿದ್ದುದೇ ಇದಕ್ಕೆ ಕಾರಣ ಎಂಬುದು ಆ ಸರಣಿಯ ನಂತರ ಅವರಿಗೆ ಅರಿವಾಯಿತು.

ಗಂಟೆಗಟ್ಟಲೆ ನೆಟ್ಸ್‌ನಲ್ಲಿ ಅಭ್ಯಾಸ ಮಾಡುವುದಕ್ಕಿಂತ ನಿರಂತರ ಸಂತೋಷ ಮತ್ತು ಮನಶ್ಶಾಂತಿಯಿಂದ ಇರುವುದು ಅತ್ಯಂತ ಮುಖ್ಯ ಎಂಬ ತಮ್ಮ ಹೆಂಡತಿಯ ಮಾತು ಎಷ್ಟು ಸತ್ಯ ಎಂಬುದು ಈ ನ್ಯೂಜಿಲೆಂಡ್ ಸರಣಿಯ ಸೋಲಿನ ನಂತರ ತಮಗೆ ಸ್ಪಷ್ಟವಾಗಿ ಅರ್ಥವಾಯಿತು ಎಂದು ಸಂಜು ಸ್ಯಾಮ್ಸನ್ ತಮ್ಮ ಭಾವನೆಗಳನ್ನು ಹಂಚಿಕೊಂಡಿದ್ದಾರೆ, (ಏಜೆನ್ಸೀಸ್​).