ಇದೇ ನೋಡಿ RCBಯ ಬೆಸ್ಟ್​ ಪ್ಲೇಯಿಂಗ್​ ಇಲೆವೆನ್​: ಇದೇ ತಂಡ ಆಡಿದ್ರೆ ಈ ಸಲವೂ ಕಪ್​ ನಮ್ದೇ​!

RCB : ಕ್ರಿಕೆಟ್ ಅಭಿಮಾನಿಗಳು ಬಹಳ ಕುತೂಹಲದಿಂದ ಎದುರು ನೋಡುತ್ತಿದ್ದ ಬಹುನಿರೀಕ್ಷಿತ ಐಪಿಎಲ್​ ಮಿನಿ ಹರಾಜಿಗೆ ಮಂಗಳವಾರ (ಡಿ.16) ತೆರೆಬಿದ್ದಿದೆ. ಅಬುಧಾಬಿಯಲ್ಲಿ ನಡೆದ ಈ ಮೆಗಾ ಈವೆಂಟ್​ನಲ್ಲಿ ಎಲ್ಲ 10 ತಂಡಗಳು ತಮಗೆ ಬೇಕಾದ ಆಟಗಾರರನ್ನು ಖರೀದಿ ಮಾಡಿವೆ. ಹಾಲಿ ಚಾಂಪಿಯನ್​ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ( RCB ) ತಂಡ ಬಹಳ ಚಾಣಕ್ಷತೆಯಿಂದ ಉತ್ತಮ ಆಟಗಾರರನ್ನು ಆಯ್ಕೆ ಮಾಡಿದ್ದು, ತಮ್ಮ ತಂಡವನ್ನು ಮತ್ತಷ್ಟು ಬಲಿಷ್ಠ ಮಾಡಿಕೊಂಡಿದೆ.

2024ರ ಐಪಿಎಲ್​ನಲ್ಲಿ ಕೆಕೆಆರ್​ ತಂಡ ಚಾಂಪಿಯನ್​ ಪಟ್ಟ ಅಲಂಕರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ ಆಲ್​ರೌಂಡರ್​ ವೆಂಕಟೇಶ್​ ಅಯ್ಯರ್ ಅವರನ್ನು ಆರ್​ಸಿಬಿ 7 ಕೋಟಿ ರೂ. ಕೊಟ್ಟು ಖರೀದಿ ಮಾಡಿದೆ. ಅದೇ ರೀತಿ ಯಾರಿಗೂ ಅಷ್ಟಾಗಿ ಪರಿಚಿತವಲ್ಲದ ಮಧ್ಯಪ್ರದೇಶದ ಪ್ರತಿಭಾವಂತ ಕ್ರಿಕೆಟಿಗ ಮಂಗೇಶ್​ ಯಾದವ್​ ಅವರಿಗೆ 5 ಕೋಟಿಗೂ ಅಧಿಕ ಹಣ ನೀಡಿ ಆರ್​ಸಿಬಿ ತನ್ನ ತೆಕ್ಕೆಗೆ ಹಾಕಿಕೊಂಡಿದೆ. ಮಂಗೇಶ್​ ಕೂಡ ಅತ್ಯುತ್ತಮ ಆಲ್​ರೌಂಡರ್​. ಈ ಮೂಲಕ ಆರ್​ಸಿಬಿ ಬಲಿಷ್ಠ ತಂಡವನ್ನು ಕಟ್ಟಿದೆ.

ಇಲ್ಲಿ ಗಮನಿಸಬೇಕಾದ ಸಂಗತಿ ಏನೆಂದರೆ, ಆರ್​ಸಿಬಿ ಸ್ಟಾರ್​ ಬೌಲರ್​ ಯಶ್ ದಯಾಳ್ ಅವರ ಲಭ್ಯತೆ ಕೂಡ ಅನಿಶ್ಚಿತವಾಗಿದೆ. ಏಕೆಂದರೆ, ಐಪಿಎಲ್ 2025ರ ನಂತರ ಯಾವುದೇ ಸ್ಪರ್ಧಾತ್ಮಕ ಕ್ರಿಕೆಟ್ ಆಡಿಲ್ಲ. ಹೀಗಾಗಿ, ಅವರಿಗೆ ಬ್ಯಾಕಪ್​ ಆಗಿ ಮಂಗೇಶ್​ ಯಾದವ್​ ಅವರನ್ನು ಆರ್​ಸಿಬಿ ಖರೀದಿಸಿದೆ. ಅದೇ ರೀತಿ 2025ರಲ್ಲಿ ಆರ್​ಸಿಬಿ ಟ್ರೋಫಿ ಗೆಲ್ಲುವಲ್ಲಿ ಪ್ರಮುಖ ಪಾತ್ರ ವಹಿಸಿದ ಜೋಶ್​ ಹ್ಯಾಸಲ್​ವುಡ್​ ಕೂಡ ಗಾಯದ ಸಮಸ್ಯೆಯಿಂದ ಕೈಕೊಟ್ಟರೆ ಅವರಿಗೆ ಬ್ಯಾಕಪ್​ ಆಗಿ, ಸ್ಟಾರ್​ ಬೌಲರ್​ ಜೇಕಪ್​ ಡಫೀ ಅವರನ್ನು ಆರ್​ಸಿಬಿ ಖರೀದಿ ಮಾಡಿದೆ. ಹೀಗಾಗಿ, ಮತ್ತೊಮ್ಮೆ ಟ್ರೋಫಿ ಗೆಲ್ಲುವ ಕನಸಿನೊಂದಿಗೆ ಆರ್​ಸಿಬಿ ಬಲಿಷ್ಠ ತಂಡವನ್ನೇ ಕಟ್ಟಿದೆ.

ಅಂದಹಾಗೆ, ಮಿನಿ ಹರಾಜಿನ ಬಳಿಕ ಆರ್​ಸಿಬಿ ಅತ್ಯುತ್ತಮ ಪ್ಲೇಯಿಂಗ್ XI ಅನ್ನು ಹೊಂದಿದೆ. ಫಿಲ್ ಸಾಲ್ಟ್ ಮತ್ತು ವಿರಾಟ್ ಕೊಹ್ಲಿ ಆರಂಭದಲ್ಲಿ ಸ್ಫೋಟಕ ಆಟದೊಂದಿಗೆ ಉತ್ತಮ ಆರಂಭ ಒದಗಿಸಿದರೆ. ರಜತ್ ಪಾಟಿದಾರ್ ಪ್ರಬಲ ಮಧ್ಯಮ ಕ್ರಮಾಂಕವನ್ನು ಮುನ್ನಡೆಸಲಿದ್ದಾರೆ. ಟಿಮ್ ಡೇವಿಡ್ ಮತ್ತು ಜಿತೇಶ್ ಶರ್ಮ ಅವರಂತಹ ಫಿನಿಶರ್‌ಗಳು ಡೆತ್-ಓವರ್‌ಗಳ ಸಮಸ್ಯೆಯನ್ನು ನೀಗಿಸಲಿದ್ದಾರೆ. ಕೃನಾಲ್ ಪಾಂಡ್ಯ ಮತ್ತು ರೊಮಾರಿಯೊ ಶೆಫರ್ಡ್ ಆಲ್‌ರೌಂಡ್ ಮೌಲ್ಯವನ್ನು ತಂಡಕ್ಕೆ ಸೇರಿಸಿದ್ದಾರೆ. ಭುವನೇಶ್ವರ್ ಕುಮಾರ್ ಮತ್ತು ಜೋಶ್ ಹ್ಯಾಜಲ್‌ವುಡ್ ನೇತೃತ್ವದ ಅನುಭವಿ ವೇಗದ ದಾಳಿಯು ಮತ್ತೊಮ್ಮೆ ಆರ್​ಸಿಬಿಗೆ ಪ್ರಶಸ್ತಿಯ ಆಸೆಯನ್ನು ಬಲಪಡಿಸುತ್ತದೆ.

ಅಂದಹಾಗೆ, ಫಿಲ್ ಸಾಲ್ಟ್ ಅವರ ಆಕ್ರಮಣಕಾರಿ ಆಟದಿಂದಾಗಿ ಪವರ್‌ಪ್ಲೇನಲ್ಲಿ ಆರ್‌ಸಿಬಿಗೆ ರನ್​ ಗಳಿಸುವಲ್ಲಿ ತ್ವರಿತ ವೇಗವನ್ನು ನೀಡುತ್ತಾರೆ. ಇನ್ನೊಂದೆಡೆ ವಿರಾಟ್ ಕೊಹ್ಲಿಯ ಉಪಸ್ಥಿತಿ ತಂಡಕ್ಕೆ ಸ್ಥಿರತೆ ಮತ್ತು ಹೋರಾಟದ ಮನೋಧರ್ಮವನ್ನು ಖಾತ್ರಿಪಡಿಸುತ್ತದೆ. ಈ ಇಬ್ಬರು ಉತ್ತಮ ಆರಂಭ ಒದಗಿಸಿದರೆ, ಅದನ್ನೇ ಆಧಾರವಾಗಿಟ್ಟುಕೊಂಡು ಇತರೆ ಆಟಗಾರರು ಬ್ಯಾಟಿಂಗ್​ನಲ್ಲಿ ದಾಳಿ ಮಾಡಲು ಅನುವು ಮಾಡಿಕೊಡುತ್ತದೆ.

ಇದೀಗ ತಂಡಕ್ಕೆ ಸೇರ್ಪಡೆಯಾಗಿರುವ ವೆಂಕಟೇಶ್ ಅಯ್ಯರ್, ತಮ್ಮ ಎಡಗೈ ಬ್ಯಾಟಿಂಗ್​ ಹಾಗೂ ಅರೆಕಾಲಿಕ ಬೌಲಿಂಗ್ ಮತ್ತು ನಿರ್ಭೀತಿ ಆಟದೊಂದಿಗೆ ಅಗ್ರ ಕ್ರಮಾಂಕವನ್ನು ಇನ್ನಷ್ಟು ಬಲಪಡಿಸುತ್ತಾರೆ. ಅದರಲ್ಲಿ ಸ್ಪಿನ್ನರ್​ಗಳಿಗೆ ಅಯ್ಯರ್​ ಪ್ರಮುಖ ಅಸ್ತ್ರವಾಗಲಿದ್ದಾರೆ. ಇನ್ನು ನಾಯಕ ರಜತ್ ಪಾಟಿದಾರ್ ಆರ್‌ಸಿಬಿಗೆ ಪ್ರಮುಖ ಆಧಾರ ಸ್ತಂಭವಾಗಿ ನಿಲ್ಲುತ್ತಾರೆ. ತಮ್ಮ ಶಾಂತ ನಾಯಕತ್ವ ಗುಣದಿಂದಾಗಿ ಬ್ಯಾಟಿಂಗ್​ನಲ್ಲೂ ಫಾರ್ಮ್ ಕಾಪಾಡಿಕೊಳ್ಳುತ್ತಾರೆ. ವಿಶೇಷವಾಗಿ ಸ್ಪಿನ್ ವಿರುದ್ಧ, ಮಧ್ಯಮ ಓವರ್‌ಗಳಲ್ಲಿ ರಜತ್​ ಆಟ ಮಜಬೂತಾಗಿರುತ್ತದೆ.

ಟಿಮ್ ಡೇವಿಡ್ ಅವರ ಸಿಕ್ಸ್ ಹೊಡೆಯುವ ಸಾಮರ್ಥ್ಯವು ಆರ್‌ಸಿಬಿಯ ಡೆತ್-ಓವರ್‌ಗಳ ವಿಧಾನವನ್ನೇ ಪರಿವರ್ತಿಸುತ್ತದೆ. ಅದರಲ್ಲೂ ಕೊನೆಯ ಐದು ಓವರ್‌ಗಳಲ್ಲಿ ಪಂದ್ಯ ಗತಿಯನ್ನೇ ತಿರುಗಿಸುವ ಸಾಮರ್ಥ್ಯವನ್ನು ಟಿಮ್​ ಡೇವಿಡ್​ ಹೊಂದಿದ್ದು, ಎದುರಾಳಿಗಳಿಗೆ ನಡುಕು ಹುಟ್ಟಿಸುತ್ತಾರೆ. ಇನ್ನು ಕೊನೆಯಲ್ಲಿ ಜಿತೇಶ್ ಶರ್ಮಾ ವೇಗವಾಗಿ ರನ್​ ಗಳಿಸುವ ಸಾಮರ್ಥ್ಯ ಮತ್ತು ವಿಕೆಟ್ ಕೀಪಿಂಗ್​ನಲ್ಲಿ ಅವರ ಚಾಣಾಕ್ಷತನ ತಂಡಕ್ಕೆ ವರದಾನವಾಗಲಿದೆ. ವಿಂಡೀಸ್​ ದಾಂಡಿಗ ರೊಮಾರಿಯೊ ಶೆಫರ್ಡ್ ತಂಡದ ಪ್ರಮುಖ ಶಕ್ತಿಯಾಗಿದ್ದಾರೆ. ಕೊನೆಯ ಹಂತದಲ್ಲಿ ಕೇವಲ ಎರಡು ಓವರ್​​ಗಳಲ್ಲಿ ಪಂದ್ಯದ ಫಲಿತಾಂಶವನ್ನೇ ಬದಲಿಸುವ ಸಾಮರ್ಥ್ಯ ಅವರಲ್ಲಿದೆ.

ಕೃನಾಲ್ ಪಾಂಡ್ಯ ಅವರ ಯುದ್ಧತಂತ್ರದ ಬೌಲಿಂಗ್, ನಾಯಕತ್ವದ ಅನುಭವ ಮತ್ತು ಶಾಂತ ಬ್ಯಾಟಿಂಗ್ ತಂಡಕ್ಕೆ ಸಮತೋಲನವನ್ನು ಒದಗಿಸುತ್ತದೆ. ಆರ್‌ಸಿಬಿ ಮಧ್ಯಮ ಓವರ್‌ಗಳನ್ನು ನಿಯಂತ್ರಿಸಲು ಮತ್ತು ಸನ್ನಿವೇಶಕ್ಕೆ ತಕ್ಕಂತೆ ಬೌಲಿಂಗ್​ ಅನ್ನು ಅಚ್ಚುಕಟ್ಟಾಗಿ ಹೊಂದಿಸಲು ಕೃನಾಲ್​ ಪಾಂಡ್ಯ ಬೌಲಿಂಗ್ ಸಹಾಯ ಮಾಡುತ್ತದೆ.

ಹೊಸ ಚೆಂಡಿನಲ್ಲಿ ಭುವನೇಶ್ವರ್ ಕುಮಾರ್ ಅವರ ಸ್ವಿಂಗ್ ಮತ್ತು ಡೆತ್ ಓವರ್‌ಗಳಲ್ಲಿ ಅವರ ಬುದ್ಧಿವಂತಿಕೆ ಬೌಲಿಂಗ್​, ಆರ್‌ಸಿಬಿಗೆ ಆರಂಭಿಕ ಮತ್ತು ಕೊನೆಯಲ್ಲಿ ರನ್​ ನಿಯಂತ್ರಣವನ್ನು ನೀಡುತ್ತದೆ. ಇನ್ನು ಜೋಶ್ ಹ್ಯಾಜಲ್‌ವುಡ್ ಅವರ ಬೌನ್ಸ್ ಹಾಗೂ ಎಡಗೈ ಬೌಲರ್​ ಯಶ್ ದಯಾಳ್ ಅವರ ವಿಭಿನ್ನ ಬೌಲಿಂಗ್​ನಿಂದಾಗಿ ಆರ್​ಸಿಬಿ ಈ ಬಾಲಿ ಬಲಿಷ್ಠ ತಂಡವಾಗಿ ಹೊರಹೊಮ್ಮಿದೆ. ಹ್ಯಾಸಲ್​ವುಡ್​ ಮತ್ತು ದಯಾಳ್​ ಪವರ್‌ಪ್ಲೇ ಮತ್ತು ಡೆತ್ ಓವರ್‌ಗಳೆರಡರಲ್ಲೂ ಸ್ಥಿರವಾಗಿ ಪ್ರಾಬಲ್ಯ ಸಾಧಿಸುವ ಸಾಮರ್ಥ್ಯವಿರುವ ವೇಗದ ಬೌಲರ್​ ಜೋಡಿಯಾಗಿದ್ದಾರೆ.

ರೀಟೆನ್​ ಆಟಗಾರರು: ವಿರಾಟ್​ ಕೊಹ್ಲಿ, ಅಭಿನಂದನ್ ಸಿಂಗ್, ಭುವನೇಶ್ವರ್ ಕುಮಾರ್, ದೇವದತ್ ಪಡಿಕ್ಕಲ್, ಜೋಕೋಬ್​ ಬೆಥೆಲ್, ಜಿತೇಶ್ ಶರ್ಮಾ, ಜೋಶ್ ಹ್ಯಾಜಲ್‌ವುಡ್, ಕೃನಾಲ್ ಪಾಂಡ್ಯ, ನುವಾನ್ ತುಷಾರ, ಫಿಲ್ ಸಾಲ್ಟ್, ರಜತ್ ಪಾಟಿದಾರ್, ರಸಿಖ್ ದಾರ್ ಸಲಾಮ್, ರೊಮಾರಿಯೋ ಶೆಫರ್ಡ್, ಸುಯಾಶ್ ಶರ್ಮಾ, ಟಿಮ್​ ಡೇವಿಡ್ ಹಾಗೂ ಯಶ್​ ದಯಾಳ್​.

ಖರೀದಿಸಿದ ಆಟಗಾರರು: ವೆಂಕಟೇಶ್ ಅಯ್ಯರ್ (7 ಕೋಟಿ ರೂ.), ಜೇಕಬ್ ಡಫೀ (2 ಕೋಟಿ ರೂ.), ಸಾತ್ವಿಕ್ ದೇಸ್ವಾಲ್ (30 ಲಕ್ಷ ರೂ.), ಮಂಗೇಶ್ ಯಾದವ್ ( 5.2 ಕೋಟಿ ರೂ.), ಜೋರ್ಡಾನ್ ಕಾಕ್ಸ್ (75 ಲಕ್ಷ ರೂ.), ವಿಕ್ಕಿ ಓಸ್ತ್ವಾಲ್ ( 30 ಲಕ್ಷ ರೂ. ), ವಿಹಾನ್ ಮಲ್ಹೋತ್ರಾ (30 ಲಕ್ಷ ರೂ.) ಹಾಗೂ ಕನಿಷ್ಕ್ ಚೌಹಾಣ್ (30 ಲಕ್ಷ ರೂ.).

ಫಿಲ್​ ಸಾಲ್ಟ್, ವಿರಾಟ್ ಕೊಹ್ಲಿ, ವೆಂಕಟೇಶ್ ಅಯ್ಯರ್, ರಜತ್ ಪಾಟಿದಾರ್ (ನಾಯಕ), ಟಿಮ್ ಡೇವಿಡ್, ಜಿತೇಶ್ ಶರ್ಮಾ (ವಿಕೆಟ್​ ಕೀಪರ್​ ಮತ್ತು ಬ್ಯಾಟಿಂಗ್​), ರೊಮಾರಿಯೊ ಶೆಫರ್ಡ್, ಕೃನಾಲ್ ಪಾಂಡ್ಯ, ಭುವನೇಶ್ವರ್ ಕುಮಾರ್, ಯಶ್ ದಯಾಳ್​ ಹಾಗೂ ಜೋಶ್ ಹ್ಯಾಜಲ್‌ವುಡ್.