ಐಪಿಎಲ್​ನಿಂದ ಕಾವ್ಯ ಮಾರನ್​ ತಂಡ​ ಹೊರಗೆ? ಬಿಸಿಸಿಐ ಉಪಾಧ್ಯಕ್ಷ ಕೊಟ್ಟ ಉತ್ತರ ವೈರಲ್​ | Sunrisers Leads

ನವದೆಹಲಿ: ಇಂಗ್ಲೆಂಡ್​ನಲ್ಲಿ ನಡೆಯಲಿರುವ ಈ ಬಾರಿಯ 'ದಿ ಹಂಡ್ರೆಡ್'​ 2026ರ ಟಿ20 ಲೀಗ್​ನ ಹರಾಜು ಪ್ರಕ್ರಿಯೆ ನಡೆಯಿತು. ಈ ಆಕ್ಷನ್​ನಲ್ಲಿ ಕಾವ್ಯ ಮಾರನ್​ ಒಡೆತನದ ಸನ್​ರೈಸರ್ಸ್​ ಲೀಡ್ಸ್​ ಫ್ರಾಂಚೈಸಿಯು ಪಾಕ್​ ಸ್ಪಿನ್ನರ್ ಅಬ್ರಾರ್​ ಅಹ್ಮದ್​ನನ್ನು 2.34 ಕೋಟಿ (190,000 ಪೌಂಡ್‌ಗಳು) ರೂ.ಗೆ ಖರೀದಿಸಿದ್ದು ಸದ್ಯ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ.

ಇಷ್ಟೇ ಅಲ್ಲದೇ, ಪಾಕಿಸ್ತಾನದ ಇತರೆ ಕ್ರಿಕೆಟಿಗರ ಮೇಲೂ ಕಣ್ಣಿಟ್ಟಿದ್ದ ಫ್ರಾಂಚೈಸಿಯ ನಡೆಯನ್ನು ತೀವ್ರವಾಗಿ ಖಂಡಿಸಿರುವ ಭಾರತೀಯ ಕ್ರಿಕೆಟ್​ ಅಭಿಮಾನಿಗಳು, ಐಪಿಎಲ್​ 19ನೇ ಆವೃತ್ತಿಯಿಂದ ಮೊದಲು ಸನ್​ರೈಸರ್ಸ್​ ಹೈದರಾಬಾದ್ ತಂಡವನ್ನು ಕಿತ್ತುಬಿಸಾಡಿ. ವೈರಿ ರಾಷ್ಟ್ರದ ಆಟಗಾರರನ್ನು ಆಯ್ಕೆ ಮಾಡಿಕೊಳ್ಳುವ ಇಂಥ ತಂಡ ನಮಗೆ ಬೇಕಿಲ್ಲ ಎಂದು ಬಿಸಿಸಿಐಗೆ ಆಗ್ರಹಿಸಿದ್ದಾರೆ. ಸನ್​ರೈಸರ್ಸ್​ ಲೀಡ್ಸ್​ನ ಸಹ ಒಡತಿ ಕಾವ್ಯ ಮಾರನ್​ ವಿರುದ್ಧ ನೆಟ್ಟಿಗರು ಹಿಗ್ಗಾಮುಗ್ಗಾ ಟ್ರೋಲ್​ ಮಾಡಿದ್ದಾರೆ. 

ಈ ವಿಷಯ ಕ್ರಿಕೆಟ್​ ವಲಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗುತ್ತಿದ್ದಂತೆ ನೇರವಾಗಿ ಬಿಸಿಸಿಐ ಅಂಗಳಕ್ಕೆ ತಲುಪಿದೆ. ಸನ್​ರೈಸರ್ಸ್​ ಫ್ರಾಂಚೈಸಿಯನ್ನು ಮಾ.28ರಿಂದ ಆರಂಭವಾಗಲಿರುವ ಐಪಿಎಲ್​ ಲೀಗ್​ನಿಂದ ತೆಗೆಯುವ ವಿಚಾರಕ್ಕೆ ಪ್ರತಿಕ್ರಿಯಿಸಿದ ಬಿಸಿಸಿಐ ಉಪಾಧ್ಯಕ್ಷ ಹಾಗೂ ಕಾಂಗ್ರೆಸ್ ಸಂಸದ ರಾಜೀವ್ ಶುಕ್ಲಾ, ಇದು ನಮ್ಮ (ಐಪಿಎಲ್​) ಡೊಮೈನ್​ಗೆ ಬರಲ್ಲ. ಅವರು ವಿದೇಶಿ ನೆಲದ ಟೂರ್ನಿಗಾಗಿ ಮಾಡಿಕೊಂಡಿದ್ದಾರೆ. ಹೀಗಾಗಿ, ಇಲ್ಲಿ ನಿರ್ಧಾರ ಅವರದ್ದೇ ಆಗಿದೆ ಹೊರತು ನಮ್ಮದು ಏನಿಲ್ಲ ಎಂದಿದ್ದಾರೆ.

'ಬಿಬಿಸಿ ಸ್ಫೋರ್ಟ್'​ ಪ್ರಶ್ನೆಗೆ ಉತ್ತರಿಸಿದ ಫ್ರಾಂಚೈಸಿ ಕೋಚ್ ಡೆನಿಯಲ್ ವೆಟೋರಿ​, ಸ್ಪಿನ್​ನಲ್ಲಿ ಹಲವು ವೇರಿಯಷನ್​ ಮಾಡುವ ಕಲೆ ಅಬ್ರಾರ್​ನಲ್ಲಿದೆ. ಅದರಲ್ಲೂ ಒಬ್ಬ ದೇಶಿಯ ಆಟಗಾರನಾಗಿ. ಪಾಕ್​ ಆಟಗಾರರ ಖರೀದಿಯಿಂದ ಏನಾದರೂ ಸಮಸ್ಯೆ ಆಗುತ್ತೆ ನಮಗೆ ಮುಂಚೆಯೇ ಒಂದು ಕಲ್ಪನೆ ಇತ್ತು. ಆದರೆ, ನಮ್ಮ ಮುಂದೆ ಬೇರೆ ದಾರಿ ಇರಲಿಲ್ಲ. ಮುಖ್ಯವಾಗಿ, ಅಬ್ರಾರ್​ ಮೇಲೆ ಫ್ರಾಂಚೈಸಿ ಮೊದಲೇ ಖರೀದಿಸಲು ಕಣ್ಣಿಟ್ಟಿತ್ತು. ಅಷ್ಟಕ್ಕೂ, ತಂಡಕ್ಕೆ ಪಾಕ್​ ಆಟಗಾರರನ್ನು ಖರೀದಿ ಮಾಡಬಾರದು ಎಂಬ ಯಾವುದೇ ಮಾಹಿತಿಯೂ ನಮಗೆ ಸಿಕ್ಕಿಲ್ಲ ಎಂದಿದ್ದಾರೆ,(ಏಜೆನ್ಸೀಸ್).