ಸರ್ಸೆ ನಿನ್ನ ಸೆರಗ ಸರ್ಸೆ ವಿವಾದ: ಕೊನೆಗೂ ಮೌನ ಮುರಿದ ನೋರಾ; ನಿರ್ದೇಶಕರೇ ಇದಕೆಲ್ಲಾ ಹೊಣೆ ಎಂದ ಬೆಡಗಿ! Nora Fatehi

ಮುಂಬೈ: ಜೋಗಿ ಪ್ರೇಮ್​ ನಿರ್ದೇಶನದ ಹಾಗೂ ಆಕ್ಷನ್​ ಪ್ರಿನ್ಸ್​ ಧ್ರುವಾ ಸರ್ಜಾ ಮುಖ್ಯ ಭೂಮಿಕೆಯಲ್ಲಿ ನಟಿಸಲಿರುವ ಕೆಡಿ: ದಿ ಡೆವಿಲ್​ ಸಿನಿಮಾದ ಸರ್ಸೆ ಸರ್ಸೆ ನಿನ್ನ ಸೆರಗಾ ಸರ್ಸೆ ಹಾಡು ವಿವಾದಕ್ಕೆ ಗುರಿಯಾಗಿದೆ. ಈದೀಗ ಈ ಹಾಡಿನಲ್ಲಿ ಡಾನ್ಸ್​ ಮಾಡಿದ ಬಾಲಿವುಡ್ ಬೆಡಗಿ ನೋರಾ ಘತೇಹಿ (Nora Fatehi) ಮೌನ ಮುರಿದಿದ್ದು, ತಮ್ಮ ಅನಿಸಿಕೆಯನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.

ಈ ಹಾಡಿನ ಬಗ್ಗೆ ಸುದೀರ್ಘ ವಿಡಿಯೋ ಸಂದೇಶ ಹಂಚಿಕೊಂಡಿರುವ ನೋರಾ, ನಾನು ಈ ಹಾಡನ್ನು ಚಿತ್ರೀಕರಿಸಿದ್ದು ಮೂರು ವರ್ಷಗಳ ಹಿಂದೆ. ಅದು ದೊಡ್ಡ ಸಿನಿಮಾ ಮತ್ತು ಸಂಜಯ್ ದತ್ ಅವರಂತಹ ಸ್ಟಾರ್ ನಟರು ಇದ್ದಾರೆ ಎಂಬ ಕಾರಣಕ್ಕೆ ನಾನು ಒಪ್ಪಿಕೊಂಡಿದ್ದೆ. ಆಗ ಅದು ನನಗೆ ಹಿಂದಿ ಚಿತ್ರ ಖಳನಾಯಕ್​ ಚಿತ್ರದ ರೀಮೇಕ್‌ನಂತೆ ಕಂಡಿತ್ತು. ಆದರೆ, ಇತ್ತೀಚೆಗೆ ಅವರು ಈ ಹಾಡನ್ನು ಹಿಂದಿಗೆ ಡಬ್ ಮಾಡಿದಾಗ ನನ್ನಿಂದ ಯಾವುದೇ ಅನುಮತಿ ಪಡೆದಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ನೋರಾ ಫತೇಹಿ ಅವರ ಪ್ರಕಾರ, ಅವರಿಗೆ ಕನ್ನಡ ಭಾಷೆ ಅರ್ಥವಾಗುವುದಿಲ್ಲ. ಶೂಟಿಂಗ್ ಸಮಯದಲ್ಲಿ ತಂಡದವರು ಹೇಳಿದ್ದನ್ನೇ ಅವರು ನಂಬಿದ್ದರು. ಕನ್ನಡ ಆವೃತ್ತಿಯನ್ನು ಚಿತ್ರೀಕರಿಸುವಾಗ ನನಗೆ ಅದರಲ್ಲಿ ಯಾವುದೂ ಅಶ್ಲೀಲ ಅನಿಸಿರಲಿಲ್ಲ. ಆದರೆ ಈಗ ಹಿಂದಿ ಆವೃತ್ತಿಯ ಸಾಹಿತ್ಯ ಕೇಳಿ ನನಗೂ ಆಘಾತವಾಗಿದೆ. ಇದು ಸರಿಯಲ್ಲ ಎಂದು ನಾನು ನಿರ್ದೇಶಕರಿಗೆ ಮೊದಲೇ ಹೇಳಿದ್ದೆ. ಹಾಗಾಗಿಯೇ ನಾನು ಈ ಹಾಡನ್ನು ಎಲ್ಲೂ ಪ್ರಚಾರ ಮಾಡಿಲ್ಲ ಮತ್ತು ಆ ಪ್ರಾಜೆಕ್ಟ್‌ನಿಂದ ನನ್ನನ್ನು ದೂರವಿರಿಸಿಕೊಂಡೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಕೇವಲ ಸಾಹಿತ್ಯ ಮಾತ್ರವಲ್ಲ, ಲಿರಿಕಲ್ ವಿಡಿಯೋದಲ್ಲಿ ಬಳಸಲಾದ ಫೋಟೋಗಳ ಬಗ್ಗೆಯೂ ನೋರಾ ಅಸಮಾಧಾನ ಹೊರಹಾಕಿದ್ದಾರೆ. ಬಿಡುಗಡೆ ಸಮಾರಂಭದಲ್ಲಿ ಅವರು ನನ್ನ ಮತ್ತು ಸಂಜಯ್ ದತ್ ಅವರ AI (ಕೃತಕ ಬುದ್ಧಿಮತ್ತೆ) ಫೋಟೋಗಳನ್ನು ಬಳಸಿದ್ದರು. ಅದು ನೋಡಲು ತುಂಬಾ ಅಸಹ್ಯವಾಗಿತ್ತು. ಆ ಕಾರ್ಯಕ್ರಮದಲ್ಲಿ ನಾನು ಕಿರಿಕಿರಿ ಅನುಭವಿಸಿದರೂ, ಸಂಯಮದಿಂದ ಸುಮ್ಮನಿದ್ದೆ ಎಂದು ಅವರು ತಮ್ಮ ನೋವನ್ನು ಹಂಚಿಕೊಂಡಿದ್ದಾರೆ.

ಕಲಾವಿದರಿಗೆ ಇಂತಹ ವಿಷಯಗಳಲ್ಲಿ ನಿರ್ಧಾರ ತೆಗೆದುಕೊಳ್ಳುವ ಅಧಿಕಾರ ಕಡಿಮೆ ಇರುತ್ತದೆ ಎಂದು ಬೇಸರ ವ್ಯಕ್ತಪಡಿಸಿದ ನೋರಾ, ಇಂತಹ ವಿಷಯಗಳನ್ನು ಸೃಷ್ಟಿಸುವಾಗ ನಿರ್ದೇಶಕರು ಮತ್ತು ನಿರ್ಮಾಪಕರನ್ನು ಹೊಣೆಗಾರರನ್ನಾಗಿ ಮಾಡಬೇಕು. ನನ್ನ ಇಮೇಜ್ ಹಾಳು ಮಾಡಲು ಇದನ್ನು ಬಳಸಿಕೊಳ್ಳಬೇಡಿ. ಸಾರ್ವಜನಿಕರ ಆಕ್ರೋಶಕ್ಕೆ ಮಣಿದು ಈಗ ಹಾಡನ್ನು ಡಿಲೀಟ್ ಮಾಡಿರುವುದಕ್ಕೆ ನಾನು ಕೃತಜ್ಞಳಾಗಿದ್ದೇನೆ ಎಂದು ಹೇಳಿದ್ದಾರೆ,(ಏಜನ್ಸೀಸ್​).