ಬಂಗಾಳದ ಎಕ್ಸಿಟ್ ಪೋಲ್ ಲೆಕ್ಕಾಚಾರವನ್ನೇ ಬುಡಮೇಲು ಮಾಡುತ್ತಾ ಮಹಿಳಾ ವೋಟ್ ಬ್ಯಾಂಕ್? ದಾಖಲೆ ಮತದಾನದ ಹಿಂದೆ ಅಡಗಿದೆಯೇ ಬಿಗ್ ಟ್ವಿಸ್ಟ್..? Women Voters in West Bengal

ಬಂಗಾಳದಲ್ಲಿ ಸರ್ಕಾರ ರಚಿಸಲು 148 ಸ್ಥಾನಗಳ ಮ್ಯಾಜಿಕ್ ನಂಬರ್ ಅಗತ್ಯವಿದೆ. ವಿವಿಧ ಸಂಸ್ಥೆಗಳ ಎಕ್ಸಿಟ್ ಪೋಲ್ ಅಂಕಿಅಂಶಗಳು ಹೀಗಿವೆ.

ಚಾಣಕ್ಯ ಸ್ಟ್ರಾಟಜೀಸ್: ಬಿಜೆಪಿ 150-160 ಸ್ಥಾನಗಳನ್ನು ಗೆದ್ದು ಅಧಿಕಾರ ಹಿಡಿಯಲಿದೆ ಎಂದು ಭವಿಷ್ಯ ನುಡಿದರೆ, ಟಿಎಂಸಿಗೆ ಕೇವಲ 30-40 ಸ್ಥಾನಗಳನ್ನು ನೀಡಿದೆ.

ಮ್ಯಾಟ್ರೈಜ್: ಬಿಜೆಪಿ 146-161 ಮತ್ತು ಟಿಎಂಸಿ 125-140 ಸ್ಥಾನಗಳನ್ನು ಪಡೆಯಬಹುದು ಎಂದು ಅಂದಾಜಿಸಿದೆ.

ಜೆವಿಸಿ: ಬಿಜೆಪಿ 138-159 ಮತ್ತು ಟಿಎಂಸಿ 131-152 ಸ್ಥಾನಗಳೊಂದಿಗೆ ಸಮಬಲದ ಹೋರಾಟ ಇರಲಿದೆ ಎಂದಿದೆ.

ಪಿ-ಮಾರ್ಕ್: ಬಿಜೆಪಿ 150-175 ಸ್ಥಾನಗಳನ್ನು ಪಡೆಯುವ ಮೂಲಕ ಸ್ಪಷ್ಟ ಬಹುಮತ ಪಡೆಯಲಿದೆ ಎಂದು ಊಹಿಸಿದೆ.

ಪೀಪಲ್ ಪಲ್ಸ್: ಇದು ಟಿಎಂಸಿ ಪರವಾಗಿ ಒಲವು ತೋರಿದ್ದು, ಮಮತಾ ಬ್ಯಾನರ್ಜಿ ನೇತೃತ್ವದ ಪಕ್ಷಕ್ಕೆ 177-187 ಸ್ಥಾನಗಳು ಸಿಗಲಿವೆ ಎಂದು ಹೇಳಿದೆ.

ಪೋಲ್ ಡೈರಿ: ಬಿಜೆಪಿ 142-147 ಮತ್ತು ಟಿಎಂಸಿ 99-127 ಸ್ಥಾನಗಳನ್ನು ಪಡೆಯಲಿದೆ ಎಂದು ತಿಳಿಸಿದೆ.

ಹೆಚ್ಚಿನ ಸಮೀಕ್ಷೆಗಳು ಬಿಜೆಪಿಗೆ ಮುನ್ನಡೆ ನೀಡಿದ್ದರೂ, ಪೀಪಲ್ ಪಲ್ಸ್‌ನಂತಹ ಸಮೀಕ್ಷೆಗಳು ಟಿಎಂಸಿಗೆ ಬಹುಮತ ಸಿಗಲಿದೆ ಎಂದು ಹೇಳಿರುವುದು ಕುತೂಹಲ ಮೂಡಿಸಿದೆ.

ಬಂಗಾಳದ ರಾಜಕೀಯದಲ್ಲಿ 2011ರಿಂದಲೂ ಮಹಿಳಾ ಮತದಾರರು ನಿರ್ಣಾಯಕ ಪಾತ್ರ ವಹಿಸುತ್ತಿದ್ದಾರೆ. ಆದರೆ 2026ರ ಈ ಚುನಾವಣೆಯಲ್ಲಿ ಮಹಿಳೆಯರು ಹಿಂದಿನ ಎಲ್ಲಾ ದಾಖಲೆಗಳನ್ನು ಅಳಿಸಿಹಾಕಿದ್ದಾರೆ. ಈ ಬಾರಿ ಮಹಿಳಾ ಮತದಾನದ ಪ್ರಮಾಣವು ಶೇ. 93.24 ರಷ್ಟಿದೆ, ಇದು ಪುರುಷರ ಮತದಾನದ ಪ್ರಮಾಣಕ್ಕಿಂತ (ಶೇ. 92) ಹೆಚ್ಚಾಗಿದೆ.

2011ರ ಇತಿಹಾಸ: ಈ ವರ್ಷ ಮೊದಲ ಬಾರಿಗೆ ಮಹಿಳಾ ಮತದಾರರ ಪ್ರಮಾಣ ಪುರುಷರಿಗಿಂತ ಹೆಚ್ಚಾದಾಗ, ಮಮತಾ ಬ್ಯಾನರ್ಜಿ ರಾಜ್ಯದ ಮೊದಲ ಮಹಿಳಾ ಮುಖ್ಯಮಂತ್ರಿಯಾಗಿ ಅಧಿಕಾರಕ್ಕೇರಿದ್ದರು.

ಸ್ಥಿರವಾದ ಬೆಂಬಲ: 2016 ಮತ್ತು 2021ರಲ್ಲೂ ಮಹಿಳೆಯರು ಮಮತಾ ಬ್ಯಾನರ್ಜಿ ಅವರ ಬೆನ್ನಿಗೆ ನಿಂತಿದ್ದರು.

2026ರ ಪ್ರಶ್ನೆ: 93 ಪ್ರತಿಶತಕ್ಕಿಂತಲೂ ಹೆಚ್ಚು ಮಹಿಳೆಯರು ಮತಗಟ್ಟೆಗೆ ಬಂದು ವೋಟ್ ಮಾಡಿರುವುದು ಆಡಳಿತ ವಿರೋಧಿ ಅಲೆಯೋ ಅಥವಾ ಮಮತಾ ಬ್ಯಾನರ್ಜಿ ಅವರ ಕಲ್ಯಾಣ ಯೋಜನೆಗಳಿಗೆ ಸಂದ ಜಯವೋ ಎಂಬುದು ಮೇ 4ರಂದು ತಿಳಿಯಲಿದೆ.

ಬಂಗಾಳದಲ್ಲಿ ಟಿಎಂಸಿ ಮತ್ತು ಬಿಜೆಪಿಯ ಬೆಳವಣಿಗೆಯನ್ನು ಗಮನಿಸಿದರೆ ಕುತೂಹಲಕಾರಿ ಅಂಶಗಳು ಕಂಡುಬರುತ್ತವೆ.

ಟಿಎಂಸಿ ಏರಿಕೆ: 2011ರಲ್ಲಿ ಕೇವಲ 30 ಸೀಟುಗಳಿಂದ 184ಕ್ಕೆ ಏರಿದ ಟಿಎಂಸಿ, 2021ರ ವೇಳೆಗೆ 215 ಸ್ಥಾನಗಳನ್ನು ತನ್ನದಾಗಿಸಿಕೊಂಡಿತ್ತು. ಮತಗಳ ಹಂಚಿಕೆಯೂ ಶೇ. 38.93 ರಿಂದ ಶೇ. 47.9 ಕ್ಕೆ ಏರಿಕೆಯಾಗಿದೆ.

ಬಿಜೆಪಿಯ ಭರ್ಜರಿ ಪ್ರಗತಿ: 2016ರಲ್ಲಿ ಕೇವಲ 3 ಸ್ಥಾನಗಳನ್ನು ಹೊಂದಿದ್ದ ಬಿಜೆಪಿ, 2021ರಲ್ಲಿ 77 ಸ್ಥಾನಗಳನ್ನು ಗೆದ್ದು ರಾಜ್ಯದ ಪ್ರಮುಖ ವಿರೋಧ ಪಕ್ಷವಾಗಿ ಹೊರಹೊಮ್ಮಿತು. ಬಿಜೆಪಿಯ ಮತ ಹಂಚಿಕೆಯು ಶೇ. 10.16 ರಿಂದ ಶೇ. 38.15 ಕ್ಕೆ ಜಿಗಿದಿದೆ.

ಎಕ್ಸಿಟ್ ಪೋಲ್‌ಗಳು ಬಿಜೆಪಿಯ ಪ್ರದರ್ಶನ ಸುಧಾರಿಸಲಿದೆ ಎಂದು ಏಕಕಂಠದಿಂದ ಹೇಳುತ್ತಿವೆ. ಆದರೆ ಮೌನವಾಗಿ ಮತ ಚಲಾಯಿಸಿರುವ ಬಂಗಾಳದ ಮಹಿಳೆಯರು ದೀದಿಯ ಪರವಾಗಿದ್ದಾರೋ ಅಥವಾ ಬದಲಾವಣೆ ಬಯಸಿ ಕಮಲದ ಹಾದಿ ಹಿಡಿದಿದ್ದಾರೋ ಎಂಬ ಸಸ್ಪೆನ್ಸ್ ಮುಂದುವರಿದಿದೆ. ಒಂದು ವಿಷಯವಂತೂ ಖಚಿತ, ಬಂಗಾಳದ ಚುನಾವಣೆಯಲ್ಲಿ ಮಹಿಳೆಯರು ಕೇವಲ ಭಾಗವಹಿಸುವವರಲ್ಲ, ಅವರು ಫಲಿತಾಂಶವನ್ನು ಬದಲಿಸಬಲ್ಲ ಕಿಂಗ್ ಮೇಕರ್​ಗಳಾಗಿದ್ದಾರೆ,(ಏಜೆನ್ಸೀಸ್).