ವಿಮಾನ ಟೇಕಾಫ್ ಆಗುತ್ತಿದ್ದಂತೆಯೇ ಸಹಪ್ರಯಾಣಿಕರ ಎದುರು​ ಬೆತ್ತಲಾದ ಮಹಿಳೆ: ತನಿಖೆಯಲ್ಲಿ ಕಾರಣ ಬಯಲು... Flight

Flight : ವಿಮಾನದಲ್ಲಿ ಪ್ರಯಾಣಿಕರ ಸುರಕ್ಷತೆ ಮತ್ತು ಸೌಜನ್ಯಕ್ಕೆ ಮೊದಲ ಪ್ರಾಶಸ್ತ್ಯ ನೀಡಬೇಕಾಗುತ್ತದೆ. ಆದರೆ, ಬ್ರಿಟನ್‌ನಿಂದ ಫ್ಲೋರಿಡಾಗೆ ತೆರಳುತ್ತಿದ್ದ ವಿಮಾನವೊಂದರಲ್ಲಿ ಮಹಿಳಾ ಪ್ರಯಾಣಿಕರೊಬ್ಬರು ನಡೆಸಿದ ವಿಕೃತ ಹಾಗೂ ಅಸಭ್ಯ ವರ್ತನೆಯು ಇಡೀ ವಿಮಾನದಲ್ಲಿದ್ದವರನ್ನು ದಂಗುಬಡಿಸಿದೆ. ವಿಮಾನದ ಟೇಕಾಫ್‌ ಹಂತದ ಅತ್ಯಂತ ಸೂಕ್ಷ್ಮ ಹಾಗೂ ಅಪಾಯಕಾರಿ ಸಮಯದಲ್ಲಿ ಸಿಬ್ಬಂದಿಯ ಸುರಕ್ಷತಾ ಸೂಚನೆಗಳನ್ನು ಗಾಳಿಗೆ ತೂರಿದ ಮಹಿಳೆ, ಸಹಪ್ರಯಾಣಿಕರ ಮುಂದೆಯೇ ತನ್ನ ಬಟ್ಟೆಗಳನ್ನು ಕಳಚಿ ಬೆತ್ತಲೆಯಾಗಿ ಅತಿರೇಕದ ವರ್ತನೆ ಮೆರೆದ ಘಟನೆ ಈಗ ಚರ್ಚೆಗೆ ಗ್ರಾಸವಾಗಿದೆ.

ಪಶ್ಚಿಮ ಯಾರ್ಕ್​ಷೈರ್‌ನ ಹ್ಯಾಲಿಫ್ಯಾಕ್ಸ್ ಮೂಲದ 30 ವರ್ಷದ ಸರಾ ಪಾರ್ಕರ್​ ಎಂಬಾಕೆಯೇ ಈ ಕೃತ್ಯ ಎಸಗಿದ ಮಹಿಳೆ. ಕಳೆದ ವರ್ಷ ಜುಲೈ 24ರಂದು ಬರ್ಮಿಂಗ್​ಹ್ಯಾಮ್​ ವಿಮಾನ ನಿಲ್ದಾಣದಿಂದ ಫ್ಲೋರಿಡಾ ಕಡೆಗೆ ಹೊರಟಿದ್ದ ವಿಮಾನವು ಟೇಕಾಫ್ ಆಗುತ್ತಿದ್ದ ಸಮಯದಲ್ಲೇ ಈ ಅನಾಹುತ ಸಂಭವಿಸಿದೆ. ವಿಮಾನವು ರನ್‌ವೇಯಲ್ಲಿ ಮೇಲೇರುತ್ತಿರುವಾಗ ಕಡ್ಡಾಯವಾಗಿ ಸೀಟಿನಲ್ಲಿ ಕುಳಿತುಕೊಳ್ಳಬೇಕಾದ ನಿಯಮವಿತ್ತು. ಆದರೆ, ಪೈಲಟ್‌ಗಳ ಮತ್ತು ಸಿಬ್ಬಂದಿಯ ಕಠಿಣ ಸೂಚನೆಗಳನ್ನು ಸಂಪೂರ್ಣವಾಗಿ ಧಿಕ್ಕರಿಸಿದ ಸರಾ ಪಾರ್ಕರ್, ಏಕಾಏಕಿ ತನ್ನ ಆಸನದಿಂದ ಎದ್ದು ವಾಶ್‌ರೂಮ್ ಕಡೆಗೆ ತೆರಳಿದ್ದಾರೆ. ಅಲ್ಲಿಂದ ಹೊರಬಂದ ತಕ್ಷಣವೇ ಅವರು ಧರಿಸಿದ್ದ ಶಾರ್ಟ್ಸ್ ಮತ್ತು ಒಳಉಡುಪನ್ನು ತೆಗೆದು, ವಿಮಾನದಲ್ಲಿದ್ದ ನೂರಾರು ಸಹಪ್ರಯಾಣಿಕರ ಎದುರು ಸಂಪೂರ್ಣ ಬೆತ್ತಲೆಯಾಗಿ ಅಸಭ್ಯ ಪ್ರದರ್ಶನ ನೀಡಲು ಆರಂಭಿಸಿದ್ದಾರೆ.

ವಿಮಾನದೊಳಗೆ ಇಂತಹ ಅಸಹ್ಯಕರ ವರ್ತನೆಗೆ ಪ್ರಮುಖ ಕಾರಣ ಮದ್ಯದ ನಶೆ ಎನ್ನಲಾಗಿದೆ. ವಿಮಾನ ಹತ್ತುವ ಮುನ್ನ ಅಥವಾ ಪ್ರಯಾಣದ ವೇಳೆ ವಿಪರೀತವಾಗಿ ಮದ್ಯ ಸೇವಿಸಿದ್ದೇ ಈಕೆಯ ಅತಿರೇಕದ ವರ್ತನೆಗೆ ಕಾರಣವೆಂದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ. ವಿಮಾನದ ಸಿಬ್ಬಂದಿ ಹಾಗೂ ಪ್ರಯಾಣಿಕರು ಈಕೆಯನ್ನು ನಿಯಂತ್ರಿಸಲು ಹರಸಾಹಸ ಪಡಬೇಕಾಯಿತು. ಈ ಗಂಭೀರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮ್ಯಾಂಚೆಸ್ಟರ್ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯದಲ್ಲಿ ವಿಚಾರಣೆ ನಡೆದಿದ್ದು, ಆರೋಪಿ ಸರಾ ಪಾರ್ಕರ್ ತಾನು ಎಸಗಿದ ತಪ್ಪು ಹಾಗೂ ಅಸಭ್ಯ ವರ್ತನೆಯನ್ನು ನ್ಯಾಯಾಲಯದ ಮುಂದೆ ಒಪ್ಪಿಕೊಂಡಿದ್ದಾಳೆ.

ವಿಮಾನದಂತಹ ಸಾರ್ವಜನಿಕ ಮತ್ತು ಸುರಕ್ಷಿತ ಸಂಚಾರ ಮಾಧ್ಯಮದಲ್ಲಿ ಈ ರೀತಿಯ ಅಸಭ್ಯ ವರ್ತನೆಯನ್ನು ನ್ಯಾಯಾಲಯವು ಅತ್ಯಂತ ಗಂಭೀರವಾಗಿ ಪರಿಗಣಿಸಿದೆ. ಪ್ರಕರಣದ ವಿಚಾರಣೆ ನಡೆಸಿದ ಜಿಲ್ಲಾ ನ್ಯಾಯಾಧೀಶರಾದ ಸೈಮನ್ ಬ್ಲೇಕ್‌ಬ್ರೌ, ಇದು ಕೇವಲ ಸಾಮಾನ್ಯ ತಕರಾರಲ್ಲ ಬದಲಿಗೆ ಅತ್ಯಂತ ಗಂಭೀರವಾದ ದುರ್ನಡತೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಆರೋಪಿಯು ತಪ್ಪೊಪ್ಪಿಕೊಂಡಿರುವ ಹಿನ್ನೆಲೆಯಲ್ಲಿ, ಈ ಪ್ರಕರಣದ ಅಂತಿಮ ತೀರ್ಪು ಹಾಗೂ ಮುಂದಿನ ಶಿಕ್ಷೆಯ ಪ್ರಕ್ರಿಯೆಗಾಗಿ ನವೆಂಬರ್ 3ಕ್ಕೆ ವಿಚಾರಣೆಯನ್ನು ಮುಂದೂಡಲಾಗಿದೆ. ವಿಮಾನಯಾನ ಭದ್ರತೆಗೆ ಕುತ್ತು ತರುವ ಇಂತಹ ಘಟನೆಗಳು ಜಾಗತಿಕವಾಗಿ ಕಠಿಣ ಕಾನೂನು ಕ್ರಮಗಳಿಗೆ ಒಳಪಡುವ ಎಚ್ಚರಿಕೆಯನ್ನು ಈ ಪ್ರಕರಣ ಮತ್ತೊಮ್ಮೆ ನೀಡಿದೆ, (ಏಜೆನ್ಸೀಸ್​).