ಆಸ್ಕರ್​​ ಓಟದಲ್ಲಿ “ಮಹಾವತಾರ ನರಸಿಂಹ”! ಅನಿಮೇಟೆಡ್​ ವಿಭಾಗದ ಪಟ್ಟಿಯಲ್ಲಿ ಯಾವೆಲ್ಲ ಚಿತ್ರಗಳಿವೆ? ಇಲ್ಲಿದೆ ವಿವರ

ಅನಿಮೇಷನ್​ ಮೂಲಕ ನರಸಿಂಹನ ಉಗ್ರ ನೋಟವನ್ನು ಬೆಳ್ಳಿಪರದೆಯ ಮೇಲೆ ತೋರಿಸಿದ ರೀತಿಗೆ ಪ್ರೇಕ್ಷಕರು ಮಂತ್ರಮುಗ್ಧರಾದರು. ಇದಕ್ಕೆ ಹಲವಾರು ಸಿನಿ ವರದಿಗಳು ಮತ್ತು ವಿಮರ್ಶೆಗಳೇ ಸಾಕ್ಷಿ. ಈ ಸಿನಿಮಾ ಆರಂಭದಲ್ಲಿ ಅಷ್ಟಾಗಿ ಪ್ರಚಾರ ಪಡೆಯಲಿಲ್ಲ. ಆದರೆ, ತೆರೆಕಂಡ ಕೆಲವೇ ದಿನಗಳಲ್ಲಿ ದೇಶವ್ಯಾಪಿ ಸಿನಿಪ್ರಿಯರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಯಿತು. ಮತ್ತು ಚಿತ್ರಪ್ರೇಮಿಗಳನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಥಿಯೇಟರ್​ನತ್ತ ಕರೆತರುವ ಕೆಲಸ ಮಾಡಿತು.

ಕೇವಲ 30 ಕೋಟಿ ರೂ.ಗಳಲ್ಲಿ ನಿರ್ಮಿಸಲಾದ ಈ ಚಿತ್ರವು ತನ್ನ ದೀರ್ಘಾವಧಿಯಲ್ಲಿ 300 ಕೋಟಿ ರೂ.ಗಿಂತ ಹೆಚ್ಚು ಸಂಗ್ರಹಿಸಿದೆ ಮತ್ತು ಭಾರತೀಯ ಚಿತ್ರೋದ್ಯಮದಲ್ಲಿ ಹೊಸ ದಾಖಲೆಗಳನ್ನು ಸೃಷ್ಟಿಸಿದೆ. ಈಗ ಇದೇ ಸಿನಿಮಾ 98ನೇ ಆಸ್ಕರ್‌ಗೆ ಆಯ್ಕೆಯಾಗಿರುವ ಬಗ್ಗೆ ಹಲವರು ಸಂತಸ ವ್ಯಕ್ತಪಡಿಸಿದ್ದಾರೆ. ಚಿತ್ರವು ಅನಿಮೇಷನ್ ವಿಭಾಗದಲ್ಲಿ ಆಸ್ಕರ್‌ಗೆ ಪ್ರವೇಶ ಪಡೆದಿದೆ. ಈ ವಿಭಾಗದಲ್ಲಿ 'ಮಹಾವತಾರ ನರಸಿಂಹ' ಹಲವು ಹಾಲಿವುಡ್​ ಚಿತ್ರಗಳೊಂದಿಗೆ ಪೈಪೋಟಿ ಕೊಡುತ್ತಿದೆ.

'ಪಾಪ್ ಡೆಮನ್ ಹಂಟರ್ಸ್', 'ಇನ್ಫಿನಿಟಿ ಕ್ಯಾಸಲ್' ಮತ್ತು 'ಡೆಮನ್ ಸ್ಲೇಯರ್: ಕಿಮೆಟ್ಸು ನೋ ಯೈಬಾ' ಸೇರಿ ಒಂದಷ್ಟು ಹಾಲಿವುಡ್ ಸಿನಿಮಾಗಳು ಈ ಅನಿಮೇಷನ್ ವಿಭಾಗದಲ್ಲಿ ರೇಸ್​ಗಿಳಿದಿವೆ. ಆಸ್ಕರ್​ನಲ್ಲಿ ಪ್ರಶಸ್ತಿ ಲಭಿಸುತ್ತದೆಯೋ ಇಲ್ಲವೋ ಸದ್ಯಕ್ಕೆ ತಿಳಿಯದು. ಆದರೆ, ಆಸ್ಕರ್‌ಗೆ ಮಹಾವತಾರ ನರಸಿಂಹ ಆಯ್ಕೆಯಾಗಿರುವುದು ಮಾತ್ರ ಭಾರತೀಯ ಚಿತ್ರೋದ್ಯಮದಲ್ಲಿ ಭಾರೀ ಸದ್ದು ಮಾಡುತ್ತಿದೆ. ಅಲ್ಲದೆ, ಭವಿಷ್ಯದಲ್ಲಿ ಬರಲಿರುವ ಹಲವು ರೀತಿಯ ಅನಿಮೇಟೆಡ್ ಚಿತ್ರಗಳಿಗೆ ಇದು ಅಡಿಪಾಯ ಹಾಕಿಕೊಟ್ಟಂತಿದೆ,(ಏಜೆನ್ಸೀಸ್).