ನೀವು ಒಂಟಿಯಲ್ಲ, ನಾವಿದ್ದೇವೆ!...ವಿದ್ಯಾರ್ಥಿಗಳಿಗೆ ರಾಹುಲ್ ಅಭಯ; ಗಾಂಧಿ ಸ್ಮೃತಿಗೆ ಇಂಡಿಯಾ ನಾಯಕರ ಜಂಟಿ ಜಾಥಾ | Rahul Gandhi

ಗುರುವಾರ ಮಧ್ಯಾಹ್ನ ವಿರೋಧ ಪಕ್ಷದ ಸಂಸದರು ಸಭೆಗಾಗಿ ರಾಹುಲ್ ಗಾಂಧಿ ಅವರ ನಿವಾಸಕ್ಕೆ ಆಗಮಿಸಿದ ನಂತರ, ಅವರ ಮನೆಯ ಹೊರಭಾಗದಲ್ಲಿ ಬ್ಯಾರಿಕೇಡ್‌ಗಳನ್ನು ಅಳವಡಿಸಲಾಗಿತ್ತು. ಸಭೆ ಮುಕ್ತಾಯಗೊಂಡ ತಕ್ಷಣವೇ, ತಮ್ಮ ನಿವಾಸದಿಂದ ಒಂದು ಕಿಲೋಮೀಟರ್‌ಗಿಂತಲೂ ಕಡಿಮೆ ದೂರದಲ್ಲಿರುವ ಗಾಂಧಿ ಸ್ಮೃತಿಗೆ ಭೇಟಿ ನೀಡುವ ಯೋಜನೆಯನ್ನು ಕಾಂಗ್ರೆಸ್ ನಾಯಕ ಪ್ರಕಟಿಸಿದರು.

ಈ ಕುರಿತಾಗಿ ತಮ್ಮ ಎಕ್ಸ್ ಖಾತೆಯಲ್ಲಿ ಪೋಸ್ಟ್​ ಹಂಚಿಕೊಂಡಿರುವ ರಾಹುಲ್ ಗಾಂಧಿ, ಪ್ರಸ್ತುತ, ಇಂಡಿಯಾ ಮೈತ್ರಿಕೂಟದ ಸಂಸದರು ಮತ್ತು ನಾಯಕರು ಶಾಂತಿಯುತವಾಗಿ ತೀಸ್ ಜನವರಿ ಮಾರ್ಗದಲ್ಲಿರುವ ಗಾಂಧಿ ಸ್ಮೃತಿಯತ್ತ ಸಾಗುತ್ತಿದ್ದಾರೆ. ನೀಟ್​ ಪೇಪರ್ ಲೀಕ್ ನಂತರ ಆತ್ಮಹತ್ಯೆಗೆ ಶರಣಾದ ನಮ್ಮ ಮಕ್ಕಳನ್ನು ಸ್ಮರಿಸಲು ನಾವು ಹೊರಟಿದ್ದೇವೆ. ಶಾಂತಿಯುತವಾಗಿ ನ್ಯಾಯ ಮತ್ತು ಹೊಣೆಗಾರಿಕೆಯನ್ನು ಆಗ್ರಹಿಸಿದಾಗ ಹಲ್ಲೆಗೊಳಗಾಗಿ, ಇಂದು ಗಾಯಗೊಂಡು ಬಿದ್ದಿರುವ ವಿದ್ಯಾರ್ಥಿಗಳ ಪರವಾಗಿ ನಿಲ್ಲಲು ನಾವು ಹೋಗುತ್ತಿದ್ದೇವೆ ಎಂದು ತಿಳಿಸಿದ್ದಾರೆ.