ನೀವೇ ಸರ್ವನಾಶವಾಗುತ್ತೀರಿ ಎಚ್ಚರಿಕೆ! ಟ್ರಂಪ್‌ಗೆ ಇರಾನ್ ನೀಡಿದ ಆ 'ಡೆಡ್ಲಿ' ಸಂದೇಶದ ಅರ್ಥವೇನು..? IranVsUSA

ಇರಾನ್‌ನ ಸುಪ್ರೀಂ ನ್ಯಾಷನಲ್ ಸೆಕ್ಯೂರಿಟಿ ಕೌನ್ಸಿಲ್‌ನ ಕಾರ್ಯದರ್ಶಿ ಅಲಿ ಲಾರಿಜಾನಿ, ಮಂಗಳವಾರ (ಮಾ.10) ಟ್ರಂಪ್ ಅವರ ಬೆದರಿಕೆಗೆ ನೇರವಾಗಿಯೇ ಸವಾಲು ಹಾಕಿದ್ದಾರೆ.

ತಿರುಗೇಟು: ಕಾಗದದ ಮೇಲಿನ ನಿಮ್ಮ ಬೆದರಿಕೆಗಳಿಗೆ ಆಶುರಾ ಪ್ರೇಮಿಗಳಾದ ಇರಾನ್ ರಾಷ್ಟ್ರ ಹೆದರುವುದಿಲ್ಲ. ನಿಮಗಿಂತ ದೊಡ್ಡವರು ಯಾರೂ ಇರಾನ್ ಅನ್ನು ಅಳಿಸಲು ಸಾಧ್ಯವಾಗಲಿಲ್ಲ. ಮೊದಲು ನಿಮ್ಮ ಬಗ್ಗೆ ಜಾಗರೂಕರಾಗಿರಿ. ನೀವೇ ಈ ಜಗತ್ತಿನಿಂದ ನಿರ್ನಾಮವಾಗಬೇಡಿ ಎಂದು ಲಾರಿಜಾನಿ ತಮ್ಮ ಸೋಶಿಯಲ್ ಮೀಡಿಯಾ ಪೋಸ್ಟ್‌ನಲ್ಲಿ ಗುಡುಗಿದ್ದಾರೆ.

ಇದಕ್ಕೂ ಮೊದಲು ಡೊನಾಲ್ಡ್ ಟ್ರಂಪ್ ತಮ್ಮ ಟ್ರೂತ್ ಸೋಶಿಯಲ್ ಖಾತೆಯಲ್ಲಿ ಇರಾನ್ ವಿರುದ್ಧ ಅತ್ಯಂತ ಕಠಿಣ ಪದಗಳನ್ನು ಬಳಸಿದ್ದರು.

20 ಪಟ್ಟು ದಾಳಿ: ಇರಾನ್ ಏನಾದರೂ ಹಾರ್ಮುಜ್ ಜಲಸಂಧಿಯಲ್ಲಿ ತೈಲ ಸಂಚಾರಕ್ಕೆ ಅಡ್ಡಿಪಡಿಸಿದರೆ, ಇದುವರೆಗೆ ಅನುಭವಿಸಿದ್ದಕ್ಕಿಂತ 20 ಪಟ್ಟು ಭೀಕರವಾಗಿ ಅಮೆರಿಕ ತಿರುಗೇಟು ನೀಡಲಿದೆ.

ಮರುನಿರ್ಮಾಣ ಅಸಾಧ್ಯ: ಇರಾನ್‌ನ ಪ್ರಮುಖ ಮತ್ತು ಸುಲಭವಾಗಿ ಧ್ವಂಸಗೊಳಿಸಬಹುದಾದ ಗುರಿಗಳನ್ನು ನಾವು ನಾಶಪಡಿಸುತ್ತೇವೆ. ಇದರಿಂದ ಇರಾನ್ ಮತ್ತೆ ಎಂದಿಗೂ ಒಂದು ರಾಷ್ಟ್ರವಾಗಿ ಮರುನಿರ್ಮಾಣವಾಗಲು ಸಾಧ್ಯವಾಗುವುದಿಲ್ಲ. ಸಾವು, ಬೆಂಕಿ ಮತ್ತು ಕ್ರೋಧ ಅವರ ಮೇಲೆ ಮಳೆಗರೆಯಲಿದೆ ಎಂದು ಟ್ರಂಪ್ ಎಚ್ಚರಿಸಿದ್ದರು.

ವಿಶ್ವದ ಆರ್ಥಿಕತೆಯ ನಾಡಿಮಿಡಿತ ಈ ಸಣ್ಣ ಜಲಸಂಧಿಯಲ್ಲಿದೆ.

ಸ್ಥಳ: ಉತ್ತರಕ್ಕೆ ಇರಾನ್ ಮತ್ತು ದಕ್ಷಿಣಕ್ಕೆ ಓಮನ್ ಹಾಗೂ ಯುಎಇ ನಡುವೆ ಇರುವ ಈ ಜಲಮಾರ್ಗವು ಕೇವಲ 33 ಕಿ.ಮೀ ಅಗಲವಿದೆ.

ತೈಲ ಪೂರೈಕೆ: ಜಗತ್ತಿನ ಒಟ್ಟು ತೈಲ ಪೂರೈಕೆಯ ಶೇ. 20ರಷ್ಟು ಭಾಗ ಇಲ್ಲಿಂದಲೇ ಹಾದುಹೋಗುತ್ತದೆ. 2025ರ ಲೆಕ್ಕಾಚಾರದಂತೆ ಪ್ರತಿದಿನ ಸುಮಾರು 20 ಮಿಲಿಯನ್ ಬ್ಯಾರೆಲ್ ತೈಲ ಇಲ್ಲಿಂದ ಸಾಗಣೆಯಾಗುತ್ತದೆ.

ಚೀನಾಕ್ಕೆ ಗಿಫ್ಟ್: ಟ್ರಂಪ್ ಹೇಳುವಂತೆ, ಈ ಜಲಸಂಧಿಯನ್ನು ಮುಕ್ತವಾಗಿಡುವುದು ಚೀನಾ ಸೇರಿದಂತೆ ಹಲವು ರಾಷ್ಟ್ರಗಳಿಗೆ ಅಮೆರಿಕ ನೀಡುತ್ತಿರುವ ಕೊಡುಗೆಯಾಗಿದೆ.

ಫೆಬ್ರವರಿ 2ರಂದು ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ಮೇಲೆ ವೈಮಾನಿಕ ದಾಳಿ ನಡೆಸಿದಾಗಿನಿಂದ ಈ ಸಂಘರ್ಷ ಆರಂಭವಾಗಿದೆ. ಇರಾನ್‌ನ ಸುಪ್ರೀಂ ಲೀಡರ್ ಖಮೇನಿಯ ಹತ್ಯೆಯ ನಂತರ, ಸೇಡಿನ ಕಿಚ್ಚು ಹೊತ್ತಿ ಉರಿಯುತ್ತಿದೆ. ಇರಾನ್ ಹಾರ್ಮುಜ್ ಜಲಸಂಧಿಯನ್ನು ಬಂದ್ ಮಾಡಲು ಪ್ರಯತ್ನಿಸುತ್ತಿದ್ದರೆ, ಅಮೆರಿಕ ಅದನ್ನು ತಡೆಯಲು ತನ್ನ ನೌಕಾಪಡೆಯ ಬೃಹತ್ ಯುದ್ಧ ನೌಕೆಗಳನ್ನು ಅರಬ್ಬಿ ಸಮುದ್ರದಲ್ಲಿ ನಿಯೋಜಿಸಿದೆ.

ಜಾಗತಿಕ ತೈಲ ಬೆಲೆಗಳು ಪ್ರತಿ ಕ್ಷಣವೂ ಏರಿಕೆಯಾಗುತ್ತಿದ್ದು, ಇಡೀ ವಿಶ್ವವು ಆರ್ಥಿಕ ಕುಸಿತದ ಆತಂಕದಲ್ಲಿದೆ. ಟ್ರಂಪ್ ಮತ್ತು ಲಾರಿಜಾನಿ ನಡುವಿನ ಈ ನೇರ ಸವಾಲು, ಯುದ್ಧವು ಅಣುಬಾಂಬ್ ಅಥವಾ ಸಂಪೂರ್ಣ ವಿನಾಶದತ್ತ ಸಾಗುತ್ತಿದೆಯೇ ಎಂಬ ಪ್ರಶ್ನೆಯನ್ನು ಹುಟ್ಟುಹಾಕಿದೆ,(ಏಜೆನ್ಸೀಸ್).