ಈ ವೈರಲ್​ ಹುಡ್ಗ ಯಾರು ಗೊತ್ತಾ? ಜೀವನವನ್ನೇ ಬದಲಿಸಿದ ಒಂದೇ ಒಂದು ನಗು, ಟ್ರೋಲಿಗರ ಫೇವರಿಟ್​ ಈತ! Viral Boy

Viral Boy : ಸಾಮಾಜಿಕ ಜಾಲತಾಣದಲ್ಲಿ ಪ್ರತಿನಿತ್ಯ ಸಾವಿರಾರು ವಿಡಿಯೋಗಳು ಹರಿದಾಡುತ್ತಿರುತ್ತವೆ. ಬಹುತೇಕ ವಿಡಿಯೋಗಳಲ್ಲಿ ಅದರಲ್ಲೂ ಟ್ರೋಲ್​ ಅಥವಾ ಕಾಮಿಡಿ ವಿಡಿಯೋಗಳಲ್ಲಿ ಓರ್ವ ಯುವಕನ ನಗುವಿನ ವಿಡಿಯೋ ತುಣುಕು ಮಾತ್ರ ಸಾಮಾನ್ಯವಾಗಿಬಿಟ್ಟಿದೆ. ಆ ಹುಡುಗ ಟೀ ಗ್ಲಾಸ್​ ಹಿಡಿದು, ಹಲ್ಲು ಕಿಸಿದು, ಗಹಗಹಿಸಿ ನಗುವುದನ್ನು ಯಾರೇ ನೋಡಿದರು ಅವರ ಮುಖದಲ್ಲೂ ನಗು ಮೂಡುವುದು ಖಚಿತ. ಪ್ರತಿ ಕಾಮಿಡಿ ವಿಡಿಯೋದಲ್ಲಿ ಈ ಹುಡುಗನ ವಿಡಿಯೋ ತುಣುಕು ಇದ್ದೇ ಇರುತ್ತದೆ. ಆದರೆ, ಈತ ಯಾರೆಂದು ಪ್ರಶ್ನೆ ಮಾಡಿದರೆ, ಬಹುತೇಕ ಮಂದಿಗೆ ಉತ್ತರವೇ ಗೊತ್ತಿಲ್ಲ. ಆ ಪ್ರಶ್ನೆಗೆ ಉತ್ತರವನ್ನು ನಾವಿಂದು ತಿಳಿಸಿಕೊಡುತ್ತೇವೆ.

ಅಂದಹಾಗೆ, ಈ ವಿಡಿಯೋದಲ್ಲಿರುವ ಹುಡುಗನ ಹೆಸರು ಅರುಣ್​​. ಈ ಹುಡುಗ ಪಕ್ಕದ ತೆಲಂಗಾಣ ರಾಜ್ಯದ ನಿವಾಸಿ. ಇಲ್ಲಿನ ಜಯಶಂಕರ್​ ಬೊಪ್ಪಳಪಲ್ಲಿ ಜಿಲ್ಲೆಯ ನಾಲಪ್ಪುಚಟುವಲ್ಲಿ ಗ್ರಾಮದವನು.

ಅಂದಹಾಗೆ ಅರುಣ್​, ಲಾರಿಯಲ್ಲಿ ಸಹಾಯಕನಾಗಿ ಕೆಲಸ ಮಾಡುತ್ತಿದ್ದಾನೆ. ಈತನ ಜತೆಗಿರುವ ಲಾರಿ ಡ್ರೈವರ್​ ಹೆಸರು ನೆಹರು. ಗಮನಾರ್ಹ ಸಂಗತಿ ಏನೆಂದರೆ, ನೀವು ನೋಡುತ್ತಿರುವ ವೈರಲ್​ ವಿಡಿಯೋ ಹಿಂದಿನ ಸೃಷ್ಟಿಕರ್ತನೇ ಈ ನೆಹರು. ಅಂದಹಾಗೆ, ವೈರಲ್​ ವಿಡಿಯೋವನ್ನು ಉದ್ದೇಶಪೂರ್ವಕವಾಗಿ ಸೃಷ್ಟಿಸಿದ್ದಲ್ಲ, ಆಕಸ್ಮಿಕವಾಗಿ ಸೆರೆಯಾದಂತಹ ದೃಶ್ಯವಿದು.

ಚಹಾ ಕುಡಿಯುವಾಗ ನೆಹರು ಅವರು ಒಂದು ಜೋಕ್ಸ್​ ಹೇಳುತ್ತಾರೆ. ಅದನ್ನು ಕೇಳಿ ಅರುಣ್​, ಹೊಟ್ಟೆ ಹುಣ್ಣಾಗುವಷ್ಟು ನಗುತ್ತಾನೆ. ಅದನ್ನು ತಮ್ಮ ಮೊಬೈಲ್​ನಲ್ಲಿ ಸೆರೆಹಿಡಿದ ನೆಹೆರು, ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡರು. ಆ ವಿಡಿಯೋ ವೈರಲ್​ ಆಗಿದ್ದಲ್ಲದೆ, ಇಂದಿಗೂ ಟ್ರೋಲಿಗರ ಫೇವರಿಟ್​ ವಿಡಿಯೋ ಆಗಿ ಉಳಿದಿದೆ. ಇಂದಿಗೂ ಈ ವಿಡಿಯೋ ಕಾಮಿಡಿ ಅಥವಾ ಟ್ರೋಲ್​ ವಿಡಿಯೋಗಳಲ್ಲಿ ಕಾಣಿಸಿಕೊಳ್ಳುತ್ತಲೇ ಇರುತ್ತದೆ.

ಅಂದಹಾಗೆ, ಲಾರಿಯ ಕ್ಲೀನರ್ ಆಗಿ ಕೆಲಸ ಮಾಡುತ್ತಿರುವ ಅರುಣ್​, ನಾಲ್ಕನೇ ತರಗತಿಯವರೆಗೆ ಮಾತ್ರ ಓದಿದ್ದಾನೆ. ಬಡತನದಿಂದ ಅರ್ಧದಲ್ಲೇ ಶಾಲೆ ಬಿಡಬೇಕಾಯಿತು. ಈ ವೇಳೆ ಚಾಲಕ ನೆಹರು ಅರುಣ್​ ಬೆನ್ನಿಗೆ ನಿಂತರು. ಅವರ ಸಹಾಯದಿಂದ ಇದೀಗ 10ನೇ ತರಗತಿ ಪರೀಕ್ಷೆಯನ್ನು ಬರೆದು ಅರುಣ್​ ಪಾಸ್​ ಆಗಿದ್ದಾನೆ ಎಂಬ ವರದಿ ಇದೆ.

ಅಂದಹಾಗೆ, ಈ ವಿಡಿಯೋ ನೆಹರು ಅವರ ಜಾಲತಾಣ ಖಾತೆಯಿಂದ ಅಪ್​ಲೋಡ್​ ಆದ ಕೇವಲ ಒಂದೂವರೆ ತಿಂಗಳಲ್ಲೇ ಸುಮಾರು 40 ಮಿಲಿಯನ್​ ವೀಕ್ಷಣೆಗಳನ್ನು ಪಡೆದುಕೊಂಡಿದೆ. ಈಗ ನೀವು ನೋಡುವ ಯಾವುದೇ ಟ್ರೋಲ್​ ಅಥವಾ ಮೀಮ್ಸ್​ ವಿಡಿಯೋ ಈತನ ನಗುವಿಲ್ಲದೇ ಪೂರ್ಣಗೊಳ್ಳುವುದೇ ಇಲ್ಲ. ಸಾಮಾಜಿಕ ಜಾಲತಾಣವನ್ನು ಒಂದು ಸುತ್ತು ಹಾಕಿ ಬಂದರೆ, ಸಾಕು ರೀಲ್ಸ್​, ಯೂಟ್ಯೂಬ್​ ಶಾರ್ಟ್​ ಸೇರಿದಂತೆ ಬಹುತೇಕ ವಿಡಿಯೋಗಳಲ್ಲಿ ಈತನ ನಗು ಇದ್ದೇ ಇರುತ್ತದೆ.

ಇದೇ ನಗು ಅರುಣ್​ ಅವರ ಲಕ್​ ಸಹ ಬದಲಾಯಿಸಿದೆ. ರಾತ್ರೋರಾತ್ರಿ ಅರುಣ್​ ತೆಲಂಗಾಣದಲ್ಲಿ ಖ್ಯಾತಿ ಪಡೆದಿದ್ದಾನೆ. ಅನೇಕ ಯೂಟ್ಯೂಬ್​ಗಳಿಗೆ ಸಂದರ್ಶನ ಸಹ ನೀಡಿದ್ದಾನೆ. ತನ್ನ ನಗುವಿನ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾನೆ. ತನ್ನ ಜೀವನ ಪಯಣವನ್ನು ತೆರೆದಿಟ್ಟಿದ್ದಾನೆ. ಇದಿಷ್ಟೇ ಅಲ್ಲದೆ, ತಾನೇ ಒಂದು ಇನ್​ಸ್ಟಾಗ್ರಾಂ ಅಕೌಂಟ್​ ಮಾಡಿ, ಕಾಮಿಡಿ ವಿಡಿಯೋಗಳನ್ನು ಮಾಡುತ್ತಿದ್ದಾನೆ. ನಗುವಿಗೆ ಇರುವ ಶಕ್ತಿ ಏನು ಗೊತ್ತಾ ಎಂಬ ಪ್ರಶ್ನೆಗೆ ಅರುಣ್​ ಇಂದು ಉತ್ತರವಾಗಿ ನಿಂತಿದ್ದಾರೆ, (ಏಜೆನ್ಸೀಸ್​).