ಪರಮಾಣು ಅಸ್ತ್ರ ಇನ್ನು ಮರೀಚಿಕೆ...ಇರಾನ್ ಮಿಲಿಟರಿ ಶಕ್ತಿ ನುಚ್ಚುನೂರಾಗಿದೆ ಎಂದ ಟ್ರಂಪ್​ | Donald Trump

ಶ್ವೇತಭವನದಲ್ಲಿ ರಾಷ್ಟ್ರವನ್ನುದ್ದೇಶಿಸಿ ಮಾತನಾಡಿದ ಟ್ರಂಪ್​, ತಮ್ಮ ಕಾರ್ಯಾಚರಣೆಯ ಯಶಸ್ಸನ್ನು ವಿವರಿಸಿದರು. ಅಮೆರಿಕವು ಅತ್ಯಂತ ಶೀಘ್ರವಾಗಿ ಈ ಕೆಲಸವನ್ನು ಮುಗಿಸಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.

ಇರಾನ್‌ನ ಆಕ್ರಮಣಕಾರಿ ಕ್ಷಿಪಣಿ ಸಾಮರ್ಥ್ಯಗಳನ್ನು ನಾಶಪಡಿಸುವುದು ಮತ್ತು ಅವುಗಳ ಉತ್ಪಾದನಾ ವ್ಯವಸ್ಥೆಗಳನ್ನು ಸಂಪೂರ್ಣವಾಗಿ ಕಿತ್ತುಹಾಕುವುದು ಈ ಕಾರ್ಯಾಚರಣೆಯ ಮೊದಲ ಆದ್ಯತೆಯಾಗಿತ್ತು ಎಂದಿರುವ ಟ್ರಂಪ್​, ಇರಾನ್‌ನ ನೌಕಾಪಡೆ ಮತ್ತು ವಿಶಾಲವಾದ ಭದ್ರತಾ ಮೂಲಸೌಕರ್ಯವನ್ನು ತಟಸ್ಥಗೊಳಿಸುವ ಮೂಲಕ ಆ ದೇಶವು ಭವಿಷ್ಯದಲ್ಲಿ ಎಂದಿಗೂ ಪರಮಾಣು ಶಸ್ತ್ರಾಸ್ತ್ರಗಳನ್ನು ಪಡೆಯದಂತೆ ನೋಡಿಕೊಳ್ಳುವುದು ತಮ್ಮ ಸರ್ಕಾರದ ಮುಖ್ಯ ಗುರಿಯಾಗಿದೆ ಎಂದು ಪುನರುಚ್ಚರಿಸಿದರು.

ಮುಂದಿನ ಎರಡು-ಮೂರು ವಾರಗಳಲ್ಲಿ ಇರಾನ್​ ವಿರುದ್ಧದ ಅಮೆರಿಕದ ದಾಳಿ ಮತ್ತಷ್ಟು ತೀವ್ರಗೊಳ್ಳಲಿದೆ ಎಂದಿರುವ ಟ್ರಂಪ್​, ಇರಾನ್ ದೇಶವನ್ನು ಶಿಲಾಯುಗಕ್ಕೆ ತಳ್ಳುವಷ್ಟು ಕಠಿಣವಾದ ಕ್ರಮಗಳನ್ನು ಕೈಗೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಿದರು. ಇರಾನ್‌ನ ನೌಕಾಪಡೆ ಈಗಾಗಲೇ ಕಣ್ಮರೆಯಾಗಿದ್ದು, ವಾಯುಪಡೆ ಸಂಪೂರ್ಣವಾಗಿ ನಾಶವಾಗಿದೆ ಎಂದು ತಿಳಿಸಿದರು. ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್‌ನ ಮೇಲಿನ ನಾಯಕತ್ವದ ನಿಯಂತ್ರಣ ತಪ್ಪಿದ್ದು, ಕ್ಷಿಪಣಿ ಮತ್ತು ಡ್ರೋನ್ ಉಡಾಯಿಸುವ ಅವರ ಶಕ್ತಿ ಈಗ ಕುಸಿದಿದೆ. ಶಸ್ತ್ರಾಸ್ತ್ರ ಕಾರ್ಖಾನೆಗಳು ಮತ್ತು ರಾಕೆಟ್ ಲಾಂಚರ್‌ಗಳು ಧೂಳೀಪಟವಾಗಿವೆ ಎಂದರು.

ಅಮೆರಿಕದ ಹಿಂದಿನ ಐತಿಹಾಸಿಕ ಯುದ್ಧಗಳಿಗೆ ಹೋಲಿಸಿದರೆ ಈ ಕಾರ್ಯಾಚರಣೆಯು ಅತ್ಯಂತ ಕಡಿಮೆ ಅವಧಿಯಲ್ಲಿ ದೊಡ್ಡ ಮಟ್ಟದ ಯಶಸ್ಸು ಕಂಡಿದೆ ಎಂದು ಬಣ್ಣಿಸಿರುವ ಅಮೆರಿಕಾ ಅಧ್ಯಕ್ಷರು, ಮೊದಲ ಮಹಾಯುದ್ಧ, ಎರಡನೇ ಮಹಾಯುದ್ಧ, ವಿಯೆಟ್ನಾಂ ಮತ್ತು ಇರಾಕ್ ಯುದ್ಧಗಳು ವರ್ಷಗಳ ಕಾಲ ನಡೆದಿದ್ದವು. ಆದರೆ ಇರಾನ್‌ನಲ್ಲಿ ಕೇವಲ 32 ದಿನಗಳ ಕಾರ್ಯಾಚರಣೆಯ ಮೂಲಕ ಆ ದೇಶವನ್ನು ಸಂಪೂರ್ಣವಾಗಿ ಹತ್ತಿಕ್ಕಲಾಗಿದೆ ಮತ್ತು ಅದು ಇನ್ನು ಮುಂದೆ ದೊಡ್ಡ ಬೆದರಿಕೆಯಾಗಿ ಉಳಿದಿಲ್ಲ. ತಮ್ಮ ದೇಶದ ಮಿಲಿಟರಿ ಶಕ್ತಿ ಅತ್ಯಂತ ವೇಗವಾಗಿ ಮತ್ತು ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸಿ ಈ ಸಾಧನೆ ಮಾಡಿದೆ ಎಂದು ಟ್ರಂಪ್​ ಅಭಿಪ್ರಾಯಪಟ್ಟಿದ್ದಾರೆ(ಏಜೆನ್ಸೀಸ್​​).