ಸಲಿಂಗಕಾಮಿಗಳಾಗಿ ಬದಲಾಗುತ್ತಿರುವ ಪಾಕ್​, ಬಾಂಗ್ಲಾದ ವಿದ್ಯಾರ್ಥಿಗಳು: ತನಿಖೆಯಲ್ಲಿ ಬಯಲಾಯ್ತು ಭಯಾನಕ ಸತ್ಯ! UK Asylum

UK Asylum : ಬ್ರಿಟನ್‌ನಲ್ಲಿ ಇತ್ತೀಚೆಗೆ ಬಯಲಾದ ಆಘಾತಕಾರಿ ಜಾಲವೊಂದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರೀ ಸಂಚಲನ ಮೂಡಿಸಿದೆ. ವೀಸಾ ಅವಧಿ ಮುಗಿಯುವ ಹಂತದಲ್ಲಿರುವ ಪಾಕಿಸ್ತಾನ ಮತ್ತು ಬಾಂಗ್ಲಾದೇಶದ ವಲಸಿಗರು, ಬ್ರಿಟನ್‌ನಲ್ಲಿ ನೆಲೆಸಲು ಸಲಿಂಗಕಾಮಿಗಳು (Gay) ಎಂದು ಸುಳ್ಳು ಹೇಳುವ ಮೂಲಕ ಅಕ್ರಮವಾಗಿ ಆಶ್ರಯ ಪಡೆಯಲು ಯತ್ನಿಸುತ್ತಿರುವುದು ರಹಸ್ಯ ಕಾರ್ಯಾಚರಣೆಯಲ್ಲಿ ಬೆಳಕಿಗೆ ಬಂದಿದೆ. ಸುಳ್ಳು ಕಥೆಗಳನ್ನು ಕಟ್ಟುವುದು ಮತ್ತು ನಕಲಿ ದಾಖಲೆಗಳನ್ನು ಸೃಷ್ಟಿಸುವ ಮೂಲಕ ಕಾನೂನಿನ ಕಣ್ಣಿಗೆ ಮಣ್ಣೆರಚಲು ಇವರಿಗೆ ವ್ಯವಸ್ಥಿತ ತರಬೇತಿ ನೀಡಲಾಗುತ್ತಿದ್ದು, ಈ ಬೆಳವಣಿಗೆಯು ಬ್ರಿಟನ್‌ನ ವಲಸೆ ನೀತಿ ಮತ್ತು ರಾಷ್ಟ್ರೀಯ ಭದ್ರತೆಯ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

ಪಾಕಿಸ್ತಾನ ಮತ್ತು ಬಾಂಗ್ಲಾದೇಶದಂತಹ ದೇಶಗಳಲ್ಲಿ ಸಮಲಿಂಗಕಾಮ ಅಪರಾಧವಾಗಿರುವುದರಿಂದ, ಅಲ್ಲಿನ ವಲಸಿಗರು ತಾವು 'ಗೇ' ಎಂದು ಸುಳ್ಳು ಹೇಳುವ ಮೂಲಕ ಬ್ರಿಟನ್‌ನಲ್ಲಿ ಆಶ್ರಯ ಪಡೆಯಲು ಯತ್ನಿಸುತ್ತಿದ್ದಾರೆ. ಒಂದು ವೇಳೆ ತಮ್ಮ ದೇಶಕ್ಕೆ ಮರಳಿದರೆ ಪ್ರಾಣಕ್ಕೆ ಅಪಾಯವಿದೆ ಎಂಬ ಕಟ್ಟುಕಥೆಯನ್ನು ಸೃಷ್ಟಿಸಲು ಇವರಿಂದ ಸಾವಿರಾರು ಪೌಂಡ್ ಹಣವನ್ನು ವಸೂಲಿ ಮಾಡಲಾಗುತ್ತಿದೆ ಎಂಬ ಆಘಾತಕಾರಿ ಅಂಶ ತನಿಖೆಯಿಂದ ತಿಳಿದುಬಂದಿದೆ.

ನಿಜವಾಗಿ ಸಂಕಷ್ಟದಲ್ಲಿರುವವರನ್ನು ರಕ್ಷಿಸುವುದು ಬ್ರಿಟನ್‌ನ ಆಶ್ರಯ ನೀತಿಯ ಉದ್ದೇಶವಾಗಿದೆ. ಆದರೆ, ತನಿಖಾ ಸಂಸ್ಥೆಗಳ ಪ್ರಕಾರ, ಕೆಲವು ವಲಸಿಗರು ಲೈಂಗಿಕತೆ ಮಾತ್ರವಲ್ಲದೆ ಧರ್ಮ ಮತ್ತು ರಾಜಕೀಯ ಕಿರುಕುಳದ ಹೆಸರಿನಲ್ಲೂ ನಕಲಿ ದಾಖಲೆಗಳನ್ನು ಸೃಷ್ಟಿಸಿ ವ್ಯವಸ್ಥಿತವಾಗಿ ವಂಚಿಸುತ್ತಿದ್ದಾರೆ. ಈ ಮೂಲಕ ಅರ್ಹರಿಗೆ ಸಿಗಬೇಕಾದ ರಕ್ಷಣೆಯನ್ನು ಅಕ್ರಮವಾಗಿ ಪಡೆಯಲು ಪ್ರಯತ್ನಿಸಲಾಗುತ್ತಿದೆ ಎಂದು ವರದಿ ತಿಳಿಸಿದೆ.

ಈ ವಂಚನೆಯ ಜಾಲವು ಅತ್ಯಂತ ದೊಡ್ಡ ಮಟ್ಟದಲ್ಲಿ ಹರಡಿಕೊಂಡಿದ್ದು, ವೀಸಾ ಅವಧಿ ಮುಗಿದವರು ಸಲ್ಲಿಸುತ್ತಿರುವ ಆಶ್ರಯ ಅರ್ಜಿಗಳ ಪ್ರಮಾಣ ಶೇ. 35ಕ್ಕೆ ಏರಿಕೆಯಾಗಿದೆ. 2025ರ ವೇಳೆಗೆ ಇಂತಹ ಅರ್ಜಿಗಳ ಸಂಖ್ಯೆ ಒಂದು ಲಕ್ಷವನ್ನು ದಾಟುವ ಅಂದಾಜಿದೆ. ಅಧಿಕೃತ ಅಂಕಿಅಂಶಗಳ ಪ್ರಕಾರ, ಲೈಂಗಿಕ ದೃಷ್ಟಿಕೋನದ ಆಧಾರದ ಮೇಲೆ ಆಶ್ರಯ ಕೋರುವವರ ಪಟ್ಟಿಯಲ್ಲಿ ಪಾಕಿಸ್ತಾನ ಮೊದಲ ಸ್ಥಾನದಲ್ಲಿದ್ದರೆ, ಬಾಂಗ್ಲಾದೇಶ, ನೈಜೀರಿಯಾ, ಭಾರತ ಮತ್ತು ಉಗಾಂಡಾ ನಂತರದ ಸ್ಥಾನಗಳಲ್ಲಿವೆ.

ಈ ಅಕ್ರಮಗಳ ವಿರುದ್ಧ ಬ್ರಿಟನ್ ಗೃಹ ಸಚಿವಾಲಯವು ಕಠಿಣ ಎಚ್ಚರಿಕೆ ನೀಡಿದೆ. ವ್ಯವಸ್ಥೆಯನ್ನು ದುರ್ಬಳಕೆ ಮಾಡಿಕೊಳ್ಳುವವರ ವಿರುದ್ಧ ಕಟ್ಟುನಿಟ್ಟಿನ ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ತಿಳಿಸಿರುವ ಸರ್ಕಾರ, ಸುಳ್ಳು ಮಾಹಿತಿ ನೀಡಿ ಆಶ್ರಯ ಪಡೆಯಲು ಯತ್ನಿಸುವವರನ್ನು ಬ್ರಿಟನ್‌ನಿಂದ ಗಡಿಪಾರು ಮಾಡಲಾಗುವುದು ಎಂದು ಸ್ಪಷ್ಟಪಡಿಸಿದೆ.

ವಿರೋಧ ಪಕ್ಷದ ಕನ್ಸರ್ವೇಟಿವ್ ನಾಯಕ ಕ್ರಿಸ್ ಫಿಲಿಪ್ಸ್ ಈ ಬೆಳವಣಿಗೆಯನ್ನು ತೀವ್ರವಾಗಿ ಖಂಡಿಸಿದ್ದಾರೆ. ಪ್ರಸ್ತುತ ಆಶ್ರಯ ವ್ಯವಸ್ಥೆಯು ಸಂಪೂರ್ಣವಾಗಿ ಹದಗೆಟ್ಟಿದ್ದು, ಇದನ್ನು ಪೂರ್ಣ ಪ್ರಮಾಣದಲ್ಲಿ ಶುದ್ಧೀಕರಿಸುವ ಅಗತ್ಯವಿದೆ ಎಂದು ಅವರು ಆಗ್ರಹಿಸಿದ್ದಾರೆ. ನಿಜವಾಗಿಯೂ ವೈಯಕ್ತಿಕ ಕಿರುಕುಳ ಮತ್ತು ದೌರ್ಜನ್ಯ ಅನುಭವಿಸುತ್ತಿರುವವರಿಗೆ ಮಾತ್ರ ಈ ಯೋಜನೆಯಡಿ ರಕ್ಷಣೆ ಸಿಗಬೇಕು ಎಂಬುದು ಅವರ ಅಭಿಪ್ರಾಯವಾಗಿದೆ, (ಏಜೆನ್ಸೀಸ್​).