ಟ್ರಂಪ್‌ ವೀಸಾ ಬಾಂಬ್: 75 ದೇಶಗಳ ನಾಗರಿಕರಿಗೆ ಅಮೆರಿಕ ಎಂಟ್ರಿ ಬಂದ್! ಭಾರತಕ್ಕಿದೆಯೇ ಆತಂಕ? Visa

ಅಮೆರಿಕ: ಜಗತ್ತಿನ ವಿವಿಧ ದೇಶಗಳಿಗೆ ಬೆದರಿಕೆ ಒಡ್ಡುತ್ತಿದ್ದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈದೀಗ ಹೊಸದೊಂದು ಬಾಂಬ್​ ಸಿಡಿಸಿದ್ದಾರೆ. ​ಅಮೆರಿಕವು 75 ದೇಶಗಳ ಅರ್ಜಿದಾರರಿಗೆ ವೀಸಾ (Visa) ಪ್ರಕ್ರಿಯೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದೆ ಎಂದು ಆಂತರಿಕ ವಿದೇಶಾಂಗ ಇಲಾಖೆಯು ಜ್ಞಾಪಕ ಪತ್ರವನ್ನು ಬಿಡುಗಡೆ ಮಾಡಿದೆ.

ಅಮೆರಿಕ ಜತೆಗೆ ಒಳ್ಳೇಯ ಸಂಬಂಧ ಹೊಂದಿರದ ದೇಶಗಳಿಂದ ವಲಸೆ ಬರುವವರನ್ನು ತಡೆಯುವ ಉದ್ದೇಶದಿಂದ ಈ ಆದೇಶವನ್ನು ಹೊರಡಿಸಲಾಗಿದೆ. ಈ ನಿರ್ಬಂಧಗಳು ಜನವರಿ 21 ರಿಂದ ಜಾರಿಗೆ ಬರುವ ನಿರೀಕ್ಷೆಯಿದ್ದು, ಅನಿರ್ದಿಷ್ಟ ಅವಧಿಗೆ ಜಾರಿಯಲ್ಲಿರಲಿದೆ. ಈ ಪಟ್ಟಿಯಲ್ಲಿ ಇರಾನ್, ರಷ್ಯಾ, ಅಫ್ಘಾನಿಸ್ತಾನ, ಇರಾಕ್, ನೈಜೀರಿಯಾ, ಬ್ರೆಜಿಲ್ ಮತ್ತು ಪಾಕಿಸ್ತಾನ ಸೇರಿವೆ ಎಂದು ಹೇಳಲಾಗುತ್ತಿದೆ.

ವರದಿಗಳ ಪ್ರಕಾರ, ವಿದೇಶಾಂಗ ಇಲಾಖೆಯು ಸ್ಕ್ರೀನಿಂಗ್ ಮತ್ತು ಪರಿಶೀಲನಾ ಪ್ರಕ್ರಿಯೆಗಳ ಮರುಮೌಲ್ಯಮಾಪನವನ್ನು ನಡೆಸುತ್ತಿರುವಾಗ, ಅಸ್ತಿತ್ವದಲ್ಲಿರುವ ಕಾನೂನು ನಿಬಂಧನೆಗಳ ಅಡಿಯಲ್ಲಿ ವೀಸಾಗಳನ್ನು ನಿರಾಕರಿಸಲು ಜ್ಞಾಪಕ ಪತ್ರವು ಅಮೆರಿಕದ ರಾಯಭಾರ ಕಚೇರಿಗಳಿಗೆ ನಿರ್ದೇಶಿಸುತ್ತದೆ. ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅಧಿಕಾರಕ್ಕೆ ಮರಳಿದ ನಂತರ ಈ ಕ್ರಮವು ಆಡಳಿತದ ವ್ಯಾಪಕ ವಲಸೆ ತಡೆ ಅಭಿಯಾನದ ಭಾಗವಾಗಿದೆ ಎಂದು ಹೇಳಲಾಗಿದೆ.

ಪಟ್ಟಿಯಲ್ಲಿ ಹಲವಾರು ಹೈ-ಫೋಕಸ್ ಪ್ರದೇಶಗಳಿವೆ ಎಂದು ವರದಿಗಳು ಹೇಳುತ್ತಿದ್ದು, ಅವುಗಳಲ್ಲಿ ಸೊಮಾಲಿಯಾ, ಈಜಿಪ್ಟ್, ಥೈಲ್ಯಾಂಡ್ ಮತ್ತು ಯೆಮೆನ್‌ನಂತಹ ಹೆಸರುಗಳನ್ನು ಸಹ ಉಲ್ಲೇಖಿಸಲಾಗಿದೆ. ಈ ಪಟ್ಟಿಯಲ್ಲಿ ಭಾರತ ಸೇರಿಲ್ಲ ಎಂದು ಹೇಳಲಾಗಿದೆ.

ಸಾರ್ವಜನಿಕ ಕಲ್ಯಾಣ ವ್ಯವಸ್ಥೆಗಳ ಲಾಭ ಪಡೆಯುವ ಸಾಧ್ಯತೆಯಿರುವವರನ್ನು ನಿರ್ಬಂಧಿಸಲು ಅಮೆರಿಕ ಈ ಅಧಿಕಾರವನ್ನು ಬಳಸುತ್ತದೆ ಎಂದು ವಿದೇಶಾಂಗ ಇಲಾಖೆಯ ವಕ್ತಾರ ಟಾಮಿ ಪಿಗೋಟ್ ಹೇಳಿದ್ದಾರೆ. ಸಾರ್ವಜನಿಕ ಪ್ರಯೋಜನಗಳ ಅವಲಂಬನೆ ದೃಷ್ಟಿಕೋನದಿಂದ ಹೆಚ್ಚಿನ ಅಪಾಯವೆಂದು ನಿರ್ಣಯಿಸಲಾದ ಅರ್ಜಿಗಳನ್ನು ವಜಾಮಾಡುವ ಗುರಿಯನ್ನು ಹೊಂದಿದೆ ಎಂದು ಅವರು ಹೇಳಿದರು.

ಮೊದಲಿಂದಲೂ ಅಮೆರಿಕದ ವೀಸಾ ಪಡೆಯುವ ಪ್ರಕ್ರಿಯೆ ಜಟಿಲವಾಗಿದ್ದರೂ ಸಹ, ಈಗ ಹೇರಿರುವಂತೆ ನೇರ ನಿಬಂಧ ಇರಲಿಲ್ಲ. ಅಭ್ಯರ್ಥಿಯ ಹಿನ್ನಲೆ ಮತ್ತು ಅಮೆರಿಕಾಗೆ ಯಾವ ಉದ್ದೇಶಕ್ಕಾಗಿ ಬರುತ್ತಿದ್ದಾರೆ ಎನ್ನುವುದನ್ನು ಅಷ್ಟೇ ಪರಿಗಣಿಸಲಾಗುತ್ತಿತ್ತು.

ಆದರೆ ಈಗ,ಅಮೆರಿಕದ ವೀಸಾ ಪಡೆಯ ಬಯಸುವ ಅರ್ಜಿದಾರರು ಸರ್ಕಾರಿ ಬೆಂಬಲವನ್ನು ಅವಲಂಬಿಸುವ ಸಾಧ್ಯತೆಯಿದೆಯೇ ಎಂದು ನಿರ್ಧರಿಸಲು ಅಧಿಕಾರಿಗಳು ಆರೋಗ್ಯ ಸ್ಥಿತಿ, ವಯಸ್ಸು, ಇಂಗ್ಲಿಷ್ ಪ್ರಾವೀಣ್ಯತೆ ಮತ್ತು ದೀರ್ಘಕಾಲೀನ ವೈದ್ಯಕೀಯ ಆರೈಕೆಯ ಸಂಭಾವ್ಯ ಅಗತ್ಯತೆಯಂತಹ ಅಂಶಗಳನ್ನು ಮೌಲ್ಯಮಾಪನ ಮಾಡಬಹುದು ಎಂದು ನೂತನ ನಿಯಮ ಹೇಳುತ್ತದೆ.

ಈ ಬೆಳವಣಿಗೆಯು ಪೀಡಿತ ದೇಶಗಳ ಅರ್ಜಿದಾರರಿಗೆ, ವಿಶೇಷವಾಗಿ ಕೆಲಸ, ಅಧ್ಯಯನ ಮತ್ತು ದೀರ್ಘಾವಧಿಯ ವಾಸ್ತವ್ಯಕ್ಕಾಗಿ ವೀಸಾಗಳನ್ನು ಬಯಸುವವರಿಗೆ ಪ್ರಯಾಣ ಯೋಜನೆಗಳ ಮೇಲೆ ಪರಿಣಾಮ ಬೀರುತ್ತದೆ ಎಂದು ನಿರೀಕ್ಷಿಸಲಾಗಿದೆ,(ಏಜನ್ಸೀಸ್).