ಮೇಯರ್​ ಹುದ್ದೆಗಾಗಿ ಗುಜರಾತಿ ನಾಯಕರ ಪಾದದ ಬಳಿ ಕುಳಿತುಕೊಳ್ಳಲು ಸಹ ಅವರು ಹಿಂಜರಿಯುವುದಿಲ್ಲ; ಡಿಸಿಎಂ ಶಿಂಧೆ ವಿರುದ್ಧ ಸಂಸದ ರಾವತ್​ ಕಿಡಿ | Sanjay Raut

ಮುಂಬೈನಲ್ಲಿ ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ರಾವತ್, ಮೈತ್ರಿಕೂಟದೊಳಗಿನ ಶಿಂಧೆ ರಾಜಕೀಯ ನಿಲುವಿನ ಬಗ್ಗೆ ಕಟು ಪದಗಳಲ್ಲಿ ಟೀಕಸಿದರು. ಮೇಯರ್ ಹುದ್ದೆಗೆ ಶಿಂಧೆ ಬಗ್ಗೆ ಯಾರೂ ಕಾಳಜಿ ವಹಿಸುವುದಿಲ್ಲ. ಶಿವಸೇನೆ ಎಂದು ಕರೆದುಕೊಳ್ಳುವ, ಬಾಳಾಸಾಹೇಬ್ ಠಾಕ್ರೆಯವರ ಫೋಟೋ ಹಾಕುವ, ಮುಂಬೈ ಮೇಯರ್ ಹುದ್ದೆಗೆ ಗುಜರಾತಿ ನಾಯಕರ ಪಾದಗಳ ಬಳಿ ಕುಳಿತುಕೊಳ್ಳುವ ವ್ಯಕ್ತಿಗಳಿಗಿಂತ ಅವಮಾನದ ಘಟನೆ ಇನ್ನೊಂದಿಲ್ಲ ಎಂದು ಹೇಳಿದರು.

ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ಸದ್ಯ ಸ್ವಿಟ್ಜರ್ಲೆಂಡ್‌ನ ದಾವೋಸ್‌ನಲ್ಲಿ ನಡೆಯುತ್ತಿರುವ ವಿಶ್ವ ಆರ್ಥಿಕ ವೇದಿಕೆಯಲ್ಲಿ ಭಾಗವಹಿಸುತ್ತಿರುವುದರಿಂದ, ಇಲ್ಲಿನ ಅವರ ಅನುಪಸ್ಥಿತಿ ಮೇಯರ್ ಘೋಷಣೆಯಲ್ಲಿನ ವಿಳಂಬಕ್ಕೆ ಕಾರಣವಾಗಿದೆ ಎಂದು ರಾವತ್ ಹೇಳಿದರು. ಫಡ್ನವೀಸ್​ ಭೇಟಿಯನ್ನು ಪ್ರಶ್ನಿಸಿದ ಯುಬಿಟಿ ಸಂಸದ, ಭಾರತೀಯ ಕಂಪನಿಗಳೊಂದಿಗೆ ಒಪ್ಪಂದಗಳಿಗೆ ಮುಂಬೈನಲ್ಲಿಯೇ ಸಹಿ ಮಾಡಬಹುದಿತ್ತು ಎಂದರು.

ಮುಖ್ಯಮಂತ್ರಿಗಳು ದಾವೋಸ್‌ನಲ್ಲಿ ಪಿಕ್ನಿಕ್ ಮಾಡುತ್ತಿದ್ದಾರೆ, ಪ್ರವಾಸ ಮುಗಿದ ಬಳಿಕವೇ ಮೇಯರ್ ಚುನಾವಣೆಯತ್ತ ಗಮನ ಹರಿಸಲಾಗುವುದು, ನಾಯಕರುಗಳು ವಿದೇಶ ಪ್ರವಾಸಕ್ಕಾಗಿ ಮಾಡಿದ ವೆಚ್ಚವನ್ನು ರಾಜ್ಯ ಸರ್ಕಾರ ಬಹಿರಂಗಪಡಿಸಬೇಕೆಂದು ರಾವತ್​ ಒತ್ತಾಯಿಸಿದರು. ಭಾರತೀಯ ದೃಷ್ಟಿಕೋನದಿಂದ ದಾವೋಸ್ ಶೃಂಗಸಭೆಯನ್ನು ಹಾಸ್ಯಾಸ್ಪದ ಎಂದು ಕರೆದ ರಾವತ್, ತೆರಿಗೆದಾರರ ಹಣವನ್ನು ವಿದೇಶ ಪ್ರವಾಸಗಳಿಗೆ ಬಳಸಲಾಗುತ್ತಿದೆ ಮತ್ತು ದೇಶದೊಳಗೆ ಇದೇ ರೀತಿಯ ಕಾರ್ಯಕ್ರಮಗಳನ್ನು ನಡೆಸಬಹುದು ಎಂದು ಹೇಳಿದರು.

ಕಲ್ಯಾಣ್-ಡೊಂಬಿವ್ಲಿ ಮುನ್ಸಿಪಲ್ ಕಾರ್ಪೊರೇಷನ್‌ನ ಇಬ್ಬರು ಶಿವಸೇನೆ (ಯುಬಿಟಿ) ಕಾರ್ಪೊರೇಟರ್‌ಗಳು ಸಂಪರ್ಕಕ್ಕೆ ಸಿಗದೆ ಹೋಗಿದ್ದಾರೆ ಎನ್ನುವ ಸುದ್ದಿಗಳಿಗೆ ಪ್ರತಿಕ್ರಿಯೆ ನೀಡಿದ ರಾವತ್​, ಪಕ್ಷವು ಅವರ ವಿರುದ್ಧ ಕಾನೂನು ಕ್ರಮಗಳನ್ನು ಪ್ರಾರಂಭಿಸಿದೆ, ಅನರ್ಹತೆ ಪ್ರಕ್ರಿಯೆಗಳು ನಡೆಯುತ್ತಿವೆ. ಆ ಪ್ರಕ್ರಿಯೆ ಪೂರ್ಣಗೊಂಡ ಬಳಿಕ ಅವರು ಎಲ್ಲಿ ಬೇಕಾದರೂ ಹೋಗಬಹುದು ಎಂದು ಹೇಳಿದರು.

ಬಿಎಂಸಿ ಚುನಾವಣೆಯಲ್ಲಿ ಬಿಜೆಪಿ-ಸೇನಾ ಮಹಾಯುತಿ ಸ್ಪಷ್ಟ ಗೆಲುವು ಸಾಧಿಸಿದ್ದರೂ, ಮೇಯರ್ ಆಯ್ಕೆ ಇನ್ನೂ ಅಂತಿಮಗೊಂಡಿಲ್ಲ. 227 ಸದಸ್ಯರ ನಗರ ಪಾಲಿಕೆಯಲ್ಲಿ ಬಿಜೆಪಿ 89 ಸ್ಥಾನಗಳೊಂದಿಗೆ ಏಕೈಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದರೆ, ಶಿಂಧೆ ನೇತೃತ್ವದ ಶಿವಸೇನೆ ಏಷ್ಯಾದ ಅತ್ಯಂತ ಶ್ರೀಮಂತ ಪುರಸಭೆಯ ಮೇಲೆ ತನ್ನ ದೀರ್ಘಕಾಲದ ನಿಯಂತ್ರಣವನ್ನು ಉಳಿಸಿಕೊಳ್ಳಲು ತುದಿಗಾಲ ಮೇಲೆ ನಿಂತಿದೆ(ಏಜೆನ್ಸೀಸ್​).