ಮುಕೇಶ್​ ಅಂಬಾನಿಯ ಅಂಟಿಲಿಯಾದಲ್ಲಿದೆ ಒಂದು ವಿಶೇಷ ಕೊಠಡಿ: ಇಲ್ಲಿ ವಾರಕ್ಕೆ ಬೇಕು 200 ಲೀಟರ್ ನೀರು! ಏನಿದರ ವಿಶೇಷತೆ? Antilia

ನವದೆಹಲಿ: ಭಾರತದ ಅತ್ಯಂತ ಶ್ರೀಮಂತ ವ್ಯಕ್ತಿ ಮುಕೇಶ್ ಅಂಬಾನಿ ಅವರ ಬಹುಕೋಟಿ ಮೌಲ್ಯದ ಐಷಾರಾಮಿ ಬಂಗಲೆ 'ಅಂಟಿಲಿಯಾ' ( Antilia ) ಪ್ರಪಂಚದಾದ್ಯಂತ ತನ್ನ ಅದ್ಭುತ ವಾಸ್ತುಶಿಲ್ಪ ಮತ್ತು ವೈಭೋಗಕ್ಕೆ ಹೆಸರುವಾಸಿ. ಆದರೆ, ಈ ಭವ್ಯ ಮಹಲಿನೊಳಗೆ ಶ್ರೀಮಂತರಿಗೆ ಮಾತ್ರ ಪ್ರವೇಶವಿರುವ ಅತ್ಯಂತ ವಿಸ್ಮಯಕಾರಿ ಮತ್ತು ಅಪರೂಪದ ಕೊಠಡಿಯೊಂದಿದೆ!

ಹೌದು, ಮುಂಬೈನ ಕಡುಬಿಸಿಲಿನಿಂದ ತಂಪಾಗಲು ಅಂಬಾನಿ ಕುಟುಂಬ ನಿರ್ಮಿಸಿಕೊಂಡಿರುವ 'ಸ್ನೋ ರೂಮ್' (ಹಿಮದ ಕೊಠಡಿ) ಒಳಗಿಳಿದರೆ ಕೃತಕವಾಗಿ ಬೀಳುವ ಹಿಮಪಾತವು ಸಾಕ್ಷಾತ್ ಕಾಶ್ಮೀರ ಅಥವಾ ಆಲ್ಪ್ಸ್ ಪರ್ವತಗಳ ಸಾಲಿನಲ್ಲಿ ನಿಂತಂತಹ ಅನುಭವ ನೀಡುತ್ತದೆ. ಈ ಅದ್ಭುತ ಹಿಮದ ಜಗತ್ತನ್ನು ಸೃಷ್ಟಿಸಲು ಮತ್ತು ನಿರಂತರವಾಗಿ ಕೃತಕ ಹಿಮ ಉತ್ಪಾದಿಸಲು ವಾರಕ್ಕೆ ಬರೋಬ್ಬರಿ 200 ಲೀಟರ್‌ಗೂ ಹೆಚ್ಚು ನೀರನ್ನು ಬಳಸಲಾಗುತ್ತದೆ ಎಂದರೆ ನೀವು ನಂಬಲೇಬೇಕು! ಪ್ರಕೃತಿಯ ನಿಯಮವನ್ನೇ ಸವಾಲಾಗಿ ಸ್ವೀಕರಿಸಿ ಮನೆಯೊಳಗೇ ಹಿಮಪ್ರಪಂಚವನ್ನೇ ಸೃಷ್ಟಿಸಿರುವ ಈ ಅಂಬಾನಿ ಮನೆಯ ರಹಸ್ಯ ಕೊಠಡಿಯ ಸಂಪೂರ್ಣ ರೋಚಕ ವಿವರ ಇಲ್ಲಿದೆ.

ಅಂದಹಾಗೆ, ಸ್ನೋ ರೂಮ್​ ಚಳಿಗಾಲದ ವಾತಾವರಣ ಮತ್ತು ತಂಪಾದ ಹವಾಮಾನವನ್ನು ಮರುಸೃಷ್ಟಿಸಲು (ಕೃತಕವಾಗಿ ನಿರ್ಮಿಸಲು) ವಿನ್ಯಾಸಗೊಳಿಸಲಾದ ಅತ್ಯಾಧುನಿಕ ಕೊಠಡಿಗಳಾಗಿವೆ. ಇತ್ತೀಚಿನ ದಿನಗಳಲ್ಲಿ ಇಂತಹ ಕೊಠಡಿಗಳು ಅತ್ಯುನ್ನತ ಐಷಾರಾಮಿ ಜೀವನಶೈಲಿ ಹಾಗೂ ಪ್ರತಿಷ್ಠೆಯ ಸಂಕೇತವಾಗಿ ಹೊರಹೊಮ್ಮಿವೆ. ಜಾಗತಿಕ ತಾಪಮಾನ ಏರಿಕೆಯಿಂದಾಗಿ ಕಂಗಾಲಾಗಿರುವ ಅಮೆರಿಕ ಮತ್ತು ಯುರೋಪ್ ದೇಶಗಳ ಅನೇಕ ಶ್ರೀಮಂತರು, ದಿನೇದಿನೇ ಹೆಚ್ಚುತ್ತಿರುವ ತಾಪಮಾನದಿಂದ ತಪ್ಪಿಸಿಕೊಳ್ಳಲು ಹಾಗೂ ತಮ್ಮ ಮನೆಗಳಲ್ಲೇ ತಂಪಾದ ವಾತಾವರಣದ ಅನುಭವ ಪಡೆಯಲು ಇಂತಹ ಹಿಮದ ಕೊಠಡಿಗಳನ್ನು ನಿರ್ಮಿಸಿಕೊಳ್ಳುತ್ತಿದ್ದಾರೆ.

ಇವು ಸಂಪೂರ್ಣವಾಗಿ ಮಂಜುಗಡ್ಡೆ ಮತ್ತು ಹಿಮದಿಂದ ನಿರ್ಮಿಸಲಾದ ವಿಶೇಷ ಕೊಠಡಿಗಳಾಗಿದ್ದು, ಕೆಲವು ಕೊಠಡಿಗಳ ಛಾವಣಿಯಿಂದ ನೈಜ ಹಿಮಪಾತದಂತೆಯೇ ಮಂಜಿನ ಹನಿಗಳು ಕೃತಕವಾಗಿ ಬೀಳುವಂತೆ ವಿನ್ಯಾಸಗೊಳಿಸಲಾಗಿರುತ್ತದೆ. ರೆಸಾರ್ಟ್‌ಗಳಿಗೆ ಹಿಮ ಉತ್ಪಾದಿಸುವ ಇಟಲಿಯ 'ಟೆಕ್ನೋ ಆಲ್ಪೈನ್' ಹಾಗೂ ಅಮೆರಿಕದ 'ಸ್ಪಾ ಬಟ್ಲರ್' ಕಂಪನಿಗಳು ಈ 'ಸ್ನೋ ರೂಮ್' ಪರಿಕಲ್ಪನೆಯ ರೂವಾರಿಗಳಾಗಿದ್ದು, ಅಮೆರಿಕ ಸೇರಿದಂತೆ ಹಲವೆಡೆ ಇಂತಹ ಕೊಠಡಿಗಳನ್ನು ಈಗಾಗಲೇ ನಿರ್ಮಿಸಿವೆ. ಬಂಡೆಕಲ್ಲು, ಐಷಾರಾಮಿ ಮಾರ್ಬಲ್ ಹಾಗೂ ಅತ್ಯುತ್ತಮ ಮರಗಳನ್ನು ಬಳಸಿ ಕಟ್ಟಲಾಗುವ ಈ ಕೊಠಡಿಗಳನ್ನು ಮನೆಯೊಳಗೆ ನಿರ್ಮಿಸುವುದಷ್ಟೇ ಅಲ್ಲದೇ, ಅವುಗಳನ್ನು ಸರಿಯಾಗಿ ತಂಪಾಗಿಸುವುದು ಮತ್ತು ಬಳಸುವುದು ಕೂಡ ಅತ್ಯಂತ ಪ್ರಮುಖವಾಗಿದೆ ಎಂದು ಕಂಪನಿಯ ನಿರ್ದೇಶಕರು ತಿಳಿಸಿದ್ದಾರೆ. ಸೌದಿ ಅರೇಬಿಯಾದ ಯುವರಾಜ ಮೊಹಮ್ಮದ್ ಬಿನ್ ಸಲ್ಮಾನ್ ಅವರ ಬೃಹತ್ ಐಷಾರಾಮಿ ಹಡಗಿನಲ್ಲೂ ಇಂತಹ ವಿಶಿಷ್ಟ ಸ್ನೋ ರೂಮ್ ಇರುವುದು ಇದರ ಜನಪ್ರಿಯತೆಗೆ ಸ್ಪಷ್ಟ ನಿದರ್ಶನವಾಗಿದೆ.

ಒಂದು 'ಸ್ನೋ ರೂಮ್' ನಿರ್ಮಾಣ ಮಾಡಲು ಸರಿಸುಮಾರು 1,30,000 ಡಾಲರ್ (ಅಂದಾಜು 1.25 ಕೋಟಿ ರೂ.) ವೆಚ್ಚವಾಗಲಿದ್ದು, ಗ್ರಾಹಕರ ವೈಯಕ್ತಿಕ ಅಗತ್ಯಕ್ಕೆ ತಕ್ಕಂತೆ ಬದಲಾವಣೆಗಳನ್ನು ಮಾಡಿದರೆ ಹೆಚ್ಚುವರಿ ಶುಲ್ಕ ತೆರಬೇಕಾಗುತ್ತದೆ. ಅಷ್ಟೇ ಅಲ್ಲದೆ, ಕೊಠಡಿಯ ಗಾತ್ರಕ್ಕೆ ಅನುಗುಣವಾಗಿ ವಾರಕ್ಕೆ ಸುಮಾರು 200 ಲೀಟರ್ ನೀರು ಬೇಕಾಗುವುದರಿಂದ ಇವುಗಳ ನಿರ್ವಹಣೆಯೂ ಅತ್ಯಂತ ದುಬಾರಿಯಾಗಿದೆ. ಕಳೆದ ಹತ್ತು ವರ್ಷಗಳಿಂದ ಈ ಕಲ್ಪನೆ ಚಾಲ್ತಿಯಲ್ಲಿದ್ದರೂ, ಇತ್ತೀಚಿನ ವರ್ಷಗಳಲ್ಲಿ ಜಾಗತಿಕ ತಾಪಮಾನ ಏರಿಕೆ ಹಾಗೂ ಭೀಕರ ಬಿಸಿಲ ಬೇಗೆ ಹೆಚ್ಚಾಗಿರುವುದರಿಂದ ಇವು ಹೆಚ್ಚು ಜನಪ್ರಿಯತೆ ಪಡೆಯುತ್ತಿವೆ. ಕಳೆದ ಜೂನ್‌ನಲ್ಲಿ ಬೆಲ್ಜಿಯಂ, ಬ್ರಿಟನ್, ಫ್ರಾನ್ಸ್ ಮತ್ತು ಸ್ಪೇನ್ ದೇಶಗಳಲ್ಲಿ ದಾಖಲೆ ಪ್ರಮಾಣದ ಉಷ್ಣಾಂಶ ದಾಖಲಾಗಿ 10,000ಕ್ಕೂ ಹೆಚ್ಚು ಜನರು ಬಿಸಿಲಿನ ತಾಪಕ್ಕೆ ಬಲಿಯಾಗಿದ್ದು, ಇಂತಹ ತೀವ್ರ ಹವಾಮಾನ ವೈಪರೀತ್ಯಗಳೇ ಶ್ರೀಮಂತರು ತಮ್ಮ ಮನೆಗಳಲ್ಲೇ 'ಸ್ನೋ ರೂಮ್' ನಿರ್ಮಿಸಿಕೊಳ್ಳಲು ಪ್ರಮುಖ ಕಾರಣವಾಗಿವೆ.

ಅಮೆರಿಕದಲ್ಲೂ ಜುಲೈ ತಿಂಗಳಿನಲ್ಲಿ ತೀವ್ರ ಸ್ವರೂಪದ ಬಿಸಿಲಿನ ಬೇಗೆ ದಾಖಲಾಗಿದ್ದರಿಂದ, ಅಲ್ಲಿನ ಅತ್ಯಂತ ಶ್ರೀಮಂತರು ಉಷ್ಣಾಂಶವನ್ನು ತಡೆಯಲು ತಮ್ಮ ಮನೆಗಳಲ್ಲೇ 'ಸ್ನೋ ರೂಮ್' ನಿರ್ಮಿಸಿಕೊಳ್ಳುವ ನಿರ್ಧಾರಕ್ಕೆ ಬಂದಿದ್ದು, ಇದೀಗ ಜಾಗತಿಕವಾಗಿ ಇದು ಶ್ರೀಮಂತಿಕೆಯ ಹೊಸ ಸಂಕೇತವಾಗಿ ಹೊರಹೊಮ್ಮಿದೆ. ಜೂನ್ 30ರ ವೇಳೆಗೆ ಜಗತ್ತಿನಲ್ಲಿ ಶತಕೋಟ್ಯಾಧಿಪತಿಗಳ ಸಂಖ್ಯೆ ಶೇ. 13ರಷ್ಟು ಏರಿಕೆಯಾಗಿ 3,302ಕ್ಕೆ ತಲುಪಿದ್ದು, ಶ್ರೀಮಂತರ ಸಂಖ್ಯೆ ಹೆಚ್ಚಿದಂತೆಲ್ಲಾ ಅವರು ಹಣ ವಿನಿಯೋಗಿಸಲು ಇಂತಹ ಹೊಸ ದಾರಿಗಳನ್ನು ಕಂಡುಕೊಳ್ಳುತ್ತಿದ್ದಾರೆ. ಇದರ ಭಾಗವಾಗಿಯೇ ಮನೆಗಳಲ್ಲೇ ಅತ್ಯಾಧುನಿಕ ಸ್ನೋ ರೂಮ್, ಐಷಾರಾಮಿ ಸ್ವಿಮ್ಮಿಂಗ್ ಪೂಲ್ ಹಾಗೂ ಹೋಮ್ ಥಿಯೇಟರ್‌ಗಳನ್ನು ನಿರ್ಮಿಸುವ ಟ್ರೆಂಡ್ ಶುರುವಾಗಿದ್ದು, ಭಾರತದಲ್ಲಿ ಮುಕೇಶ್ ಅಂಬಾನಿ ಅವರ ನಿವಾಸ 'ಅಂಟಿಲಿಯಾ'ದಲ್ಲೂ ಸಹ ಇಂತಹ ವಿಶಿಷ್ಟ ಸ್ನೋ ರೂಮ್ ಕಾರ್ಯಾಚರಿಸುತ್ತಿರುವುದು ವಿಶೇಷವಾಗಿದೆ, (ಏಜೆನ್ಸೀಸ್​).