ನಾನು ಹುದ್ದೆ ಬಿಡಲು ಸಿದ್ಧ: ಭಾವನಾತ್ಮಕ ಭಾಷಣ ಮಾಡಿದ ಉದ್ಧವ್ ಠಾಕ್ರೆ | ShivSena

ಮುಂಬೈ: ಶಿವಸೇನೆ(ShivSena) 60ನೇ ಸಂಸ್ಥಾಪನಾ ದಿನಾಚರಣೆಯ ಸಂದರ್ಭದಲ್ಲಿ ಮಹಾರಾಷ್ಟ್ರ ರಾಜಕೀಯದಲ್ಲಿ ಮತ್ತೊಮ್ಮೆ ಏಕನಾಥ್ ಶಿಂಧೆ ಮತ್ತು ಉದ್ಧವ್ ಠಾಕ್ರೆ ನಡುವಿನ ವಾಕ್ಸಮರ ತೀವ್ರಗೊಂಡಿದೆ. ಇಬ್ಬರೂ ಪ್ರತ್ಯೇಕ ಕಾರ್ಯಕ್ರಮಗಳಲ್ಲಿ ಮಾತನಾಡಿ ಪರಸ್ಪರ ಪರೋಕ್ಷವಾಗಿ ಟೀಕಿಸಿದ್ದಾರೆ.

ಈ ಬೆಳವಣಿಗೆ ಉದ್ಧವ್ ಠಾಕ್ರೆ ನೇತೃತ್ವದ ಶಿವಸೇನೆ (ಯುಬಿಟಿ)ಗೆ ಹೊಸ ಸಂಕಷ್ಟ ಎದುರಾಗಿರುವ ಸಮಯದಲ್ಲಿ ನಡೆದಿದೆ. ಪಕ್ಷದ 9 ಲೋಕಸಭಾ ಸದಸ್ಯರಲ್ಲಿ 6 ಮಂದಿ ಏಕನಾಥ್ ಶಿಂಧೆ ನೇತೃತ್ವದ ಶಿವಸೇನೆಗೆ ಸೇರುವ ಸಾಧ್ಯತೆ ಇದೆ ಎಂಬ ವರದಿಗಳು ರಾಜಕೀಯ ವಲಯದಲ್ಲಿ ಚರ್ಚೆಗೆ ಕಾರಣವಾಗಿವೆ.

ಶಿಂಧೆ ಭಾಷಣದಲ್ಲಿ ‘ಹುಲಿ-ನಾಯಿ’ ಉದಾಹರಣೆ

ಮುಂಬೈನಲ್ಲಿ ಪಕ್ಷದ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ ಮಹಾರಾಷ್ಟ್ರ ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ, ತಮ್ಮ ಬಣವೇ ಬಾಳಾಸಾಹೇಬ್ ಠಾಕ್ರೆ ಅವರ ನಿಜವಾದ ರಾಜಕೀಯ ಪರಂಪರೆಯ ಉತ್ತರಾಧಿಕಾರಿ ಎಂದು ಹೇಳಿದ್ದಾರೆ.

"ಇದು ಕೇವಲ ಟ್ರೇಲರ್ ಮಾತ್ರ, ಸಿನಿಮಾ ಇನ್ನೂ ಬಾಕಿಯಿದೆ. ಹುಲಿ ಒಂಟಿಯಾಗಿ ಬರುತ್ತದೆ. ನಾಯಿಗಳು ಗುಂಪಾಗಿ ಬೊಗಳುತ್ತವೆ. ಆದರೆ ಹುಲಿ ತನ್ನ ಬೇಟೆಯನ್ನು ಮುಂದುವರಿಸುತ್ತದೆ" ಎಂದು ಅವರು ಹೇಳಿದರು.

ಹೆಸರು ಹೇಳದೆ ಎದುರಾಳಿಗಳ ವಿರುದ್ಧ ವಾಗ್ದಾಳಿ ನಡೆಸಿದ ಶಿಂಧೆ, "ಜನರು ಪಕ್ಷ ಬಿಟ್ಟು ಹೋಗುತ್ತಿದ್ದಾರೆ ಎಂದರೆ ಅದರ ಬಗ್ಗೆ ಆತ್ಮಾವಲೋಕನ ಮಾಡಿಕೊಳ್ಳಬೇಕು" ಎಂದರು.

‘ಶೋಲೆ’ ಚಿತ್ರದ ಡೈಲಾಗ್ ಉಲ್ಲೇಖ

ಭಾಷಣದ ವೇಳೆ ಶಿಂಧೆ, ಬಾಲಿವುಡ್‌ನ ಜನಪ್ರಿಯ ‘ಶೋಲೆ’ ಚಿತ್ರದ ಒಂದು ಸಂಭಾಷಣೆಯನ್ನೂ ಉಲ್ಲೇಖಿಸಿದರು.

"ಅರ್ಧ ಜನರು ಅತ್ತ ಹೋಗಿ, ಉಳಿದವರು ಇತ್ತ ಹೋಗಿ, ಉಳಿದವರು ನನ್ನ ಹಿಂದೆ ಬನ್ನಿ ಎಂದು ಹೇಳುವ ಸ್ಥಿತಿ ಎದುರಾಳಿಗಳದ್ದಾಗಿದೆ. ಆದರೆ ಅವರ ಹಿಂದೆ ಯಾರೂ ಇಲ್ಲ" ಎಂದು ವ್ಯಂಗ್ಯವಾಡಿದರು.

ಉದ್ಧವ್ ಠಾಕ್ರೆ ಭಾವನಾತ್ಮಕ ಭಾಷಣ

ಇನ್ನೊಂದೆಡೆ ತಮ್ಮ ಬೆಂಬಲಿಗರನ್ನು ಉದ್ದೇಶಿಸಿ ಮಾತನಾಡಿದ ಉದ್ಧವ್ ಠಾಕ್ರೆ ಭಾವನಾತ್ಮಕವಾಗಿ ಪ್ರತಿಕ್ರಿಯಿಸಿದರು. "ಇಂದು ನನ್ನ ಮನಸ್ಸಿಗೆ ತುಂಬಾ ನೋವಾಗಿದೆ. ನಾನು ಈ ಹುದ್ದೆಗೆ ಅರ್ಹನಲ್ಲ ಎಂದು ಯಾರಿಗಾದರೂ ಅನಿಸಿದರೆ ನೇರವಾಗಿ ಹೇಳಿ. ನಾನು ಈಗಲೇ ನಾಯಕತ್ವದ ಸ್ಥಾನ ಬಿಟ್ಟು ಕೊಡಲು ಸಿದ್ಧನಿದ್ದೇನೆ" ಎಂದು ಹೇಳಿದರು. ಅಧಿಕಾರ ಅಥವಾ ಹುದ್ದೆಯ ಮೇಲಿನ ಆಸಕ್ತಿ ನನಗಿಲ್ಲ ಎಂದು ಸ್ಪಷ್ಟಪಡಿಸಿದ ಅವರು, ಶಿವಸೇನೆ ಪಕ್ಷವು "ಕಳ್ಳರು ಮತ್ತು ದ್ರೋಹಿಗಳ" ಕೈಗೆ ಹೋಗಬಾರದು ಎಂದು ಎಚ್ಚರಿಕೆ ನೀಡಿದರು.

ಸಂಸದರ ಪಕ್ಷಾಂತರದ ಚರ್ಚೆ

ಉದ್ಧವ್ ಠಾಕ್ರೆ ಬಣದ ಆರು ಲೋಕಸಭಾ ಸದಸ್ಯರು ಪಕ್ಷ ತೊರೆಯಲಿದ್ದಾರೆ ಎಂಬ ವರದಿಗಳು ಕಳೆದ ಕೆಲವು ದಿನಗಳಿಂದ ಹರಿದಾಡುತ್ತಿವೆ. ಸಂಜಯ್ ದಿನಾ ಪಾಟೀಲ್, ಸಂಜಯ್ ದೇಶಮುಖ್, ಸಂಜಯ್ ಜಾಧವ್, ಭೌಸಾಹೇಬ್ ವಾಕ್ಚೌರೆ, ನಾಗೇಶ್ ಪಾಟೀಲ್ ಅಷ್ಟಿಕರ್ ಮತ್ತು ಓಂಪ್ರಕಾಶ್ ರಾಜೇ ನಿಂಬಾಲ್ಕರ್ ಅವರು ಪಕ್ಷದ ಸಂಸದರ ಸಭೆಗೆ ಗೈರಾಗಿರುವುದು ಈ ಊಹಾಪೋಹಗಳಿಗೆ ಮತ್ತಷ್ಟು ಬಲ ನೀಡಿದೆ.

ಮಹಾರಾಷ್ಟ್ರ ರಾಜಕೀಯದಲ್ಲಿ ಹೊಸ ಚರ್ಚೆ

2022ರಲ್ಲಿ ಏಕನಾಥ್ ಶಿಂಧೆ ಬಂಡಾಯ ಎದ್ದು ಶಿವಸೇನೆ ವಿಭಜನೆಯಾದ ಬಳಿಕ ಮಹಾರಾಷ್ಟ್ರ ರಾಜಕೀಯದಲ್ಲಿ ನಿರಂತರ ಸಂಘರ್ಷ ಮುಂದುವರಿದಿದೆ. ಈಗ ಮತ್ತೆ ಸಂಸದರ ಪಕ್ಷಾಂತರದ ಸಾಧ್ಯತೆ ಮತ್ತು ನಾಯಕರ ನಡುವಿನ ಮಾತಿನ ಸಮರ ಹೊಸ ರಾಜಕೀಯ ಚರ್ಚೆಗೆ ಕಾರಣವಾಗಿದೆ. ಮುಂದಿನ ದಿನಗಳಲ್ಲಿ ಶಿವಸೇನೆ ರಾಜಕೀಯದಲ್ಲಿ ಮತ್ತಷ್ಟು ಬೆಳವಣಿಗೆಗಳು ನಡೆಯುವ ಸಾಧ್ಯತೆ ಇದೆ,(ಏಜೆನ್ಸೀಸ್​​).