ದಟ್ಟ ಕಾಡಿನಲ್ಲಿ 3 ಕಿ.ಮೀ ನಡೆದು ಆಸ್ಪತ್ರೆಗೆ ದಾಖಲು: ತನ್ನ ಪ್ರಾಣ ಪಣಕ್ಕಿಟ್ಟು ವಿದ್ಯಾರ್ಥಿನಿ ಜೀವ ಉಳಿಸಿದ ಶಿಕ್ಷಕಿ! Teacher

Teacher : ನೆರೆಯ ಆಂಧ್ರಪ್ರದೇಶ ರಾಜ್ಯದ ಪಾರ್ವತಿಪುರಂ ಮಾನ್ಯಂ ಜಿಲ್ಲೆಯಲ್ಲಿ ಶಿಕ್ಷಕಿಯೊಬ್ಬರು ತೋರಿರುವ ಮಾನವೀಯತೆ ಹಾಗೂ ಕರ್ತವ್ಯನಿಷ್ಠೆ ಇಡೀ ಸಮಾಜವೇ ತಲೆಬಾಗುವಂತೆ ಮಾಡಿದೆ.

ಹೌದು, ಭದ್ರಗಿರಿ ಗಿರಿಜನ ಕಲ್ಯಾಣ ಹೆಣ್ಣುಮಕ್ಕಳ ಆಶ್ರಮ ಶಾಲೆಯ ಶಿಕ್ಷಕಿಯಾದ ಹೇಮನಿ ಅವರು, ತೀವ್ರ ಜ್ವರದಿಂದಾಗಿ ಅತ್ಯಂತ ಕಠಿಣ ಪರಿಸ್ಥಿತಿಯಲ್ಲಿದ್ದ 11 ವರ್ಷದ ಏಳನೇ ತರಗತಿಯ ವಿದ್ಯಾರ್ಥಿನಿ ಭುವನೇಶ್ವರಿಯನ್ನು ಉಳಿಸಲು ತಮ್ಮ ಪ್ರಾಣವನ್ನೇ ಪಣಕ್ಕಿಟ್ಟರು. ಜೂನ್ 30 ರಂದು ನಡೆದ ಈ ಹೃದಯಸ್ಪರ್ಶಿ ಘಟನೆಯಲ್ಲಿ, ಆಸ್ಪತ್ರೆಗೆ ತಲುಪಲು ಯಾವುದೇ ದಾರಿಯಿಲ್ಲದ ಕಾರಣ ದಟ್ಟವಾದ ಕಾಡಿನ ನಡುವೆ ಕಿಲೋಮೀಟರ್‌ಗಟ್ಟಲೆ ದೂರ ಆ ಬಾಲಕಿಯನ್ನು ತಮ್ಮ ಹೆಗಲ ಮೇಲೆಯೇ ಹೊತ್ತು ಸಾಗಿ ಸಕಾಲದಲ್ಲಿ ವೈದ್ಯಕೀಯ ಚಿಕಿತ್ಸೆ ಕೊಡಿಸುವ ಮೂಲಕ ಆಕೆಯ ಜೀವ ಉಳಿಸಿದ್ದಾರೆ.

ರಜೆಯ ನಿಮಿತ್ತ ಮನೆಗೆ ಬಂದಿದ್ದ ಭುವನೇಶ್ವರಿಗೆ ಹಠಾತ್ತನೆ ತೀವ್ರ ಹೊಟ್ಟೆ ನೋವು, ವಾಂತಿ ಹಾಗೂ ಜ್ವರ ಕಾಣಿಸಿಕೊಂಡಿತ್ತು. ತಂದೆ-ತಾಯಿಯನ್ನು ಕಳೆದುಕೊಂಡಿದ್ದ ಆ ಮಗು ತನ್ನ ತಾತನ ಆಸರೆಯಲ್ಲಿ ಬದುಕುತ್ತಿತ್ತು. ಆರಂಭದಲ್ಲಿ ಆಕೆಯನ್ನು ಕುರುಪ್ಪಂ ಸರ್ಕಾರಿ ಆಸ್ಪತ್ರೆಗೆ ಕರೆದೊಯ್ದು ಚಿಕಿತ್ಸೆ ಕೊಡಿಸಲಾಗಿತ್ತಾದರೂ, ಮನೆಗೆ ಮರಳಿದ ನಂತರ ಮಗುವಿನ ಆರೋಗ್ಯ ಪರಿಸ್ಥಿತಿ ಮತ್ತೆ ಕ್ಷೀಣಿಸಿತು. ಅವರ ಮನೆ ಅತ್ಯಂತ ಹಿಂದುಳಿದ ಗ್ರಾಮೀಣ ಪ್ರದೇಶದಲ್ಲಿದ್ದ ಕಾರಣ, ಅಲ್ಲಿಗೆ ಯಾವುದೇ ರಸ್ತೆ ಸಂಪರ್ಕವಾಗಲಿ ಅಥವಾ ವಾಹನ ಸೌಕರ್ಯವಾಗಲಿ ಇರಲಿಲ್ಲ. ಇದರಿಂದ ಕಂಗಾಲಾದ ಕುಟುಂಬಸ್ಥರು ತಕ್ಷಣವೇ ಶಾಲೆಯ ಅಧಿಕಾರಿಗಳಿಗೆ ವಿಷಯ ಮುಟ್ಟಿಸಿದರು.

ಈ ಆಘಾತಕಾರಿ ಸುದ್ದಿ ತಿಳಿಯುತ್ತಿದ್ದಂತೆಯೇ ಶಿಕ್ಷಕಿ ಹೇಮನಿ ಅವರು ತಡಮಾಡದೆ ಮಗುವಿನ ಹಳ್ಳಿಗೆ ಧಾವಿಸಿದರು. ಅಲ್ಲಿ ಮಗುವಿನ ಸ್ಥಿತಿ ಗಂಭೀರವಾಗಿರುವುದನ್ನು ಕಂಡು ಹಾಗೂ ಆಂಬುಲೆನ್ಸ್‌ಗಾಗಿ ಕಾಯುತ್ತಾ ಕೂರಲು ಸಮಯವಿಲ್ಲ ಎಂಬುದನ್ನು ಅರಿತ ಹೇಮನಿ, ಬಟ್ಟೆಯೊಂದರ ಸಹಾಯದಿಂದ ಆ ಬಾಲಕಿಯನ್ನು ತಮ್ಮ ಬೆನ್ನಿಗೆ ಸುರಕ್ಷಿತವಾಗಿ ಕಟ್ಟಿಕೊಂಡರು. ಬಳಿಕ ಕಲ್ಲುಬಂಡೆಗಳು ಹಾಗೂ ಜಾರು ಹಾದಿಗಳಿಂದ ಕೂಡಿದ್ದ ದಟ್ಟವಾದ ಕಾಡಿನ ನಡುವೆ ಸುಮಾರು ಮೂರು ಕಿಲೋಮೀಟರ್‌ಗಳಷ್ಟು ದೂರ ಪಾದಯಾತ್ರೆ ಮಾಡಿದರು. ಈ ಕಠಿಣ ಹಾದಿಯಲ್ಲಿ ಮಗುವಿನ ಸಂಬಂಧಿಕರು ಸಹ ಅವರೊಂದಿಗೆ ಹೆಜ್ಜೆ ಹಾಕಿದರು. ಕೊನೆಗೆ ಅವರು ಕಾಡಿನ ಹಾದಿ ಮುಗಿಸಿ ಮುಖ್ಯರಸ್ತೆಗೆ ತಲುಪುವಷ್ಟರಲ್ಲಿ ವಾಹನವೊಂದು ಸಿದ್ಧವಾಗಿತ್ತು, ಅಲ್ಲಿಂದ ಮಗುವನ್ನು ತಕ್ಷಣವೇ ಪಾರ್ವತಿಪುರಂನ ಸರ್ಕಾರಿ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಲಾಯಿತು.

ಆಸ್ಪತ್ರೆಗೆ ತಲುಪಿದಾಗ ಮಗುವಿನ ಪರಿಸ್ಥಿತಿ ಅತ್ಯಂತ ಆತಂಕಕಾರಿಯಾಗಿದ್ದರಿಂದ, ವೈದ್ಯರು ಆಕೆಯನ್ನು ತಕ್ಷಣವೇ ತುರ್ತು ಚಿಕಿತ್ಸಾ ಘಟಕಕ್ಕೆ ದಾಖಲಿಸಿ ಚಿಕಿತ್ಸೆ ಆರಂಭಿಸಿದರು. ಸಕಾಲದಲ್ಲಿ ಚಿಕಿತ್ಸೆ ದೊರೆತ ಕಾರಣ ಮಗು ಪ್ರಾಣಾಪಾಯದಿಂದ ಪಾರಾಗಿದ್ದು, ಸದ್ಯ ಚೇತರಿಸಿಕೊಳ್ಳುತ್ತಿದೆ ಎಂದು ವೈದ್ಯರು ತಿಳಿಸಿದ್ದಾರೆ.

ತಮ್ಮ ಪ್ರಾಣವನ್ನೇ ಪಣಕ್ಕಿಟ್ಟು ವಿದ್ಯಾರ್ಥಿನಿಯ ಜೀವ ಉಳಿಸಿದ ಶಿಕ್ಷಕಿ ಹೇಮನಿ ಅವರ ಈ ಅಪ್ರತಿಮ ಸಾಹಸ ಮತ್ತು ಮಾನವೀಯ ಕಾರ್ಯವನ್ನು ಸಾಮಾಜಿಕ ಜಾಲತಾಣಗಳು ಸೇರಿದಂತೆ ಎಲ್ಲೆಡೆ ಅಪಾರ ಜನಪ್ರಶಂಸೆ ವ್ಯಕ್ತವಾಗುತ್ತಿದೆ. ಆದರೆ, ತಮಗೆ ಸಿಗುತ್ತಿರುವ ಎಲ್ಲಾ ಶ್ಲಾಘನೆಗಳನ್ನು ಅತ್ಯಂತ ವಿನಮ್ರತೆಯಿಂದ ಸ್ವೀಕರಿಸಿರುವ ಹೇಮನಿ, ನನಗೆ ಕೇವಲ ನನ್ನ ವಿದ್ಯಾರ್ಥಿನಿಯ ಜೀವ ಉಳಿಸುವುದಷ್ಟೇ ಮುಖ್ಯವಾಗಿತ್ತು. ಇಂತಹ ತುರ್ತು ಸಂದರ್ಭಗಳಲ್ಲಿ ನಾವು ಕಷ್ಟಗಳ ಬಗ್ಗೆ ಯೋಚಿಸಲು ಸಾಧ್ಯವಿಲ್ಲ; ಮಗುವಿನ ಜೀವ ಎಲ್ಲಕ್ಕಿಂತಲೂ ಅಮೂಲ್ಯವಾದುದು ಎಂದು ಹೇಳುವ ಮೂಲಕ ತಮ್ಮ ಕರ್ತವ್ಯ ಪ್ರಜ್ಞೆಯನ್ನು ಮೆರೆದಿದ್ದಾರೆ, (ಏಜೆನ್ಸೀಸ್​).