Taiwan: ಜಾಗತಿಕ ಮಾರುಕಟ್ಟೆ ಮೌಲ್ಯದಲ್ಲಿ ಭಾರತವನ್ನು ಹಿಂದಿಕ್ಕಿದ ಪುಟ್ಟ ರಾಷ್ಟ್ರ ತೈವಾನ್!

ಪ್ರಸ್ತುತ ತೈವಾನ್‌ನ ಒಟ್ಟು ಮಾರುಕಟ್ಟೆ ಮೌಲ್ಯ 4.95 ಟ್ರಿಲಿಯನ್ ಡಾಲರ್‌ಗೆ ಏರಿಕೆಯಾಗಿದೆ. ಇದರೊಂದಿಗೆ India 4.92 ಟ್ರಿಲಿಯನ್ ಡಾಲರ್ ಮೌಲ್ಯದೊಂದಿಗೆ ಆರನೇ ಸ್ಥಾನಕ್ಕೆ ಕುಸಿದಿದೆ.

ಜಾಗತಿಕ ಮಟ್ಟದಲ್ಲಿ ಅಮೆರಿಕ 77.96 ಟ್ರಿಲಿಯನ್ ಡಾಲರ್ ಮಾರುಕಟ್ಟೆ ಮೌಲ್ಯದೊಂದಿಗೆ ಮೊದಲ ಸ್ಥಾನದಲ್ಲಿದೆ. ನಂತರ ಚೀನಾ 15.57 ಟ್ರಿಲಿಯನ್ ಡಾಲರ್ ಮತ್ತು ಜಪಾನ್​ 8.67 ಟ್ರಿಲಿಯನ್ ಡಾಲರ್ ಮೌಲ್ಯದೊಂದಿಗೆ ಕ್ರಮವಾಗಿ ಎರಡನೇ ಮತ್ತು ಮೂರನೇ ಸ್ಥಾನದಲ್ಲಿವೆ. ಹಾಂಗ್​​ಕಾಂಗ್ 7.26 ಟ್ರಿಲಿಯನ್ ಡಾಲರ್ ಮೌಲ್ಯದೊಂದಿಗೆ ನಾಲ್ಕನೇ ಸ್ಥಾನದಲ್ಲಿದೆ.

ತೈವಾನ್‌ನ ಈ ವೇಗದ ಏರಿಕೆಗೆ ಪ್ರಮುಖ ಕಾರಣ ಅಲ್ಲಿನ ಚಿಪ್ ತಯಾರಿಕಾ ದೈತ್ಯ ಕಂಪನಿ Taiwan Semiconductor Manufacturing Company (TSMC) ಆಗಿದೆ. AI ಕ್ಷೇತ್ರದಲ್ಲಿ ಸೆಮಿಕಂಡಕ್ಟರ್‌ಗಳ ಬೇಡಿಕೆ ಭಾರೀ ಪ್ರಮಾಣದಲ್ಲಿ ಏರಿಕೆಯಾಗಿರುವುದರಿಂದ ಕಂಪನಿಯ ಷೇರುಗಳು ಈ ವರ್ಷವೇ ಸುಮಾರು 49 ಶೇಕಡಾ ಏರಿಕೆ ಕಂಡಿವೆ. ಪ್ರಸ್ತುತ ತೈವಾನ್‌ನ ಪ್ರಮುಖ ಸೂಚ್ಯಂಕದಲ್ಲಿ ಟಿಎಸ್ಎಂಸಿ ಕಂಪನಿಯ ಪಾಲು 42 ಶೇಕಡಕ್ಕಿಂತ ಹೆಚ್ಚಿದ್ದು, ಮಾರುಕಟ್ಟೆಯ ಏರಿಕೆಯನ್ನು ಬಹುತೇಕ ಒಂದೇ ಕಂಪನಿ ಮುನ್ನಡೆಸುತ್ತಿದೆ.

ಇನ್ನೊಂದೆಡೆ, ಭಾರತೀಯ ಷೇರು ಮಾರುಕಟ್ಟೆ ಕಳೆದ ಕೆಲವು ತಿಂಗಳುಗಳಿಂದ ನಿರೀಕ್ಷಿತ ಮಟ್ಟದಲ್ಲಿ ಪ್ರದರ್ಶನ ನೀಡಲು ವಿಫಲವಾಗಿದೆ. 2024ರ ಸೆಪ್ಟೆಂಬರ್ ನಂತರದಿಂದ BSE Sensex ಹಾಗೂ NIFTY 50 ಸೂಚ್ಯಂಕಗಳು ಸುಮಾರು 5 ಶೇಕಡಾ ಕುಸಿತ ಕಂಡಿವೆ. ವಿದೇಶಿ ಹೂಡಿಕೆದಾರರ ಹಣ ಹಿಂಪಡೆಯುವುದು, ಜಾಗತಿಕ ವ್ಯಾಪಾರ ಉದ್ವಿಗ್ನತೆ, ಹೆಚ್ಚಿದ ಮೌಲ್ಯಮಾಪನ ಮತ್ತು ಕಂಪನಿಗಳ ದುರ್ಬಲ ಲಾಭಾಂಶ ಹೂಡಿಕೆದಾರರ ವಿಶ್ವಾಸ ಕುಗ್ಗಲು ಕಾರಣವಾಗಿದೆ.

ಭಾರತೀಯ ಮಾರುಕಟ್ಟೆಯಲ್ಲಿ AI ತಂತ್ರಜ್ಞಾನ ಆಧಾರಿತ ದೊಡ್ಡ ಕಂಪನಿಗಳ ಕೊರತೆಯೂ ಹಿನ್ನಡೆಯ ಪ್ರಮುಖ ಕಾರಣ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಜಾಗತಿಕ ಮಟ್ಟದಲ್ಲಿ AI ಕ್ಷೇತ್ರದ ಷೇರುಗಳು ಭಾರೀ ಏರಿಕೆ ಕಾಣುತ್ತಿದ್ದರೂ, ಭಾರತ ಆ ಅಲೆಯಲ್ಲಿ ಸಂಪೂರ್ಣ ಪ್ರಯೋಜನ ಪಡೆಯಲು ಸಾಧ್ಯವಾಗಿಲ್ಲ. ಇದಕ್ಕೂ ಮಧ್ಯೆ, ಇರಾನ್–ಇಸ್ರೇಲ್ ಉದ್ವಿಗ್ನತೆಯಿಂದ ಕಚ್ಚಾ ತೈಲದ ಬೆಲೆ ಏರಿಕೆಯಾಗಿ ದರ ಏರಿಕೆ ಮತ್ತು ಹಣಕಾಸು ಒತ್ತಡದ ಆತಂಕಗಳು ಹೆಚ್ಚಿವೆ. ಇದೂ ಮಾರುಕಟ್ಟೆ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿದೆ,(ಏಜೆನ್ಸೀಸ್​).