ಕೇವಲ 18ನೇ ವಯಸ್ಸಿನಲ್ಲಿ ಕಾಲೇಜ್​ ಪ್ರೊಫೆಸರ್​ ಆಗುವ ಮೂಲಕ 306 ವರ್ಷಗಳ ವಿಶ್ವ ದಾಖಲೆ ಮುರಿದ ಯುವಕ! Success Story

Success Story : ವಯಸ್ಸೆಂಬುದು ಕೇವಲ ಒಂದು ಸಂಖ್ಯೆ ಎಂಬುದನ್ನು 18ನೇ ವಯಸ್ಸಿನಲ್ಲೇ ಸಾಬೀತುಪಡಿಸಿರುವ ಯುವಕನೊಬ್ಬ ಇಡೀ ವಿಶ್ವದ ಗಮನ ಸೆಳೆದಿದ್ದಾನೆ. ಸಾಮಾನ್ಯವಾಗಿ ಯುವಕರು ಕಾಲೇಜು ಮೆಟ್ಟಿಲುಗಳನ್ನು ಹತ್ತುವ ಹರೆಯದಲ್ಲೇ, ಈ ಮೇಧಾವಿ ಯುವಕ ಪ್ರೊಫೆಸರ್ ಆಗಿ ಪಾಠ ಮಾಡುವ ಮೂಲಕ ಇತಿಹಾಸ ನಿರ್ಮಿಸಿದ್ದಾನೆ. ತನ್ನ ಅಸಾಧಾರಣ ಪ್ರತಿಭೆ ಮತ್ತು ಪರಿಶ್ರಮದಿಂದ ವಿಶ್ವ ದಾಖಲೆ ಬರೆದಿರುವ ಈ ಯುವ ಪ್ರತಿಭೆಯ ಸಾಧನೆಯು ಎಲ್ಲರಿಗೂ ಸ್ಫೂರ್ತಿದಾಯಕವಾಗಿದೆ.

ಇಂಜಿನಿಯರಿಂಗ್ ಪ್ರೊಫೆಸರ್​ ಆಗಿರುವ ಫ್ಲೋರಿಡಾದ ನಾಥನ್ ಥಾಮಸ್, ಹತ್ತೊಂಬತ್ತು ವರ್ಷ ತುಂಬುವ ಮುಂಚೆಯೇ ಕಾಲೇಜಿನಲ್ಲಿ ಬೋಧನಾ ಹುದ್ದೆಯನ್ನು ಅಲಂಕರಿಸುವ ಮೂಲಕ ವಿಶ್ವದ ಅತ್ಯಂತ ಕಿರಿಯ ಪುರುಷ ಪ್ರೊಫೆಸರ್ ಎನಿಸಿಕೊಂಡಿದ್ದಾರೆ.

ಗಿನ್ನೆಸ್ ವಿಶ್ವ ದಾಖಲೆಯ ಪ್ರಕಾರ, ಮಿಯಾಮಿ ಡೇಡ್ ಕಾಲೇಜಿನಲ್ಲಿ ಇಂಜಿನಿಯರಿಂಗ್ ಬೋಧನಾ ಹುದ್ದೆಯನ್ನು ಸ್ವೀಕರಿಸುವಾಗ ನಾಥನ್ ಥಾಮಸ್ ಅವರ ವಯಸ್ಸು 18 ವರ್ಷ ಮತ್ತು 346 ದಿನಗಳು. ಈ ಮೂಲಕ ಈ ಹಿಂದೆ ಹತ್ತೊಂಬತ್ತನೇ ವಯಸ್ಸಿನಲ್ಲಿ ಪ್ರೊಫೆಸರ್ ಆಗಿದ್ದ ಕೋಲಿನ್ ಮ್ಯಾಕ್ಲೌರಿನ್​ ಅವರ ಹೆಸರಿನಲ್ಲಿದ್ದ ದಾಖಲೆಯು 306 ವರ್ಷಗಳ ಬಳಿಕ ಮುರಿದುಬಿದ್ದಿದೆ.

ಇದಿಷ್ಟೇ ಅಲ್ಲದೆ, 2008ರಲ್ಲಿ 18 ವರ್ಷ ಮತ್ತು 362 ದಿನಗಳಲ್ಲಿ ಪ್ರೊಫೆಸರ್ ಆಗುವ ಮೂಲಕ ಕಿರಿಯ ಮಹಿಳಾ ಪ್ರಾಧ್ಯಾಪಕಿ ಎಂಬ ದಾಖಲೆ ಬರೆದಿದ್ದ ಅಲಿಯಾ ಸಬುರ್ ಅವರ ದಾಖಲೆಯನ್ನೂ ಥಾಮಸ್ ಮುರಿದಿದ್ದಾರೆ. ಕೇವಲ ಹದಿನಾರು ದಿನಗಳ ಅಂತರದಲ್ಲಿ ಈ ದಾಖಲೆ ಮುರಿದಿದೆ.

2023ರ ಆಗಸ್ಟ್‌ ತಿಂಗಳಲ್ಲಿ ಮಿಯಾಮಿ ಡೇಡ್ ಕಾಲೇಜಿನಲ್ಲಿ ಇಂಜಿನಿಯರಿಂಗ್ ವಿದ್ಯಾರ್ಥಿಗಳಿಗೆ ಸಿ ಪ್ರೋಗ್ರಾಮಿಂಗ್ ಬೋಧಿಸಲು ಆರಂಭಿಸಿದ ನಾಥನ್​, ತಮ್ಮದೇ ವಯಸ್ಸಿನ ವಿದ್ಯಾರ್ಥಿಗಳಿಗೆ ಪಾಠ ಮಾಡಿದ್ದಾರೆ. ತರಗತಿಯಲ್ಲಿ ವಯಸ್ಸು ಮಾತ್ರ ಮುಖ್ಯವಲ್ಲ, ಎಲ್ಲರೂ ಕಲಿಯಲು ಬಂದಿರುತ್ತಾರೆ ಎಂದು ನಂಬಿರುವ ಥಾಮಸ್, ವಿದ್ಯಾರ್ಥಿಗಳಿಗೆ ಸಂಕೀರ್ಣ ಕಂಪ್ಯೂಟಿಂಗ್ ಮತ್ತು ಪ್ರೋಗ್ರಾಮಿಂಗ್ ಪರಿಕಲ್ಪನೆಗಳನ್ನು ಬೋಧಿಸುವ ಜವಾಬ್ದಾರಿಯನ್ನು ಹೊತ್ತಿದ್ದಾರೆ.

ಹತ್ತು ವರ್ಷದವರಿದ್ದಾಗ ಮಿಯಾಮಿ ಡೇಡ್ ಕಾಲೇಜಿಗೆ ಸೇರಿದ್ದ ನಾಥನ್​, ಹದಿನಾಲ್ಕನೇ ವಯಸ್ಸಿಗೆ ಫ್ಲೋರಿಡಾ ಇಂಟರ್ನ್ಯಾಷನಲ್ ಯೂನಿವರ್ಸಿಟಿಗೆ ತೆರಳಿ ನಾಲ್ಕು ವರ್ಷಗಳಲ್ಲಿ ಎಲೆಕ್ಟ್ರಿಕಲ್ ಇಂಜಿನಿಯರಿಂಗ್‌ನಲ್ಲಿ ಸ್ನಾತಕೋತ್ತರ ಪದವಿ ಪೂರೈಸಿದ್ದಾರೆ. ಇಂಜಿನಿಯರಿಂಗ್ ಕುಟುಂಬದಿಂದ ಬಂದಿರುವ ನಾಥನ್ ಥಾಮಸ್, ತನಗೆ ಚಿಕ್ಕ ವಯಸ್ಸಿನಿಂದಲೂ ಗಣಿತವು ತುಂಬಾ ಸುಲಭವಾಗಿ ಒಲಿದುಬಂದಿದೆ ಎಂದು ತಿಳಿಸಿದ್ದಾರೆ. ಕಠಿಣವಾದ ವಿಷಯಗಳನ್ನು ಸಹ ಸರಳವಾಗಿ ಅರ್ಥವಾಗುವಂತೆ ಮಾಡುವ ವಿಶೇಷ ಶೈಲಿ ತಮ್ಮ ತಾಯಿಗಿತ್ತು ಎಂದಿರುವ ನಾಥನ್​, ಬಾಲ್ಯದ ಆ ಪ್ರಭಾವ ತನ್ನ ಮೇಲೆ ಇಂದಿಗೂ ಆಳವಾಗಿದೆ ಎಂದು ಹೇಳಿದ್ದಾರೆ.

ಬೋಧನಾ ವೃತ್ತಿಯ ಕುರಿತು ಮಾತನಾಡಿರುವ ಥಾಮಸ್, ವಿದ್ಯಾರ್ಥಿಗಳಿಗೆ ಕಷ್ಟವೆನಿಸಿದ ವಿಷಯವು ಕ್ಷಣಾರ್ಧದಲ್ಲಿ ಸಂಪೂರ್ಣವಾಗಿ ಅರ್ಥವಾಗಿ ಅವರ ಮುಖದಲ್ಲಿ ಮೂಡುವ ನಗುವನ್ನು ನೋಡುವುದೇ ತನಗೆ ಅತ್ಯಂತ ಖುಷಿ ನೀಡುವ ವಿಚಾರ ಎಂದಿದ್ದಾರೆ, (ಏಜೆನ್ಸೀಸ್​).