ಪೊಲೀಸ್​ ಡ್ಯೂಟಿ, ಗರ್ಭಿಣಿ, 2 ಬಾರಿ ಫೇಲ್ಯೂರ್​... ಎಷ್ಟೇ ಅಡ್ಡಿಗಳಾದ್ರೂ ಹಠಬಿಡದೆ DSP ಆದ ರೈತನ ಮಗಳ ಯಶೋಗಾಥೆ! Success Story

Success Story : ಕನಸುಗಳು ಕೇವಲ ಶಾಲಾ ಪಠ್ಯಪುಸ್ತಕಗಳಿಂದ ಮಾತ್ರ ಹುಟ್ಟುವುದಿಲ್ಲ, ಬದಲಿಗೆ ಜೀವನದ ಕಠಿಣ ಪರಿಸ್ಥಿತಿಗಳು ಮತ್ತು ತೀವ್ರ ತರಹದ ಸಂಕಷ್ಟಗಳಿಂದಲೂ ಚಿಗುರೊಡೆಯುತ್ತವೆ ಎಂಬುದನ್ನು ಬಿಹಾರದ ಬಾಬ್ಲಿ ಕುಮಾರಿ ಅವರು ಜಗತ್ತಿಗೆ ಸಾಬೀತುಪಡಿಸಿದ್ದಾರೆ.

ಹೌದು, ಬೋಧಗಯಾದ ಅತ್ಯಂತ ಸರಳ ರೈತ ಕುಟುಂಬವೊಂದರಲ್ಲಿ ಜನಿಸಿದ ಬಾಬ್ಲಿ, ಬಾಲ್ಯದಿಂದಲೇ ಮನೆಯ ಆರ್ಥಿಕ ಮುಗ್ಗಟ್ಟು ಮತ್ತು ಬಡತನದ ಕಷ್ಟಗಳನ್ನು ಕಣ್ಣಾರೆ ಕಂಡು ಬೆಳೆದವರು. ಶಿಕ್ಷಣವೊಂದೇ ತಮ್ಮ ಕುಟುಂಬವನ್ನು ಈ ಬಡತನದ ಬೇಗೆಯಿಂದ ಮುಕ್ತಿಗೊಳಿಸಬಲ್ಲ ಏಕೈಕ ಮಾರ್ಗ ಎಂದು ದೃಢವಾಗಿ ನಂಬಿದ ಅವರು, ಹಠಬಿಡದೆ ತಮ್ಮ ಪದವಿ ಶಿಕ್ಷಣವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದರು.

ನಂತರ 2013 ರಲ್ಲಿ ಅವರಿಗೆ ವಿವಾಹವಾದರೂ ಸಹ, ತಮ್ಮ ಸ್ವಂತ ಕುಟುಂಬಕ್ಕೆ ಆರ್ಥಿಕವಾಗಿ ಆಸರೆಯಾಗಬೇಕು ಹಾಗೂ ಬೆಂಬಲವಾಗಿ ನಿಲ್ಲಬೇಕು ಎಂಬ ಅವರ ಛಲ ಮಾತ್ರ ಕುಗ್ಗಲಿಲ್ಲ. ಇದೇ ಬಲವಾದ ನಿರ್ಧಾರದೊಂದಿಗೆ ಕಠಿಣ ಪರಿಶ್ರಮ ಪಟ್ಟ ಅವರು, 2015 ರಲ್ಲಿ ಬಿಹಾರ ಪೊಲೀಸ್ ಇಲಾಖೆಯಲ್ಲಿ ಕಾನ್‌ಸ್ಟೆಬಲ್ ಆಗಿ ಉದ್ಯೋಗ ಗಿಟ್ಟಿಸಿಕೊಳ್ಳುವಲ್ಲಿ ಯಶಸ್ವಿಯಾದರು. ಸಾಮಾನ್ಯವಾಗಿ ಇಂತಹ ಸರ್ಕಾರಿ ಕೆಲಸ ಸಿಕ್ಕ ತಕ್ಷಣವೇ ಅನೇಕ ಜನರು ತಮ್ಮ ಜೀವನದಲ್ಲಿ ತೃಪ್ತಿಪಟ್ಟುಕೊಂಡು ಅಲ್ಲಿಗೇ ಸೆಟಲ್ ಆಗಿಬಿಡುತ್ತಾರೆ, ಆದರೆ ಬಾಬ್ಲಿ ಕುಮಾರಿ ಅವರ ಮಹತ್ವಾಕಾಂಕ್ಷೆ ಮತ್ತು ಸಾಧಿಸುವ ಹಸಿವು ಮಾತ್ರ ಆ ಕಾನ್‌ಸ್ಟೆಬಲ್ ಹುದ್ದೆಗೆ ಮಾತ್ರ ಸೀಮಿತವಾಗಿ ನಿಲ್ಲಲಿಲ್ಲ.

ಬಿಹಾರ ಪೊಲೀಸ್ ಇಲಾಖೆಯಲ್ಲಿ ಕಾನ್‌ಸ್ಟೆಬಲ್ ಆಗಿ ಸೇವೆ ಸಲ್ಲಿಸುತ್ತಿದ್ದ ಬಾಬ್ಲಿ ಕುಮಾರಿ ಅವರ ಗುರಿ ಕೇವಲ ಆ ಹುದ್ದೆಗೆ ಸೀಮಿತವಾಗಿರಲಿಲ್ಲ. ಬಿಹಾರ ಸಾರ್ವಜನಿಕ ಸೇವಾ ಆಯೋಗದ (BPSC) ಪರೀಕ್ಷೆಯನ್ನು ಬರೆದು ಉನ್ನತ ಅಧಿಕಾರಿಯಾಗಬೇಕು ಎಂಬ ದೊಡ್ಡ ಕನಸನ್ನು ಅವರು ಹೊಂದಿದ್ದರು. ಆದರೆ, ಪೊಲೀಸ್ ಇಲಾಖೆಯಲ್ಲಿ ದಿನಕ್ಕೆ ಬರೋಬ್ಬರಿ 20 ಗಂಟೆಗಳ ಕಾಲ ಅತ್ಯಂತ ಕಠಿಣವಾದ ಕರ್ತವ್ಯವನ್ನು ನಿಭಾಯಿಸುತ್ತಾ ಓದುವುದು ಅವರಿಗೆ ಅಷ್ಟು ಸುಲಭದ ಮಾತಾಗಿರಲಿಲ್ಲ. ಆದರೂ ಧೃತಿಗೆಡದ ಅವರು, ತಮ್ಮ ಕರ್ತವ್ಯದ ನಡುವೆ ಸಿಗುತ್ತಿದ್ದ ಅತ್ಯಲ್ಪ ಬಿಡುವಿನ ಸಮಯದಲ್ಲೂ ಪುಸ್ತಕಗಳನ್ನು ಕೈಗೆತ್ತಿಕೊಂಡು ಅಧ್ಯಯನ ನಡೆಸುತ್ತಿದ್ದರು.

ಈ ಸುದೀರ್ಘ ಹೋರಾಟದ ಹಾದಿಯಲ್ಲಿ ಅತ್ಯಂತ ಕಠಿಣವಾದ ಸವಾಲು ಎದುರಾಗಿದ್ದು ಬಿಪಿಎಸ್‌ಸಿ ಮುಖ್ಯ ಪರೀಕ್ಷೆಯ ಸಿದ್ಧತೆಯ ಸಮಯದಲ್ಲಿ. ಏಕೆಂದರೆ, ಆ ಸಂದರ್ಭದಲ್ಲಿ ಬಾಬ್ಲಿ ಅವರು ಗರ್ಭಿಣಿಯಾಗಿದ್ದರು. ಒಂದು ಕಡೆ ಕಠಿಣವಾದ ಪೊಲೀಸ್ ಕರ್ತವ್ಯ, ಇನ್ನೊಂದು ಕಡೆ ಗರ್ಭಾವಸ್ಥೆಯ ಆರೋಗ್ಯದ ಕಾಳಜಿ, ಮತ್ತೊಂದೆಡೆ ಪರೀಕ್ಷೆಯ ಬೃಹತ್ ಪಠ್ಯಕ್ರ...ಹೀಗೆ ಮೂರು ಜವಾಬ್ದಾರಿಗಳು ಏಕಕಾಲಕ್ಕೆ ಎದುರಾದರೂ ಬಬ್ಲಿ ಕುಮಾರಿ ಮಾತ್ರ ಎಲ್ಲೂ ಹಿಂದೆ ಸರಿಯಲಿಲ್ಲ. ಕೊನೆಗೆ ನಿಯಮಿತ ಕರ್ತವ್ಯದ ನಡುವೆ ಓದಲು ಸಾಕಷ್ಟು ಸಮಯ ಸಿಗದಿದ್ದಾಗ, ಅವರು ರಜೆ ಪಡೆದು ಪಟನಾಕ್ಕೆ ತೆರಳಿ ಹಗಲಿರುಳು ತೀವ್ರ ಪರಿಶ್ರಮ ಪಟ್ಟರು.

ಈ ಕಠಿಣ ಸವಾಲುಗಳ ನಡುವೆಯೂ ಬಬ್ಲಿ ಕುಮಾರಿ ಅವರು ತಮ್ಮ ಮೊದಲ ಎರಡು ಪ್ರಯತ್ನಗಳಲ್ಲಿ ಯಶಸ್ಸು ಕಾಣಲು ಸಾಧ್ಯವಾಗಲಿಲ್ಲ. ಆದರೆ, ಸತತ ಸೋಲುಗಳಿಂದ ಕಂಗೆಡದ ಅವರು ಛಲಬಿಡದೇ ತಮ್ಮ ಪ್ರಯತ್ನವನ್ನು ಮುಂದುವರಿಸಿದರು. ತಮ್ಮ ಹಿಂದಿನ ಪ್ರಯತ್ನಗಳಲ್ಲಿ ಮಾಡಿದ ತಪ್ಪುಗಳನ್ನು ಸೂಕ್ಷ್ಮವಾಗಿ ತಿದ್ದಿಕೊಂಡು, ಮೂರನೇ ಬಾರಿಗೆ ಮತ್ತಷ್ಟು ದೃಢ ಸಂಕಲ್ಪ ಮತ್ತು ಪರಿಶ್ರಮದೊಂದಿಗೆ ಪರೀಕ್ಷೆಯನ್ನು ಎದುರಿಸಿದರು. ಅವರ ಈ ಸತತ ಪ್ರಯತ್ನಕ್ಕೆ ತಕ್ಕ ಪ್ರತಿಫಲ ಎಂಬಂತೆ, 2022 ರಲ್ಲಿ ಬಿಡುಗಡೆಯಾದ 66ನೇ ಬಿಪಿಎಸ್‌ಸಿ ಪರೀಕ್ಷೆಯ ಫಲಿತಾಂಶದಲ್ಲಿ ಅವರು ಅಖಿಲ ಭಾರತ ಮಟ್ಟದಲ್ಲಿ 208ನೇ ರ‍್ಯಾಂಕ್ ಗಳಿಸುವ ಮೂಲಕ ನೇರವಾಗಿ ಡಿಎಸ್‌ಪಿ (DSP) ದರ್ಜೆಯ ಉನ್ನತ ಅಧಿಕಾರಿಯಾಗಿ ಆಯ್ಕೆಯಾದರು.

ಸಾಮಾನ್ಯ ಕಾನ್‌ಸ್ಟೆಬಲ್ ಹುದ್ದೆಯಿಂದ ಆರಂಭಿಸಿ ಕಠಿಣ ಕರ್ತವ್ಯದ ಒತ್ತಡ, ಗರ್ಭಾವಸ್ಥೆಯ ದೈಹಿಕ ಸವಾಲುಗಳು ಮತ್ತು ಸರಣಿ ಸೋಲುಗಳನ್ನು ಮೆಟ್ಟಿ ನಿಂತು ಡಿಎಸ್‌ಪಿ ಹುದ್ದೆಗೇರಿದ ಬಬ್ಲಿ ಕುಮಾರಿ ಅವರ ಈ ರೋಚಕ ಯಶೋಗಾಥೆಯು ಇಂದು ದೇಶದ ಅಸಂಖ್ಯಾತ ಮಹಿಳೆಯರಿಗೆ ದೊಡ್ಡ ಪ್ರೇರಣೆಯಾಗಿದೆ. ತಮ್ಮ ಈ ಐತಿಹಾಸಿಕ ಯಶಸ್ಸಿನ ಹಿಂದೆ ಕೇವಲ ತಮ್ಮ ಶ್ರಮ ಮಾತ್ರವಲ್ಲದೆ, ತಮಗೆ ನಿರಂತರವಾಗಿ ಬೆನ್ನೆಲುಬಾಗಿ ನಿಂತು ಪ್ರೋತ್ಸಾಹ ನೀಡಿದ ಪತಿ ಮತ್ತು ಅತ್ತೆ-ಮಾವಂದಿರ ಬೆಂಬಲವೇ ಮುಖ್ಯ ಕಾರಣ ಎಂದು ಬಬ್ಲಿ ಕುಮಾರಿ ಅವರು ಇಂದು ಹೆಮ್ಮೆಯಿಂದ ಸ್ಮರಿಸುತ್ತಾರೆ, (ಏಜೆನ್ಸೀಸ್​).