ಅಂದು ಕಿಸೆಯಲ್ಲಿ 1000 ರೂ. ಇಟ್ಕೊಂಡು ಮನೆಬಿಟ್ಟು ಬಂದ ಯುವಕನಿಗೆ ಇಂದು 3.5 ಕೋಟಿ ರೂ. ಸ್ಕಾಲರ್​ಶಿಪ್​...! Student Success

Student Success : ಒಂದೊಮ್ಮೆ ಕೋಚಿಂಗ್ ಪಡೆಯಲೂ ಹಣವಿಲ್ಲದೆ ಹಿಂದೇಟು ಹಾಕಿದ್ದ ಅದೇ ಯುವಕ, ಇಂದು ಬರೋಬ್ಬರಿ 3.5 ಕೋಟಿ ರೂ.ಗಳ ವಿಶ್ವ ವಿದ್ಯಾಲಯದ ಜಾಗತಿಕ ಸ್ಕಾಲರ್‌ಶಿಪ್ ಪಡೆದು ಇಡೀ ಜಗತ್ತಿನ ಗಮನ ಸೆಳೆದಿದ್ದಾನೆ. ಬಿಹಾರದ ಚಂಪಾರಣ್ ಜಿಲ್ಲೆಯ ಮೋತಿಹಾರಿ ಹಳ್ಳಿಯ 19 ವರ್ಷದ ಆದರ್ಶ್ ಕುಮಾರ್ ಎಂಬ ಯುವ ಪ್ರತಿಭೆಯ ಈ ಸ್ಫೂರ್ತಿದಾಯಕ ಯಶೋಗಾಥೆಯು ಬಡ ವಿದ್ಯಾರ್ಥಿಗಳಿಗೆ ದೊಡ್ಡ ಭರವಸೆಯ ಬೆಳಕಾಗಿದೆ.

ಜೀವನದ ಮಿತಿಗಳನ್ನು ಮೀರಿ ಉಜ್ವಲ ಭವಿಷ್ಯವನ್ನು ಹುಡುಕಲು ಹೊರಟ ಆದರ್ಶ್ ಕುಮಾರ್ ತನ್ನ 14ನೇ ವಯಸ್ಸಿನಲ್ಲಿ ಕೇವಲ 1,000 ರೂಪಾಯಿ ಹಾಗೂ ಹಳೆಯ ಲ್ಯಾಪ್‌ಟಾಪ್‌ನೊಂದಿಗೆ ಮನೆಬಿಟ್ಟು ಹೊರಟಿದ್ದರು. ಕೋಚಿಂಗ್ ಸಂಸ್ಥೆಗಳಿಗೆ ಲಕ್ಷಾಂತರ ರೂ. ಕಟ್ಟಿ ಓದಲು ಆರ್ಥಿಕ ಸ್ಥಿತಿಯಿಲ್ಲದಿದ್ದರೂ, ಆದರ್ಶ್ ಎಂದಿಗೂ ಕುಗ್ಗಲಿಲ್ಲ. ಬದಲಿಗೆ ಕ್ಷೇತ್ರ ಮಟ್ಟದ ಯೋಜನೆಗಳು ಹಾಗೂ ಸ್ಟಾರ್ಟ್‌ಅಪ್‌ಗಳ ಮೂಲಕ ಪರ್ಯಾಯ ಹಾದಿಗಳನ್ನು ಕಂಡುಕೊಳ್ಳುವಲ್ಲಿ ಅವರು ಯಶಸ್ವಿಯಾದರು. ವಿದ್ಯಾರ್ಥಿಗಳಿಗೆ ಅಗತ್ಯವಿರುವ ಕೌಶಲ್ಯ, ಮಾರ್ಗದರ್ಶನ ಮತ್ತು ಅವಕಾಶಗಳನ್ನು ಒದಗಿಸುವ ಉದ್ದೇಶದಿಂದ 'ಸ್ಕಿಲ್ಜೋ' (Skillzo) ಎಂಬ ನವೀನ ವೇದಿಕೆಯನ್ನು ಸ್ಥಾಪಿಸಿದರು. ಈ ಮೂಲಕ ಇದುವರೆಗೆ ಸುಮಾರು 20,000ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಪ್ರಯೋಜನ ಪಡೆದಿದ್ದಾರೆ.

ಒಂದೆಡೆ 'ಸ್ಕಿಲ್ಜೋ' ವೇದಿಕೆಯನ್ನು ಯಶಸ್ವಿಯಾಗಿ ಮುನ್ನಡೆಸುತ್ತಿರುವ ಆದರ್ಶ್, ಮತ್ತೊಂದೆಡೆ ಗೂಗಲ್ ಯೂತ್ ಅಡ್ವೈಸರ್ (Google Youth Advisor) ಆಗಿ ಹಾಗೂ ಅಂತಾರಾಷ್ಟ್ರೀಯ ಉದ್ಯಮಶೀಲತಾ ಕಾರ್ಯಕ್ರಮಗಳಲ್ಲಿ ಪ್ರಮುಖ ಪಾಲುದಾರರಾಗಿ ಹೊರಹೊಮ್ಮಿದರು. ಈ ಎಲ್ಲ ಸಾಧನೆಗಳ ಹಾದಿಯಲ್ಲಿ, 148 ದೇಶಗಳಿಂದ ಬಂದ ಸುಮಾರು 11,000ಕ್ಕೂ ಅಧಿಕ ನಾಮನಿರ್ದೇಶನಗಳನ್ನು ಹಿಂದಿಕ್ಕಿ ಅತ್ಯಂತ ಪ್ರತಿಷ್ಠಿತ 'ಗ್ಲೋಬಲ್ ಸ್ಟೂಡೆಂಟ್ ಪ್ರೈಜ್ 2025' (Global Student Prize 2025) ಪ್ರಶಸ್ತಿ ಪಡೆದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ಈ ಅದ್ಭುತ ಯಶಸ್ಸಿನ ಹಿಂದಿನ ಹಾದಿ ಹೂವಿನ ಹಾಸಿಗೆಯಾಗಿರಲಿಲ್ಲ. ವಿದೇಶದಲ್ಲಿ ಓದುವ ಕನಸಿನೊಂದಿಗೆ ಅರ್ಜಿ ಸಲ್ಲಿಸಿದಾಗ, ಒಂದಲ್ಲ ಎರಡಲ್ಲ ಬರೋಬ್ಬರಿ 22 ವಿಶ್ವವಿದ್ಯಾಲಯಗಳು ಆತನ ಅರ್ಜಿಯನ್ನು ತಿರಸ್ಕರಿಸಿದ್ದವು! ಸಾಮಾನ್ಯ ಪ್ರವೇಶಾತಿಗೆ ನಿಗದಿಯಾಗಿದ್ದ ಗಡುವು ಮುಗಿದು ಎಲ್ಲಾ ದಾರಿಗಳು ಬಂದ್ ಆಗಿದ್ದ ಆ ಕಷ್ಟದ ಸಮಯದಲ್ಲಿ, ಕಾರ್ನೆಲ್ ವಿಶ್ವವಿದ್ಯಾಲಯದ ಹಳೆ ವಿದ್ಯಾರ್ಥಿ ಜಾನ್ ಲ್ಯೂ ನಡೆಸುತ್ತಿರುವ 'ಸೆಕೆಂಡ್ ಚಾನ್ಸ್' ಸಂಸ್ಥೆಯು ಆದರ್ಶ್‌ಗೆ ಬೆನ್ನೆಲುಬಾಗಿ ನಿಂತಿತು. ಕತಾರ್‌ನ ಜಾರ್ಜ್ಟೌನ್ ವಿಶ್ವವಿದ್ಯಾಲಯದ ವಿಶೇಷ ಪಾಲುದಾರಿಕೆಯ ಮೂಲಕ ಆದರ್ಶ್ ಪ್ರೊಫೈಲ್ ಅನ್ನು ಮರುಪರಿಶೀಲಿಸುವಂತೆ ಜಾನ್ ಮನವಿ ಮಾಡಿಕೊಂಡರು. ಆ ಒಂದು ವಿನಾಯಿತಿಯೇ ಆದರ್ಶ್ ಜೀವನದ ದಿಕ್ಕನ್ನೇ ಸಂಪೂರ್ಣವಾಗಿ ಬದಲಾಯಿಸಿಬಿಟ್ಟಿತು.

ಮನೆಯಲ್ಲಿ ತಾಯಿಯ ಜೊತೆ ಕುಳಿತಿದ್ದಾಗ ಜಾರ್ಜ್ಟೌನ್ ವಿಶ್ವವಿದ್ಯಾಲಯದಿಂದ ಬಂದ ಆ ಅದ್ಭುತ ಇಮೇಲ್, ಆದರ್ಶ್ ಜೀವನದ ದೊಡ್ಡ ತಿರುವಾಯಿತು. ಅದು ಬರೋಬ್ಬರಿ 3.5 ಕೋಟಿ ರೂ.ಗಳ ಸಂಪೂರ್ಣ ಸ್ಕಾಲರ್‌ಶಿಪ್‌ ಒಳಗೊಂಡ ಪ್ರವೇಶ ಪತ್ರವಾಗಿತ್ತು. ಇದರಲ್ಲಿ ಬೋಧನಾ ಶುಲ್ಕ, ವಸತಿ, ಊಟ, ವಿಮಾನ ಟಿಕೆಟ್, ವೀಸಾ, ಆರೋಗ್ಯ ವಿಮೆ ಸೇರಿದಂತೆ ಎಲ್ಲಾ ವೆಚ್ಚಗಳು ಸಂಪೂರ್ಣ ಉಚಿತವಾಗಿದ್ದವು. ಈ ಸುದ್ದಿಯನ್ನು ಕೇಳಿ ಭಾವುಕರಾದ ಆದರ್ಶ್, ತಂದೆಯಿಲ್ಲದೆ ತಮ್ಮನ್ನು ಬೆಳೆಸಿದ ಅಮ್ಮನ ಬಳಿ ಮೊದಲು ಈ ಸಂತೋಷವನ್ನು ಹಂಚಿಕೊಂಡರು. ಕತಾರ್‌ನ 'ಎಜುಕೇಶನ್ ಸಿಟಿ'ಯಲ್ಲಿರುವ ಈ ವಿಶ್ವವಿದ್ಯಾಲಯದಲ್ಲಿ 70ಕ್ಕೂ ಹೆಚ್ಚು ದೇಶಗಳ ವಿದ್ಯಾರ್ಥಿಗಳೊಂದಿಗೆ ಅವರು ರಾಜಕೀಯ, ಅರ್ಥಶಾಸ್ತ್ರ ಮತ್ತು ಅಂತಾರರಾಷ್ಟ್ರೀಯ ಸಂಬಂಧಗಳು ವಿಷಯದಡಿ ಉನ್ನತ ಶಿಕ್ಷಣ ಪಡೆಯಲಿದ್ದಾರೆ.

ಬಿಹಾರದ ಸರ್ಕಾರಿ ಶಾಲೆಯಲ್ಲಿ ಓದಿದ ಅನುಭವ ಹಾಗೂ 'ಸ್ಕಿಲ್ಜೋ' ಮೂಲಕ ಮಾಡಿದ ಸಮಾಜ ಸೇವೆಯು ನೀತಿಗಳ ಪ್ರಾಮುಖ್ಯತೆಯನ್ನು ಆದರ್ಶ್‌ಗೆ ಕಲಿಸಿಕೊಟ್ಟಿದೆ. ಹಾಗಾಗಿ ಕೇವಲ ವೈಯಕ್ತಿಕ ಯಶಸ್ಸಿಗೆ ಸೀಮಿತವಾಗದೆ, ಶಿಕ್ಷಣ, ಉದ್ಯೋಗ ಮತ್ತು ಸರ್ಕಾರಿ ಯೋಜನೆಗಳ ವಿನ್ಯಾಸದಲ್ಲಿ ಪ್ರಮುಖ ಬದಲಾವಣೆ ತರಲು ನೀತಿಗಳು ಹಾಗೂ ಜಾಗತಿಕ ಆಡಳಿತ ಕ್ಷೇತ್ರದಲ್ಲಿ ಕೆಲಸ ಮಾಡುವ ಗುರಿ ಹೊಂದಿದ್ದಾರೆ. ಈ ಯಶಸ್ಸಿನ ಬಳಿಕ ಬಿಹಾರ ರಾಜ್ಯಪಾಲರು ಹಾಗೂ ಶಿಕ್ಷಣ ಸಚಿವರು ಅಭಿನಂದಿಸಿದ್ದಾರೆ.

ಸಣ್ಣ ಹಳ್ಳಿಗಳು ಮತ್ತು ಬಡ ಕುಟುಂಬಗಳ ವಿದ್ಯಾರ್ಥಿಗಳಿಗೆ ಆದರ್ಶ್ ಒಂದು ಸ್ಪಷ್ಟ ಸಂದೇಶ ನೀಡಿದ್ದಾರೆ. ಅದೇನೆಂದರೆ, ಯಾವುದೇ ಕಾರಣಕ್ಕೂ ನೀವೇ ನಿಮ್ಮನ್ನು ತಿರಸ್ಕರಿಸಿಕೊಳ್ಳಬೇಡಿ. ತಿರಸ್ಕಾರಗಳು ಎದುರಾದರೂ ಪ್ರಯತ್ನಿಸುವುದನ್ನು ನಿಲ್ಲಿಸಬೇಡಿ, ಲಭ್ಯವಿರುವ ಸಣ್ಣ ಅವಕಾಶಗಳಿಂದಲೇ ದೊಡ್ಡ ಕನಸುಗಳಿಗಾಗಿ ಹೋರಾಡಿ ಎಂಬುದು , (ಏಜೆನ್ಸೀಸ್​).