ಜಮ್ಮು-ಕಾಶ್ಮೀರ ಗಡಿ ಭಾಗದಲ್ಲಿ ವಿಶೇಷ ಹವನ: "ಮೋದಿಯವರೇ ಇನ್ನೂ 24 ವರ್ಷ ದೇಶ ಮುನ್ನಡೆಸಲಿ" ಎಂದ ಗ್ರಾಮಸ್ಥರು! | Jammu-Kashmir

ಗಡಿಯ ಬೇಲಿಯಿಂದ ಕೆಲವೇ ಮೀಟರ್ ದೂರದಲ್ಲಿ ನಡೆದ ಈ ಹವನದಲ್ಲಿ ಹಲವು ಗ್ರಾಮಸ್ಥರು ಭಾಗವಹಿಸಿದರು. ಹಿಂದೆ ಇದೇ ಪ್ರದೇಶದಲ್ಲಿ ಶೆಲ್ ದಾಳಿಗಳ ಭೀತಿ ಇತ್ತು. ಆದರೆ ಈಗ ಜನರು ಮುಕ್ತವಾಗಿ ಸೇರಿ ಪ್ರಾರ್ಥನೆ ಮಾಡುವಷ್ಟು ಶಾಂತಿ ನೆಲೆಸಿದೆ ಎಂದು ಗ್ರಾಮಸ್ಥರು ಹೇಳಿದ್ದಾರೆ.

ಆರ್ನಿಯಾ ಗ್ರಾಮದ ಸರ್ಪಂಚ್ ಬಲ್ಬೀರ್ ಕೌರ್ ಮಾತನಾಡಿ, "ಇಂದು ನಾವು ಗಡಿಯ ಸಮೀಪ ಯಾವುದೇ ಭಯವಿಲ್ಲದೆ ಹವನ ಮಾಡುತ್ತಿದ್ದೇವೆ. ಇದಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರ ದೃಢ ನೀತಿಗಳೇ ಕಾರಣ. ಅವರು ಇನ್ನೂ 24 ವರ್ಷ ದೇಶದ ನಾಯಕತ್ವ ವಹಿಸಬೇಕು ಎಂಬುದು ನಮ್ಮ ಆಶಯ" ಎಂದು ಹೇಳಿದರು.

ಗಡಿ ಭಾಗದ ಅನೇಕ ಕುಟುಂಬಗಳು ದೇಶ ವಿಭಜನೆಯ ಸಂದರ್ಭದಲ್ಲಿ ಇಂದಿನ ಪಾಕಿಸ್ತಾನ ಪ್ರದೇಶದಿಂದ ಭಾರತಕ್ಕೆ ವಲಸೆ ಬಂದಿದ್ದವು. ತಮ್ಮ ಪೂರ್ವಜರ ಜಮೀನು ಮತ್ತು ಆಸ್ತಿಗಳನ್ನು ಅಲ್ಲಿ ಬಿಟ್ಟು ಬಂದಿದ್ದ ಕುಟುಂಬಗಳಿಗೆ ಈಗಲೂ ಆ ನೆನಪು ಕಾಡುತ್ತಿದೆ. ಹೀಗಾಗಿ ಮುಂದಿನ ಅವಧಿಯಲ್ಲಿ ಪಾಕ್ ಆಕ್ರಮಿತ ಕಾಶ್ಮೀರ (PoK) ಭಾರತಕ್ಕೆ ಸೇರಬೇಕು ಎಂಬುದು ಅವರ ಪ್ರಮುಖ ಬೇಡಿಕೆಯಾಗಿದೆ.

ಗ್ರಾಮಸ್ಥರ ಪ್ರಕಾರ, ಮೋದಿ ಸರ್ಕಾರದ ಅವಧಿಯಲ್ಲಿ ಪಾಕಿಸ್ತಾನದ ವಿರುದ್ಧದ ನೀತಿಯಲ್ಲಿ ಸ್ಪಷ್ಟ ಬದಲಾವಣೆ ಕಂಡುಬಂದಿದೆ. ವಿಶೇಷವಾಗಿ ಉರಿ ಉಗ್ರ ದಾಳಿಯ ನಂತರ ಭಾರತ ನಡೆಸಿದ ಸರ್ಜಿಕಲ್ ಸ್ಟ್ರೈಕ್ ದೇಶದ ಭದ್ರತಾ ನೀತಿಗೆ ಹೊಸ ದಿಕ್ಕು ನೀಡಿತು. ಭಾರತಕ್ಕೆ ಹಾನಿ ಮಾಡಿದರೆ ತಕ್ಕ ಉತ್ತರ ಸಿಗುತ್ತದೆ ಎಂಬ ಸಂದೇಶವನ್ನು ವಿಶ್ವಕ್ಕೆ ತಲುಪಿಸಲಾಯಿತು ಎಂದು ಅವರು ಹೇಳಿದ್ದಾರೆ.

ಮತ್ತೊಬ್ಬ ಗ್ರಾಮಸ್ಥ ಗಾರು ಮಾತನಾಡಿ, "ಹಿಂದೆ ಪಾಕಿಸ್ತಾನದಿಂದ ಶೆಲ್ ದಾಳಿ ನಡೆದಾಗ ಮನೆ ಬಿಟ್ಟು ಸುರಕ್ಷಿತ ಸ್ಥಳಗಳಿಗೆ ಹೋಗಬೇಕಾಗುತ್ತಿತ್ತು. ಈಗ ಆ ಪರಿಸ್ಥಿತಿ ಇಲ್ಲ. ನಾವು ನೆಮ್ಮದಿಯಿಂದ ಬದುಕುತ್ತಿದ್ದೇವೆ" ಎಂದು ಹೇಳಿದರು.

2018ರ ನಂತರ ಗಡಿಯ ಸಮೀಪದ ರೈತರಿಗೆ ತಮ್ಮ ಜಮೀನಿನಲ್ಲಿ ಮುಕ್ತವಾಗಿ ಕೃಷಿ ಮಾಡಲು ಅವಕಾಶ ದೊರೆತಿದೆ. ಹಿಂದೆ ನಿರಂತರ ಶೆಲ್ ದಾಳಿಗಳ ಭಯದಿಂದ ಗಡಿಯ ಸಮೀಪದ ಜಮೀನುಗಳಿಗೆ ಹೋಗುವುದು ಕಷ್ಟವಾಗಿತ್ತು. ಆದರೆ ಈಗ ರೈತರು 'ಜೀರೋ ಲೈನ್'ವರೆಗೆ ಕೃಷಿ ಮಾಡುತ್ತಿದ್ದಾರೆ.

ಆದರೆ ಗ್ರಾಮಸ್ಥರ ಇನ್ನೊಂದು ಪ್ರಮುಖ ಬೇಡಿಕೆ ಭೂಮಿ ಮಾಲೀಕತ್ವಕ್ಕೆ ಸಂಬಂಧಿಸಿದೆ. "ನಾವು ಹಲವು ತಲೆಮಾರುಗಳಿಂದ ಇಲ್ಲಿ ವಾಸಿಸುತ್ತಿದ್ದೇವೆ. ಆದರೆ ಜಮೀನು ನಮ್ಮ ಹೆಸರಿಗೆ ಆಗಿಲ್ಲ. ಅದನ್ನು ಪರಿಹರಿಸುವ ಶಕ್ತಿ ಮೋದಿ ಅವರಿಗಿದೆ" ಎಂದು ಗ್ರಾಮಸ್ಥ ರತ್ತನ್ ಲಾಲ್ ಹೇಳಿದ್ದಾರೆ.

ಒಂದೊಮ್ಮೆ ಬಂಕರ್‌ಗಳು ಮತ್ತು ಯುದ್ಧದ ಭೀತಿಯಿಂದ ಗುರುತಿಸಿಕೊಂಡಿದ್ದ ಈ ಗಡಿ ಪ್ರದೇಶಗಳು ಈಗ ಹಸಿರು ಬೆಳೆ, ಟ್ರ್ಯಾಕ್ಟರ್‌ಗಳ ಓಡಾಟ ಮತ್ತು ರೈತರ ಚಟುವಟಿಕೆಗಳಿಂದ ತುಂಬಿವೆ. ಗಡಿಯ ಜನರ ಬದುಕಿನಲ್ಲಿ ಕಳೆದ 12 ವರ್ಷಗಳಲ್ಲಿ ಗಮನಾರ್ಹ ಬದಲಾವಣೆ ಕಂಡುಬಂದಿದೆ ಎಂಬ ಅಭಿಪ್ರಾಯ ಅಲ್ಲಿನ ಜನರಿಂದ ವ್ಯಕ್ತವಾಗಿದೆ,(ಏಜೆನ್ಸೀಸ್​).