ಒಬ್ಬ ವ್ಯಕ್ತಿಗೆ ಇಷ್ಟೊಂದು ಹೆಸರುಗಳಾ? ಸತ್ಯ ತಿಳಿದ್ರೆ ಶಾಕ್​ ಆಗುವುದು ಖಚಿತ, ಇದು 20 ಕೋಟಿಯ ರೋಚಕ ಕತೆ! So Many Names

ವಿಜಯವಾಡ: ಓಬುಲೇಸು, ಮಹೇಶ್ ರೆಡ್ಡಿ, ಮನೋಹರ್ ರೆಡ್ಡಿ, ಭಾಸ್ಕರ್ ರೆಡ್ಡಿ, ಚಕ್ಕರೆಡ್ಡಿ...ಹೀಗೆ ನಾನಾ ಹೆಸರಿನಲ್ಲಿರುವುದು ( So many Names ) ಒಬ್ಬನೇ ವ್ಯಕ್ತಿ. ಹೋದಲ್ಲೆಲ್ಲಾ ಹೊಸ ಹೆಸರು ಅಳವಡಿಸಿಕೊಳ್ಳುವುದು ಆತನಗಿರುವ ಅಭ್ಯಾಸ. ತನ್ನನ್ನು ನಂಬಿದವರನ್ನು ವಂಚಿಸುವುದೇ ಆತನ ಹವ್ಯಾಸ. ಹೋದಲ್ಲೆಲ್ಲಾ ಕೋಟ್ಯಂತರ ರೂಪಾಯಿ ಪಂಗನಾಮ ಹಾಕುವುದೇ ಆತನ ವೃತ್ತಿ. ಹಲವು ಪ್ರದೇಶಗಳಲ್ಲಿ ವಂಚನೆ ಮಾಡಿರುವ ಈ ಮಹಾನ್​ ವಂಚಕ ಈಗಾಗಲೇ ಹಲವಾರು ಬಾರಿ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದು, ಜೈಲಿಗೆ ಹೋಗಿದ್ದಾನೆ. ಆದರೂ, ಈತನಿಗೆ ಬುದ್ಧಿ ಮಾತ್ರ ಇನ್ನೂ ಬಂದಿಲ್ಲ. ತನ್ನ ಇತ್ತೀಚಿನ ವಂಚನೆಗಳಿಂದ ಮತ್ತೊಮ್ಮೆ ರಾಯದುರ್ಗಂ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದು, ಜೈಲು ಪಾಲಾಗಿದ್ದಾನೆ.

ನಯವಂಚಕ ಓಬಲೇಸು, ಅನಂತಪುರ ಜಿಲ್ಲೆಯ ಗರ್ಲದಿನ್ನೆ ಮಂಡಲದ ಕೊಪ್ಪಳಕೊಂಡ ಗ್ರಾಮದ ನಿವಾಸಿ. ಈತನ ವಂಚನೆಗಳು ಒಂದೊಂದಾಗಿ ಬೆಳಕಿಗೆ ಬರುತ್ತಿರುವುದರಿಂದ ಎಲ್ಲರೂ ಆಶ್ಚರ್ಯಚಕಿತರಾಗಿದ್ದಾರೆ. ಈತ ಬೇರೆ ಬೇರೆ ಊರುಗಳಲ್ಲಿ ಬೇರೆ ಬೇರೆ ಹೆಸರುಗಳಿಂದ ಗುರುತಿಸಿಕೊಳ್ಳುತ್ತಿದ್ದ. ತಾನು ದೊಡ್ಡ ಪ್ರಭಾವಿ ವ್ಯಕ್ತಿ ಅಥವಾ ಸರ್ಕಾರಿ ಅಧಿಕಾರಿಗಳ ಆಪ್ತ ಎಂದು ನಂಬಿಸಲು ಹತ್ತಾರು ಸುಳ್ಳು ಗುರುತುಗಳನ್ನು ಸೃಷ್ಟಿಸಿಕೊಂಡಿದ್ದ. ನಿರುದ್ಯೋಗಿ ಯುವಕರಿಗೆ ರೈಲ್ವೆ ಇಲಾಖೆ, ಪೊಲೀಸ್ ಇಲಾಖೆ ಅಥವಾ ಇತರ ಸರ್ಕಾರಿ ಕಚೇರಿಗಳಲ್ಲಿ ಕೆಲಸ ಕೊಡಿಸುವುದಾಗಿ ನಂಬಿಸಿ ಅವರಿಂದ ಲಕ್ಷಾಂತರ ರೂಪಾಯಿ ಹಣ ಪಡೆದು ಪಂಗನಾಮ ಹಾಕುತ್ತಿದ್ದ.

ವಿವಾದಿತ ಭೂಮಿಗಳನ್ನು ತೋರಿಸಿ ಅಥವಾ ಸುಳ್ಳು ದಾಖಲೆಗಳನ್ನು ಸೃಷ್ಟಿಸಿ ಸೈಟು ಕೊಡಿಸುವುದಾಗಿ ಜನರನ್ನು ನಂಬಿಸುತ್ತಿದ್ದ. ತನ್ನ ಮಾತಿನ ಚಾಕಚಕ್ಯತೆಯಿಂದ ಜನರಲ್ಲಿ ವಿಶ್ವಾಸ ಮೂಡಿಸಿ ಮುಂಗಡ ಹಣ ಪಡೆದು ನಂತರ ನಾಪತ್ತೆಯಾಗುತ್ತಿದ್ದ. ಕಡಿಮೆ ಅವಧಿಯಲ್ಲಿ ಹಣವನ್ನು ದ್ವಿಗುಣಗೊಳಿಸುವುದಾಗಿ ಅಥವಾ ಲಾಭದಾಯಕ ಯೋಜನೆಗಳಲ್ಲಿ ಹೂಡಿಕೆ ಮಾಡಿಸುವುದಾಗಿ ನಂಬಿಸಿ ಸಾಮಾನ್ಯ ಜನರಿಂದ ಹಣ ವಸೂಲಿ ಮಾಡುತ್ತಿದ್ದ.

ಲಕ್ಷ ಲಕ್ಷ ಸಾಲ ಪಡೆದು ಅದಕ್ಕೆ ಭಾರಿ ಬಡ್ಡಿಯನ್ನು ಪಾವತಿಸುತ್ತಿದ್ದ. ಕೆಲವು ದಿನಗಳವರೆಗೆ ಬಡ್ಡಿಯನ್ನು ಕಟ್ಟಿ ನಂಬಿಸುತ್ತಿದ್ದ. ಆನಂತರ, ಬಡ್ಡಿ ಮತ್ತು ಅಸಲು ಕೊಡದೇ ಯಾಮಾರಿಸುತ್ತಿದ್ದ. ಹೀಗೆ ಕೋಟ್ಯಂತರ ರೂಪಾಯಿಗಳನ್ನು ಸಂಗ್ರಹಿಸಿರುವ ಆರೋಪವಿದೆ. ಈಗಾಗಲೇ ಅನೇಕ ಜಿಲ್ಲೆಗಳಲ್ಲಿ ಈತನ ವಂಚನೆಗೆ ಬಲಿಯಾಗಿದ್ದಾರೆ. ಇತ್ತೀಚೆಗೆ, ಮಹೇಶ್ ರೆಡ್ಡಿ ಹೆಸರಿನಲ್ಲಿ ಬೊಮ್ಮನಹಾಲ್ ಪಿಎಸ್ ವ್ಯಾಪ್ತಿಯ ಉದ್ದೇಹಾಲ್‌ನಲ್ಲಿ 1.50 ಕೋಟಿ ರೂ.ಗಳ ವಂಚನೆಯನ್ನು ಮಾಡಿದ್ದಾನೆ. ಪೊಲೀಸ್ ತನಿಖೆಯಲ್ಲಿ ಕಳೆದ ಆರು ವರ್ಷಗಳಲ್ಲಿ 20 ಕೋಟಿ ರೂ.ಗಳಿಗೂ ಹೆಚ್ಚು ವಂಚನೆಗಳನ್ನು ಮಾಡಿದ್ದಾನೆ ಎಂದು ತಿಳಿದುಬಂದಿದೆ.

2022, ಮೇ ತಿಂಗಳಲ್ಲಿ ಭಾಸ್ಕರ್ ರೆಡ್ಡಿ ಹೆಸರಿನಲ್ಲಿ ಗುರುತಿಸಿಕೊಂಡ ಓಬುಲೇಸು, ನಂದ್ಯಾಲ್ ಜಿಲ್ಲೆಯ ಅವುಕಿನಲ್ಲಿ ಒಂದು ರೂಮ್​ ಅನ್ನು ಬಾಡಿಗೆಗೆ ಪಡೆದು, ಅಡುಗೆ ಎಣ್ಣೆ, ಸಕ್ಕರೆ ಮತ್ತು ಸಿಗರೇಟ್ ವ್ಯವಹಾರದಲ್ಲಿ ತೊಡಗಿರುವಂತೆ ನಟಿಸಿ ಸ್ಥಳೀಯರಿಗೆ ಸುಮಾರು 3 ಕೋಟಿ ರೂ.ಗಳನ್ನು ವಂಚಿಸಿದನು. ಸಂತ್ರಸ್ತರ ದೂರಿನ ಆಧಾರದ ಮೇಲೆ, ಅವುಕು ಪೊಲೀಸರು ಅನ್ನಮಯ್ಯ ಜಿಲ್ಲೆಯ ಗಾಳಿವೀಡುವಿನಲ್ಲಿ ಆತನನ್ನು ಬಂಧಿಸಿ ಜೈಲಿಗೆ ಕಳುಹಿಸಿದ್ದರು.

ನಂತರ, ಓಬುಲೇಸು ಜೈಲಿನಿಂದ ಹೊರಬಂದು 2023, ಜನವರಿ ತಿಂಗಳಲ್ಲಿ ಶ್ರೀ ಸತ್ಯಸಾಯಿ ಜಿಲ್ಲೆಯ ಸೋಮಂದೆಪಲ್ಲಿಯಲ್ಲಿ ಷೇರು ಮಾರುಕಟ್ಟೆ ವ್ಯವಹಾರದ ಹೆಸರಿನಲ್ಲಿ ಸುಮಾರು 2.5 ಕೋಟಿ ರೂ.ಗಳನ್ನು ಸಂಗ್ರಹಿಸಿ ತಲೆಮರೆಸಿಕೊಂಡನು. ಅದಕ್ಕೂ ಮೊದಲು, ಕಣೇಕಲ್ಲು ಮತ್ತು ಆತ್ಮಕೂರಿನಲ್ಲಿ 4 ಕೋಟಿ ರೂ.ಗಳವರೆಗೆ ಜನರನ್ನು ವಂಚಿಸಿದ್ದ. ಆ ಬಳಿಕ ಓಬುಲೇಸು, ಬೊಮ್ಮನಹಾಲ್ ಮಂಡಲದ ಉದ್ದೇಹಾಲ್ ಗ್ರಾಮವನ್ನು ತಲುಪಿದನು. ಮಹೇಶ್​ ರೆಡ್ಡಿ ಎಂಬ ಹೆಸರಿನಲ್ಲಿ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದ. ಬಾಡಿಗೆ ಕಾರನ್ನು ತನ್ನದೇ ವಾಹನ ಎಂದು ಹೇಳಿಕೊಂಡು ಓಡಾಡುತ್ತಿದ್ದ. ಸಿಗರೇಟ್ ಮತ್ತು ಸಕ್ಕರೆ ರಫ್ತು ಹಾಗೂ ಆಮದು ವ್ಯವಹಾರ ಮಾಡುತ್ತಿದ್ದೇನೆ ಎಂದು ಎಲ್ಲರನ್ನು ನಂಬಿಸಿದ್ದ. ತನ್ನ ವ್ಯವಹಾರದಲ್ಲಿ ಹೂಡಿಕೆ ಮಾಡಿದರೆ 1 ಲಕ್ಷ ರೂಪಾಯಿಗೆ 3,000 ರೂಪಾಯಿ ಬಡ್ಡಿ ನೀಡುವುದಾಗಿ ನಂಬಿಸಿ, ಹತ್ತು ಜನರ ಬಳಿ ಸುಮಾರು 1.50 ಕೋಟಿ ರೂಪಾಯಿ ಸಂಗ್ರಹಿಸಿ ಪರಾರಿಯಾಗಿದ್ದ. 

ಈ ಓಬಲೇಸು ವಂಚನೆ ಇಷ್ಟಕ್ಕೆ ನಿಲ್ಲುವುದಿಲ್ಲ ಕುರುಬರನ್ನು ಸುಳ್ಳು ಮಾತುಗಳಿಂದ ವಂಚಿಸಿ ನೂರಾರು ಪ್ರಾಣಿಗಳನ್ನು ಕದ್ದೊಯ್ದಿದ್ದ. ಎಲ್ಲ ಸಂತ್ರಸ್ತರು ಪೊಲೀಸರಿಗೆ ದೂರು ನೀಡಿದಾಗ, ಪೊಲೀಸರು ಎಚ್ಚೆತ್ತು ತನಿಖೆಯನ್ನು ಚುರುಕುಗೊಳಿಸಿದರು. ಈ ಪ್ರಕ್ರಿಯೆಯಲ್ಲಿ, ಮಾರ್ಚ್​ 29 ರಂದು, ಪೊಲೀಸರು ಓಬುಲೇಸು ಮತ್ತು ಇತರ ಇಬ್ಬರನ್ನು ಬಂಧಿಸಿ ರಿಮಾಂಡ್‌ಗೆ ಕಳುಹಿಸಿದರು. ಆದರೆ, ಉದ್ದೇಹಾಲ್ ಗ್ರಾಮದಲ್ಲಿ ನಡೆದ 1.50 ಕೋಟಿ ರೂಪಾಯಿ ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಆರೋಪಿಗಳಿಂದ ಒಂದು ರೂಪಾಯಿಯನ್ನೂ ವಸೂಲಿ ಮಾಡದಿರುವುದು ಗಮನಾರ್ಹ, (ಏಜೆನ್ಸೀಸ್​).