ಬ್ರಹ್ಮಾಂಡವೇ ತನ್ಮಯವಾಯಿತು!... ವಿಕ್ರಮ್-1 ಸೂರ್ಯೋದಯದ ವಿಡಿಯೋ ಜೊತೆ ಸ್ಕೈರೂಟ್ ಸಂಸ್ಥಾಪಕರ ಭಾವುಕ ಪೋಸ್ಟ್! Skyroot Aerospace

ರಾಕೆಟ್‌ನ 'ಆರ್ಬಿಟಲ್ ಅಡ್ಜಸ್ಟ್‌ಮೆಂಟ್ ಮೊಡ್ಯೂಲ್  ಹಿಂಭಾಗದಿಂದ ಸೂರ್ಯ ಉದಯಿಸುವ ಈ ದೃಶ್ಯವು ವಜ್ರಾಕಾರದ ಫ್ರೇಮ್‌ನಲ್ಲಿ ಅತ್ಯಂತ ಸಿನಿಮೀಯ ಮಾದರಿಯಲ್ಲಿ ಕಂಗೊಳಿಸುತ್ತಿದೆ. ವಿಶೇಷವೆಂದರೆ ಈ ಮನಮೋಹಕ ನೋಟ ಸಿಕ್ಕಿದ್ದು ಯಾವುದೇ ಪೂರ್ವಾಕ್ಷಿತ ಯೋಜನೆಯಿಂದಲ್ಲ. ಬದಲಾಗಿ ಉಡಾವಣೆಯಲ್ಲಾದ ಸಣ್ಣ ವಿಳಂಬದಿಂದ ಎನ್ನಲಾಗಿದೆ. 

ಈ ಕುರಿತು ಸ್ಕೈರೂಟ್ ಜಂಟಿ ಸಂಸ್ಥಾಪಕ ಪವನ್ ಕುಮಾರ್ ಚಂದನಾ ತಮ್ಮ ಎಕ್ಸ್​ (X) ಖಾತೆಯಲ್ಲಿ ಹಂಚಿಕೊಂಡಿದ್ದು, "ಕೆಲವು ಮುಹೂರ್ತಗಳನ್ನು ನಾವು ತಂತ್ರಜ್ಞಾನದಿಂದ ರೂಪಿಸಲು ಸಾಧ್ಯವಿಲ್ಲ. ಲಾಂಚ್ ಹೋಲ್ಡ್‌ನಿಂದಾಗಿ ಈ ಅದ್ಭುತ ಸೂರ್ಯೋದಯ ಕೋನ ಸಿಕ್ಕಿದೆ. ಆಕಸ್ಮಿಕ ವಿಳಂಬವೇ ಈ ನೈಸರ್ಗಿಕ ಸೌಂದರ್ಯಕ್ಕೆ ದಾರಿಯಾಯಿತು. ಬಾಹ್ಯಾಕಾಶದಿಂದ ಸೆರೆಹಿಡಿಯಲಾದ ಅತ್ಯಂತ ಸುಂದರ ದೃಶ್ಯಗಳಲ್ಲಿ ಇದೂ ಒಂದಾಗಲಿದೆ ಎಂದು ಬರೆದುಕೊಂಡಿದ್ದಾರೆ. 

ವಿಕ್ರಮ್-1 ಸ್ಕೈರೂಟ್ ಸಂಸ್ಥೆಯ ಚೊಚ್ಚಲ ಆರ್ಬಿಟಲ್ ಉಡಾವಣಾ ನೌಕೆಯಾಗಿದ್ದು, ಸಣ್ಣ ಉಪಗ್ರಹಗಳನ್ನು ಭೂಮಿಯ ಕೆಳ ಹಂತದ ಕಕ್ಷೆಗೆ ತಲುಪಿಸಲು ವಿನ್ಯಾಸಗೊಳಿಸಲಾಗಿದೆ. ಇತ್ತೀಚೆಗೆ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಇದು ತನ್ನ ಮೊದಲ ಯಶಸ್ವಿ ಪರೀಕ್ಷಾರ್ಥ ಹಾರಾಟವನ್ನು ಪೂರ್ಣಗೊಳಿಸಿತ್ತು. 3-ಹಂತದ ತಂತ್ರಜ್ಞಾನ ಹೊಂದಿರುವ ಈ ರಾಕೆಟ್, ಕಾರ್ಬನ್ ಕಾಂಪೋಸಿಟ್ ಭಾಗಗಳು ಮತ್ತು 3D ಪ್ರಿಂಟೆಡ್ ಎಂಜಿನ್‌ಗಳನ್ನು ಹೊಂದಿದ್ದು, ಅತ್ಯಂತ ಕಡಿಮೆ ವೆಚ್ಚದಲ್ಲಿ ಉಪಗ್ರಹಗಳನ್ನು ಕಕ್ಷೆಗೆ ತಲುಪಿಸುವ ಸಾಮರ್ಥ್ಯ ಹೊಂದಿದೆ.

ಇಸ್ರೋ ಮಾಜಿ ವಿಜ್ಞಾನಿಗಳಾದ ಪವನ್ ಕುಮಾರ್ ಚಂದನಾ ಮತ್ತು ನಾಗ ಭರತ್ ಡಾಕಾ ಅವರು 2018 ರಲ್ಲಿ ಸ್ಥಾಪಿಸಿದ ಸ್ಕೈರೂಟ್, ಭಾರತದ ಖಾಸಗಿ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಅಗ್ರಗಣ್ಯ ಸಂಸ್ಥೆಯಾಗಿದೆ. 2022 ರಲ್ಲಿ ವಿಕ್ರಮ್-ಎಸ್ (Vikram-S) ಸಬ್‌ಆರ್ಬಿಟಲ್ ರಾಕೆಟ್ ಉಡಾವಣೆ ಮಾಡುವ ಮೂಲಕ ಬಾಹ್ಯಾಕಾಶಕ್ಕೆ ನೌಕೆ ರವಾನಿಸಿದ ಭಾರತದ ಮೊದಲ ಖಾಸಗಿ ಕಂಪನಿ ಎಂಬ ಹೆಗ್ಗಳಿಕೆಗೆ ಇದು ಪಾತ್ರವಾಗಿತ್ತು.

ಈಗ 'ವಿಕ್ರಮ್-1' ಯಶಸ್ಸಿನ ಜೊತೆಗೆ ಬಾಹ್ಯಾಕಾಶದಿಂದ ಬಂದಿರುವ ಈ ಸೂರ್ಯೋದಯದ ದೃಶ್ಯ ಭಾರತದ ಖಾಸಗಿ ಬಾಹ್ಯಾಕಾಶ ಯಾನದ ಸಾಮರ್ಥ್ಯ ಮತ್ತು ಸೌಂದರ್ಯಕ್ಕೆ ಸಾಕ್ಷಿಯಾಗಿದೆ (ಏಜೆನ್ಸೀಸ್​).