ಬಂಗಾಳದಲ್ಲಿ ಟಿಎಂಸಿ ನಾಯಕರ ಮೇಲೆ ಸರಣಿ ಮೊಟ್ಟೆ ದಾಳಿ: ಕೋರ್ಟ್ ಆವರಣದಲ್ಲೇ ಸೌಮಿತ್ರ ಬ್ಯಾನರ್ಜಿಗೆ ಕಳ್ಳ ಎಂದ ಸಾರ್ವಜನಿಕರು! Soumitra Banerjee

ಪಶ್ಚಿಮ ಬರ್ಧಮಾನ್ ಜಿಲ್ಲೆಯ ರಾಣಿಗಂಜ್ ನಗರದಲ್ಲಿ ಈ ಘಟನೆ ನಡೆದಿದ್ದು, ಟಿಎಂಸಿ ಪಕ್ಷದ ಒಳಗಿನ ಆಂತರಿಕ ಭಿನ್ನಮತ ಹಾಗೂ ವಿರೋಧ ಪಕ್ಷಗಳ ನಡುವಿನ ರಾಜಕೀಯ ಸಂಘರ್ಷಕ್ಕೆ ಈ ಬೆನ್ನುಬೆನ್ನಿಗೆ ನಡೆದ ದಾಳಿಗಳು ಸಾಕ್ಷಿಯಾಗಿವೆ.

ಬಿಜೆಪಿ ಕಾರ್ಯಕರ್ತರ ಮೇಲೆ ಹಲ್ಲೆ ನಡೆಸಿದ ಆರೋಪದಡಿ ಟಿಎಂಸಿ ಮುಖಂಡ ಸೌಮಿತ್ರ ಬ್ಯಾನರ್ಜಿ ಅವರನ್ನು ಪೊಲೀಸರು ಬಂಧಿಸಿದ್ದರು. ಮಂಗಳವಾರ ರಾಣಿಗಂಜ್‌ನಲ್ಲಿ ಅವರನ್ನು ಪೊಲೀಸರು ನ್ಯಾಯಾಲಯಕ್ಕೆ ಹಾಜರುಪಡಿಸಲು ಕರೆದೊಯ್ಯುತ್ತಿದ್ದಾಗ ಈ ಹೈಡ್ರಾಮಾ ನಡೆದಿದೆ. ಸ್ಥಳೀಯ ಬಿಜೆಪಿ ನಾಯಕ ರವಿ ಕೇಶರಿ ನೀಡಿದ ದೂರಿನ ಮೇರೆಗೆ ಪೊಲೀಸರು ಈ ಕ್ರಮ ಕೈಗೊಂಡಿದ್ದರು.

ಇದಕ್ಕೂ ಮುನ್ನ, ಸೋಮವಾರವಷ್ಟೇ ಟಿಎಂಸಿಯ ಅತ್ಯಂತ ಪ್ರಭಾವಿ ಹಾಗೂ ಹಿರಿಯ ನಾಯಕ ಕುನಾಲ್ ಘೋಷ್ ಅವರ ಮೇಲೂ ಇಂತಹುದೇ ದಾಳಿ ನಡೆದಿತ್ತು. ಕೋಲ್ಕತಾದಲ್ಲಿರುವ ಪಕ್ಷದ ಮುಖ್ಯಸ್ಥೆ ಹಾಗೂ ಮಾಜಿ ಮುಖ್ಯಮಂತ್ರಿ ಮಮತಾ ಅವರ ಅಧಿಕೃತ ನಿವಾಸದ ಹೊರಗಡೆಯೇ ಈ ಘಟನೆ ನಡೆದಿರುವುದು ಭದ್ರತಾ ಲೋಪವನ್ನು ಎತ್ತಿ ತೋರಿಸಿದೆ. ದೀದಿ ಅವರ ಮನೆಯಲ್ಲಿ ನಡೆದ ಪ್ರಮುಖ ಸಭೆಯಲ್ಲಿ ಪಾಲ್ಗೊಂಡು ಕುನಾಲ್ ಘೋಷ್ ಹೊರಬರುತ್ತಿದ್ದಾಗ, ಸ್ಥಳೀಯ ಯುವಕನೊಬ್ಬ ಅವರ ಮುಖಕ್ಕೆ ಗುರಿಯಿಟ್ಟು ಮೊಟ್ಟೆ ಎಸೆದಿದ್ದನು.

ದಾಳಿ ನಡೆಸಿದ ಚಂದನ್ ಎಂಬ ಯುವಕನನ್ನು ಪೊಲೀಸರು ವಶಕ್ಕೆ ಪಡೆದಿದ್ದು, ಟಿಎಂಸಿ ಸರ್ಕಾರದ ನೀತಿಗಳ ವಿರುದ್ಧ ನನಗಿರುವ ವೈಯಕ್ತಿಕ ಅಸಮಾಧಾನ ಮತ್ತು ಆಕ್ರೋಶದಿಂದಲೇ ನಾನು ಈ ಕೃತ್ಯ ಎಸಗಿದ್ದೇನೆ ಎಂದು ಆತ ಹೇಳಿಕೆ ನೀಡಿದ್ದಾನೆ.

ಈ ದುರದೃಷ್ಟಕರ ಘಟನೆಯ ಬಗ್ಗೆ ಪ್ರತಿಕ್ರಿಯಿಸಿರುವ ಕುನಾಲ್, ಮಮತಾ ಅವರ ನಿವಾಸದಿಂದ ಹೊರಬಂದಾಗ ಎಂದಿನಂತೆ ಪತ್ರಕರ್ತರು ಸಂದರ್ಶನಕ್ಕಾಗಿ ವಿನಂತಿಸಿದರು. ನಾನು ಅವರ ಪ್ರಶ್ನೆಗಳಿಗೆ ಉತ್ತರಿಸುತ್ತಿದ್ದಾಗ ಇಬ್ಬರು ಯುವಕರು ನನ್ನನ್ನು ಗುರಿಯಾಗಿಸಿಕೊಂಡು ಮೊಟ್ಟೆ ಎಸೆದರು. ತಕ್ಷಣ ನಾನು ಪಕ್ಕಕ್ಕೆ ಸರಿದಿದ್ದರಿಂದ ನನ್ನ ಕಣ್ಣು ಬದುಕುಳಿಯಿತು, ಇಲ್ಲದಿದ್ದರೆ ಕಣ್ಣಿಗೆ ಭಾರಿ ಪೆಟ್ಟಾಗುತ್ತಿತ್ತು. ಮಾಜಿ ಸಿಎಂ ಅವರಿಗೆ ಝೆಡ್ ಕೆಟಗರಿ ಭದ್ರತೆ ಇದೆ, ಆದರೂ ಅವರ ಮನೆಯ ಮುಂದೆಯೇ ಇಂತಹ ಘಟನೆ ನಡೆದಿರುವುದು ದುರಂತ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಇದನ್ನು ಸಾರ್ವಜನಿಕರ ಆಕ್ರೋಶ ಎಂದು ಕರೆಯಬೇಡಿ, ಇವರು ಬಿಜೆಪಿಯ ಗೂಂಡಾಗಳು. ಘಟನೆ ನಡೆಯುವಾಗ ಪೊಲೀಸರು ಸ್ಥಳದಲ್ಲೇ ಇದ್ದರೂ ಯಾವುದೇ ಕ್ರಮ ಕೈಗೊಳ್ಳಲಿಲ್ಲ. ಈ ಬಗ್ಗೆ ಪೊಲೀಸ್ ಕಮಿಷನರ್‌ಗೆ ದೂರು ನೀಡಿದ್ದೇನೆ. ಆದರೆ, ಇಂತಹ ದಾಳಿಗಳಿಂದ ನನ್ನನ್ನು ಹೆದರಿಸಲು ಸಾಧ್ಯವಿಲ್ಲ ಎಂದು ಘೋಷ್ ಸವಾಲು ಹಾಕಿದ್ದಾರೆ. ಸದ್ಯ ಪಶ್ಚಿಮ ಬಂಗಾಳದಲ್ಲಿ ಟಿಎಂಸಿ ನಾಯಕರ ಮೇಲಿನ ಸರಣಿ ಮೊಟ್ಟೆ ದಾಳಿಗಳು ರಾಜಕೀಯ ವಲಯದಲ್ಲಿ ಹೊಸ ಚರ್ಚೆಗೆ ನಾಂದಿ ಹಾಡಿವೆ,(ಏಜೆನ್ಸೀಸ್).