ಮೊಬೈಲ್​ನಲ್ಲಿ ಸಂಚಾರ್ ಸಾಥಿ ಆ್ಯಪ್ ಕಡ್ಡಾಯ; ದೇಶ ಸರ್ವಾಧಿಕಾರದತ್ತ ಸಾಗುವುದರ ಸಂಕೇತ ಎಂದ ಪ್ರಿಯಾಂಕಾ ಗಾಂಧಿ | Priyanka Gandhi

ನವದೆಹಲಿ: ಮೊಬೈಲ್​ ಫೋನ್ ತಯಾರಿಕ ಕಂಪನಿಗಳು ಹೊಸ ಮೊಬೈಲ್​ಗಳಲ್ಲಿ ಮೊದಲೇ ಸಂಚಾರ್ ಸಾಥಿ ಆ್ಯಪ್ ಕಡ್ಡಾಯವಾಗಿ ಅಳವಡಿಸುವಂತೆ ಕೇಂದ್ರ ಸಂಪರ್ಕ ಸಚಿವಾಲಯ ಆದೇಶಿಸಿದ್ದು, ಇದನ್ನು ಗೂಡಚಾರಿಕೆ ಅಪ್ಲಿಕೇಷನ್ ಎಂದು ಬಣ್ಣಿಸಿರುವ ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿ(Priyanka Gandhi), ದೇಶ ಸರ್ವಾಧಿಕಾರದತ್ತ ಹೋಗುತ್ತಿದೆ ಎಂದು ಆರೋಪಿಸಿದ್ದಾರೆ.

ದೆಹಲಿಯಲ್ಲಿ ಸಂಸತ್ ಬಳಿ ಸುದ್ದಿಗಾರರೊಂದಿಗೆ ಮಾತನಾಡಿರುವ ಅವರು, ನೀವೇ ಅದನ್ನು ಸ್ನೂಪಿಂಗ್ ಅಪ್ಲಿಕೇಶನ್ ಎಂದು ಕರೆಯುತ್ತಿದ್ದೀರಿ,ಆದ್ದರಿಂದ ಇದು ಸ್ನೂಪಿಂಗ್ ಅಪ್ಲಿಕೇಶನ್ ಆಗಿದೆ. ಕಡ್ಡಾಯ ಅನ್ನೋದು ಹಾಸ್ಯಾಸ್ಪದವಾಗಿದೆ. ನಾಗರಿಕರಿಗೆ ಗೌಪ್ಯತೆಯ ಹಕ್ಕಿದೆ. ನೀವೆಲ್ಲರೂ ನಿಮ್ಮ ಕುಟುಂಬ, ಸ್ನೇಹಿತರಿಗೆ ಕಳುಹಿಸುವ ಸಂದೇಶದ ಗೌಪ್ಯತೆಯನ್ನು ಸರ್ಕಾರ ನೋಡಬಾರದು, ನಿಮ್ಮ ಗೌಪ್ಯತೆಯ ಹಕ್ಕನ್ನು ಕಾಪಾಡಬೇಕು ಎಂದು ಹೇಳಿದ್ದಾರೆ.

ಇದು ಕೇವಲ ಒಂದು ವಿಷಯವಲ್ಲ, ಫೋನ್ ಕದ್ದಾಲಿಕೆ, ಒಟ್ಟಾರೆಯಾಗಿ, ಕೇಂದ್ರ ಸರ್ಕಾರ ಈ ದೇಶವನ್ನು ಪ್ರತಿಯೊಂದು ರೂಪದಲ್ಲೂ ಸರ್ವಾಧಿಕಾರವನ್ನಾಗಿ ಪರಿವರ್ತಿಸುತ್ತಿದೆ. ನೀವು ಪ್ರತಿದಿನ ನನ್ನನ್ನು ಕೇಳುತ್ತೀರಿ, ಸಂಸತ್ತು ಏಕೆ ಕಾರ್ಯನಿರ್ವಹಿಸುತ್ತಿಲ್ಲ, ಯಾಕಂದರೆ ಅವರು ಸರ್ಕಾರದ ಬಗ್ಗೆಯೂ ಮಾತನಾಡಲು ನಿರಾಕರಿಸುತ್ತಿದ್ದಾರೆ. ವಿರೋಧ ಪಕ್ಷಗಳನ್ನು ದೂಷಿಸುವುದು ಸುಲಭ, ಆದರೆ ಸರ್ಕಾರ ಚರ್ಚೆಗೆ ಅವಕಾಶ ಕೊಡುತ್ತಿಲ್ಲ ಎಂದು ಕಿಡಿಕಾರಿದ್ದಾರೆ.

ಆರೋಗ್ಯಕರ ಪ್ರಜಾಪ್ರಭುತ್ವವು ಚರ್ಚೆಗಳನ್ನು ಬಯಸುತ್ತದೆ, ಪ್ರತಿಯೊಬ್ಬರಿಗೂ ಅಭಿಪ್ರಾಯಗಳಿವೆ, ನೀವು ಅವುಗಳನ್ನು ಆಲಿಸಿ. ಅಪ್ಲಿಕೇಷನ್ ಕಡ್ಡಾಯ ಮಾಡೋದನ್ನು ಹಿಂದಕ್ಕೆ ಪಡೆಯಬೇಕು, ಅಂತಿಮ ನಿಲುವು ಏನೆಂಬುದನ್ನು ಚರ್ಚೆ ಮಾಡ್ತೇವೆ. ಸೈಬರ್ ಸುರಕ್ಷತೆಯ ಕುರಿತು ನಾವು ಹೆಚ್ಚು ವಿವರವಾಗಿ ಚರ್ಚಿಸಿದ್ದೇವೆ. ಖಂಡಿತವಾಗಿಯೂ ಸೈಬರ್ ಭದ್ರತೆಯ ಅವಶ್ಯಕತೆಯಿದೆ, ಆದರೆ ಅದು ಪ್ರತಿಯೊಬ್ಬ ನಾಗರಿಕರ ಮೊಬೈಲ್ ನೋಡಲು ಅಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

2025 ಜನವರಿಯಲ್ಲಿ ಬಿಡುಗಡೆಯಾದ ಸಂಚಾರ್ ಸಾಥಿ ಅಪ್ಲಿಕೇಶನ್, ಕಳ್ಳತನವಾಗಿರುವ ಫೋನ್ ಬಂದ್​ ಮಾಡುವುದು, ಬಳಕೆದಾರರ ಹೆಸರಿನಲ್ಲಿರುವ ಮೊಬೈಲ್ ಸಂಪರ್ಕಗಳನ್ನು ಪರಿಶೀಲಿಸುವುದು ಮತ್ತು ಶಂಕಿತ ವಂಚನೆಯನ್ನು ರಿಪೋರ್ಟ್ ಮಾಡುವಂತಹ ವಿವಿಧ ಇದು ಸೌಲಭ್ಯಗಳನ್ನು ನೀಡುತ್ತದೆ.

ಈ ಆ್ಯಪ್​ ಅನ್ನು ಮೊಬೈಲ್ ಹ್ಯಾಂಡ್‌ಸೆಟ್‌ಗಳ ತಯಾರಕರು ಮತ್ತು ಆಮದುದಾರರು ತಮ್ಮ ವಂಚನೆ ವರದಿ ಮಾಡುವ ಅಪ್ಲಿಕೇಶನ್ ಸಂಚಾರ್ ಸಾಥಿಯನ್ನು 90 ದಿನಗಳ ಒಳಗೆ ಎಲ್ಲಾ ಹೊಸ ಮೊಬೈಲ್​ಗಳಲ್ಲಿ ಮೊದಲೇ ಸ್ಥಾಪಿಸಲಾಗಿದೆಯೆ ಎಂದು ಖಚಿತಪಡಿಸಿಕೊಳ್ಳಬೇಕೆಂದು ದೂರಸಂಪರ್ಕ ಇಲಾಖೆ ನಿರ್ದೇಶನ ನೀಡಿದೆ.

ಆ್ಯಪಲ್, ಸ್ಯಾಮ್‌ಸಂಗ್, ಗೂಗಲ್, ವಿವೋ, ಒಪ್ಪೋ ಮತ್ತು ಶಿಯೋಮಿ ಸೇರಿದಂತೆ ಪ್ರಸ್ತುತ ಭಾರತದಲ್ಲಿ ಹ್ಯಾಂಡ್‌ಸೆಟ್‌ಗಳನ್ನು ತಯಾರಿಸುವ ಪ್ರಮುಖ ಕಂಪನಿಗಳು ಈ ನಿರ್ದೇಶನಕ್ಕೆ ಒಳಪಟ್ಟಿರುತ್ತವೆ. ಅದನ್ನು ಅಳವಡಿಸದಿದ್ದರೇ ದೂರಸಂಪರ್ಕ ಕಾಯ್ದೆ 2023, ಟೆಲಿಕಾಂ ಸೈಬರ್ ಭದ್ರತಾ ನಿಯಮಗಳು 2024 ಮತ್ತು ಇತರ ಅನ್ವಯಿಕ ಕಾನೂನುಗಳ ನಿಬಂಧನೆಗಳ ಪ್ರಕಾರ ಕ್ರಮ ಕೈಗೊಳ್ಳಲಾಗುವುದು ಎಂದು DoT ನಿರ್ದೇಶನ ತಿಳಿಸಿದೆ (ಏಜೆನ್ಸೀಸ್).