ರಿಬಾಕಿನಾ ಯುಗಾರಂಭ: ಸಬಲೆಂಕಾ ಮಣಿಸಿ ಚೊಚ್ಚಲ ಆಸ್ಟ್ರೇಲಿಯನ್ ಓಪನ್ ಮುಡಿಗೇರಿಸಿಕೊಂಡ ಕಜಕ್ ಸುಂದರಿ..Elena Rybakina

ಅತ್ಯಂತ ರೋಚಕವಾಗಿ ನಡೆದ ಫೈನಲ್ ಪಂದ್ಯದಲ್ಲಿ 5ನೇ ಶ್ರೇಯಾಂಕದ ರಿಬಾಕಿನಾ 6-4, 4-6, 6-4 ಸೆಟ್‌ಗಳಿಂದ ಸಬಲೆಂಕಾ ವಿರುದ್ಧ ಜಯಭೇರಿ ಬಾರಿಸಿದರು.

ಪಂದ್ಯದ ಆರಂಭದಿಂದಲೇ ರಿಬಾಕಿನಾ ತಮ್ಮ ಆಕ್ರಮಣಕಾರಿ ಆಟಕ್ಕೆ ಮೊರೆಹೋದರು. ಸಬಲೆಂಕಾ ಅವರ ಬಲಿಷ್ಠ ಸರ್ವ್‌ಗಳನ್ನು ಲೀಲಾಜಾಲವಾಗಿ ಎದುರಿಸಿದ ಅವರು, ಮೊದಲ ಸೆಟ್‌ನಲ್ಲಿ ಎದುರಾಳಿಗೆ ಒಂದು ಬ್ರೇಕ್ ಪಾಯಿಂಟ್ ಕೂಡ ನೀಡಲಿಲ್ಲ. ಚುರುಕಾದ ಫೋರ್‌ಹ್ಯಾಂಡ್ ಹೊಡೆತಗಳ ಮೂಲಕ 6-4 ರಿಂದ ಮೊದಲ ಸೆಟ್ ತಮ್ಮದಾಗಿಸಿಕೊಂಡರು.

ಸೋಲಿನ ಸುಳಿಯಲ್ಲಿದ್ದ ಸಬಲೆಂಕಾ ದ್ವಿತೀಯ ಸೆಟ್‌ನಲ್ಲಿ ಚೇತರಿಸಿಕೊಂಡರು. ಇಬ್ಬರೂ ಆಟಗಾರ್ತಿಯರು ತಮ್ಮ ಸರ್ವ್‌ಗಳನ್ನು ಉಳಿಸಿಕೊಳ್ಳುತ್ತಾ ಹೋದರು. ಆದರೆ ಸ್ಕೋರ್ 5-4 ರಲ್ಲಿದ್ದಾಗ, ಸಬಲೆಂಕಾ ಅದ್ಭುತ ಆಟ ಪ್ರದರ್ಶಿಸಿ ಮೂರು ಬ್ರೇಕ್ ಪಾಯಿಂಟ್ ಪಡೆದರು. ಮೊದಲ ಪ್ರಯತ್ನದಲ್ಲೇ ರಿಬಾಕಿನಾ ಸರ್ವ್ ಬ್ರೇಕ್ ಮಾಡಿದ ಸಬಲೆಂಕಾ, 6-4 ರಿಂದ ಸೆಟ್ ಗೆದ್ದು ಪಂದ್ಯಕ್ಕೆ ಜೀವ ತುಂಬಿದರು.

ಮೂರನೇ ಸೆಟ್ ಟೆನಿಸ್ ಪ್ರೇಮಿಗಳ ನಾಡಿಮಿಡಿತ ಹೆಚ್ಚಿಸಿತ್ತು. ಸಬಲೆಂಕಾ ಆರಂಭದಲ್ಲೇ ರಿಬಾಕಿನಾ ಸರ್ವ್ ಬ್ರೇಕ್ ಮಾಡಿ ಮುನ್ನಡೆ ಸಾಧಿಸಿದರು. ಆದರೆ ಎದೆಗುಂದದ ರಿಬಾಕಿನಾ ತಕ್ಷಣವೇ ರೀ-ಬ್ರೇಕ್ ಮಾಡುವ ಮೂಲಕ 3-3 ಸಮಬಲ ಸಾಧಿಸಿದರು. ಪಂದ್ಯ 4-3 ರಲ್ಲಿದ್ದಾಗ ರಿಬಾಕಿನಾ ಮತ್ತೊಮ್ಮೆ ಸಬಲೆಂಕಾ ಸರ್ವ್ ಕಿತ್ತುಕೊಂಡು 5-3 ಮುನ್ನಡೆ ಪಡೆದರು. ಅಂತಿಮವಾಗಿ ತಮ್ಮ ಸರ್ವ್ ಉಳಿಸಿಕೊಂಡು ಗೆಲುವಿನ ನಗೆ ಬೀರಿದರು.

ಆಸ್ಟ್ರೇಲಿಯನ್ ಓಪನ್ ಸಿಂಗಲ್ಸ್ ಪ್ರಶಸ್ತಿ ಗೆದ್ದ ಕಜಕಿಸ್ತಾನದ ಮೊದಲ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ರಿಬಾಕಿನಾ ಪಾತ್ರರಾಗಿದ್ದಾರೆ. ಈ ಹಿಂದೆ 2022ರಲ್ಲಿ ಅವರು ವಿಂಬಲ್ಡನ್ ಗೆದ್ದಾಗಲೂ ಈ ಸಾಧನೆ ಮಾಡಿದ ತಮ್ಮ ದೇಶದ ಮೊದಲ ವ್ಯಕ್ತಿಯಾಗಿದ್ದರು.

ರಿಬಾಕಿನಾ ಈಗ ವಿಶ್ವದ ಅಗ್ರ 10 ಶ್ರೇಯಾಂಕದ ಆಟಗಾರ್ತಿಯರ ವಿರುದ್ಧ ಸತತ 10 ಪಂದ್ಯಗಳನ್ನು ಗೆದ್ದ ಅಪರೂಪದ ಸಾಧನೆ ಮಾಡಿದ್ದಾರೆ.

2008ರಲ್ಲಿ ಮಾರಿಯಾ ಶರಪೋವಾ ಅವರು ಟೂರ್ನಿಯಲ್ಲಿ ಅಗ್ರ 6 ಶ್ರೇಯಾಂಕದ ಮೂವರು ಆಟಗಾರ್ತಿಯರನ್ನು ಸೋಲಿಸಿ ಪ್ರಶಸ್ತಿ ಗೆದ್ದಿದ್ದರು. ಈಗ ರಿಬಾಕಿನಾ ಅವರು ಇಗಾ ಸ್ವಿಯಾಟೆಕ್ (ನಂ.2), ಜೆಸ್ಸಿಕಾ ಪೆಗುಲಾ (ನಂ.6) ಮತ್ತು ಸಬಲೆಂಕಾ (ನಂ.1) ಅವರನ್ನು ಸೋಲಿಸಿ ಆ ದಾಖಲೆಯನ್ನು ಸರಿಗಟ್ಟಿದ್ದಾರೆ.

ಈ ಗೆಲುವಿನೊಂದಿಗೆ ರಿಬಾಕಿನಾ ವಿಶ್ವ ಶ್ರೇಯಾಂಕದಲ್ಲಿ ಭಾರೀ ಜಿಗಿತ ಕಾಣಲಿದ್ದಾರೆ. ಸಬಲೆಂಕಾ ಅವರ ನಂ.1 ಪಟ್ಟಕ್ಕೆ ಈಗ ರಿಬಾಕಿನಾ ನೇರ ಸವಾಲೊಡ್ಡಿದ್ದಾರೆ,(ಏಜೆನ್ಸೀಸ್).